प्रजासत्ताक दिनी घडला भयानक प्रकार, दिल्लीत महिलेचे अपहरण करून सामूहिक बलात्कार – चपलांचा हार घालून रस्त्यावर फिरवलं

दिल्लीच्या (Delhi Crime) विवेक विहार परिसरात (Vivek Vihar) एका महिलेचे अपहरण करून तिच्यावर सामूहिक बलात्कार (Gang Rape In Delhi) करत प्राणघातक हल्ला करण्यात आला. याप्रकरणी दिल्ली पोलिसांनी (Delhi Police) ४ आरोपींना अटक केली आहे.

    दिल्ली : प्रजासत्ताक दिनाच्या (Republic Day) दिवशीच राजधानी दिल्लीत एका महिलेवर बलात्कार झाल्याची घटना घडली आहे. दिल्लीच्या (Delhi Crime) विवेक विहार परिसरात (Vivek Vihar) एका महिलेचे अपहरण करून तिच्यावर सामूहिक बलात्कार (Gang Rape In Delhi) करत प्राणघातक हल्ला करण्यात आला. याप्रकरणी दिल्ली पोलिसांनी (Delhi Police) ४ आरोपींना अटक केली आहे. पीडित महिला आणि आरोपींमध्ये काही वाद होते. त्या वादामुळे ही घटना घडल्याचा पोलिसांना संशय आहे. धक्कादायक म्हणजे आरोपींनी तिच्यावर बलात्कार केल्यानंतर तिचे केस कापले, तिला चपलांचा हार घालून रस्त्यावर फिरायला लावले.

    पोलिसांनी दिलेल्या माहितीनुसार, महिलेचे लग्न झाले असून तिला एक मूल आहे. मध्यंतरी अनेक महिने तिच्या शेजारी राहणारा एक तरुण तिचा पाठलाग करत होता. तो नंतर नोव्हेंबरमध्ये आत्महत्या करून मरण पावला. त्या तरुणाच्या कुटुंबियांनी त्याच्या आत्महत्येसाठी महिलेला जबाबदार धरले होते.

    दिल्ली पोलिसांनी सांगितले की, “वैयक्तिक वैमनस्यातून एका महिलेवर लैंगिक अत्याचाराची दुर्दैवी घटना शाहदरा जिल्ह्यात घडली आहे. पोलिसांनी चार आरोपींना अटक केली आहे आणि चौकशी सुरू आहे. पीडितेला सर्व शक्य मदत आणि समुपदेशन केले जात आहे.”

    दरम्यान, या घटनेची माहिती महिलेच्या लहान बहिणीने पोलिसांना दिली. महिलेच्या तक्रारीवरून सामूहिक बलात्काराची तक्रार दाखल करण्यात आल्याचे पोलिसांनी सांगितले. या प्रकरणाचा तपास सुरू असल्याचे ते म्हणाले.दिल्ली महिला आयोग दिल्ली पोलिसांना याप्रकरणी नोटीस देखील जारी करेल. अवैध दारू विक्रेत्यांनी महिलेचे अपहरण करून तिच्यावर सामूहिक बलात्कार केला, असे आयोग प्रमुख स्वाती मालीवाल यांनी सांगितले.