candle gifted to mahavitran

राज्यभरात वाढीव वीज बिलाविरोधात (extra electricity bill) मनसे (mns protest)आणि भाजपने आंदोलन केलं. मात्र, सरकार किंवा महावितरण कंपनीवर त्याचा फारसा फरक पडला नाही. कल्याण-डोंबिवलीत देखील काही नागरीकांचा वीज पुरवठा खंडीत केला जात आहे.

    कल्याण : वीज (electricity)तोडणी विरोधात कल्याणमध्ये मनसेने (MNS protest)अनोखे आंदोलन केले. अधिकाऱ्यांच्या केबीनमधील लाईट पंखा बंद करुन मेणबत्ती भेट दिल्या. इतकेच नाही तर वीज तोडणीची कारवाई थांबिवली नाही तर कार्यालय पेटवून देण्याची धमकी यावेळी मनसे पदाधिकाऱ्यांनी दिली आहे.

    राज्यभरात वाढीव वीज बिलाविरोधात मनसे आणि भाजपने आंदोलन केलं. मात्र, सरकार किंवा महावितरण कंपनीवर त्याचा फारसा फरक पडला नाही. कल्याण-डोंबिवलीत देखील काही नागरीकांचा वीज पुरवठा खंडीत केला जात आहे. याची माहिती मिळताच मनसेचे उपशहर अध्यक्ष योगेश गव्हाणे त्यांच्या सहकाऱ्यांसह कल्याण पूर्व टाटा पॉवर नाका परिसरात असलेल्या वीज वितरण कार्यालयात पोहचले. महावितरणचे कार्यकारी अभियंता नरेंद्र धबड यांच्या कार्यालयात जाऊन या पदाधिकाऱ्यांनी केबीनमधील लाईट-पंखा बंद केला. जवळपास पाऊण तास मनसे पदाधिकारी अधिकाऱ्यांसोबत अंधारात चर्चा करीत होते. लाईट-पंखा नसल्याने नागरिकांना काय त्रास होतो हे अधिकारी वर्गास दाखवून दिले. नंतर धबड यांना मेणबत्ती भेट दिली.

    महावितरणकडून सातत्याने घरगुती थकीत वीज बिल तोडणीच्या तक्रारी प्राप्त झाल्या आहेत. ग्राहक पैसे जमा करण्यास तयार असतानासुद्धा महावितरणचे कर्मचारी ग्राहकांशी उद्धट भाषेत बोलत लोकांवर बिल भरण्यास बळजबरी करत आहेत. काही ग्राहक हे गावी असताना त्यांचे मीटर काढून नेत आहेत. वीजतोडणी मोहिमेत सुधार करून महावितरण कर्मचाऱ्यांना योग्य ती ताकिद द्यावी. बिलांच्या वसुलीला आमचा विरोध नाही पण ज्याप्रकारे दादागिरीने व इंग्रजांप्रमाणे कारवाई चालू आहे त्याचा मनसेच्या वतीने जाहीर निषेध करत असल्याचे योगेश गव्हाणे यांनी सांगितले. वीज तोडणीची कारवाई महावितरणने थांबविली पाहिजे. आज मेणबत्ती दिली आहे. उद्या मेणबत्तीसह महावितरणचे कार्यालयही पेटवून देऊ असा गंभीर इशारा, मनसेने दिला आहे.

    यावेळी मनसे उपशहर अध्यक्ष योगेश गव्हाणे, विधानसभा अध्यक्ष अनंता गायकवाड, मनविसे शहर अध्यक्ष निर्मल निगडे, विभाग अध्यक्ष उमेश पावशे, वाहतूक सेना सल्लागार गणेश सोनवणे, महेंद्र कुंदे, विलास गिरी, उपविभाग अध्यक्ष जितेंद्र वाघाचोरे, अंकूश राजपूत, मनवीसे उपशहर सतीश उगले आदी पदाधिकारी उपस्थित होते.