सीटबेल्ट न लावल्याने ब्रिटीश PMला 10 हजारांचा दंड, सुनक कारमध्ये व्हिडिओ बनवत होते

सरकारमध्ये असताना ऋषी सुनक यांना दंड ठोठावण्याची ही दुसरी वेळ आहे. जून 2020 मध्ये कोरोना लॉकडाऊन असताना देखील तत्कालीन पंतप्रधान बोरिस जॉन्सन आणि त्यांची पत्नी कॅरी यांच्यासोबत सुनक यांनी पार्टी केल्याबद्दल त्यांना दंडही ठोठावण्यात आला होता.

    नवी दिल्ली – ब्रिटनचे पंतप्रधान ऋषी सुनक यांना वाहतुकीचे नियम मोडल्याबद्दल 10 हजारांचा दंड ठोठावण्यात आला आहे. लंकाशायर पोलिसांनी शुक्रवारी पंतप्रधानाविरूद्ध 100 पॉंडचे चालन जारी केले. सुनक यांनी याप्रकरणात दोन दिवसांपूर्वी म्हणजेच शुक्रवारी माफी मागितली होती. तरी देखील पोलिसांनी चक्क पंतप्रधानांनाच दंड ठोठावला आहे.

    सरकारमध्ये असताना ऋषी सुनक यांना दंड ठोठावण्याची ही दुसरी वेळ आहे. जून 2020 मध्ये कोरोना लॉकडाऊन असताना देखील तत्कालीन पंतप्रधान बोरिस जॉन्सन आणि त्यांची पत्नी कॅरी यांच्यासोबत सुनक यांनी पार्टी केल्याबद्दल त्यांना दंडही ठोठावण्यात आला होता. त्यावेळी सुनक यांनी लॉकडाऊनचे नियम मोडून डाऊनिंग स्ट्रीटमध्ये वाढदिवसाच्या पार्टीला हजेरी लावली होती.

    या प्रकरणातील विशेष बाब म्हणजे PM सुनक हे स्वतः गाडी चालवत नव्हते. तसेच ते गाडीच्या पुढच्या सीटवर देखील बसलेले नव्हते. मागच्या सीटवर बसून ते व्हिडिओ काढत होते. त्यांचा हा व्हिडिओ समोर आल्यानंतर ब्रिटनमधील पोलिसांनी ही कारवाई केली. हे प्रकरण उघडकीस आल्यानंतर ब्रिटनच्या पंतप्रधानांच्या निवासस्थान 10 डाउनिंग स्ट्रीटवरून एक निवेदन जारी करण्यात आले. ‘सुनक यांनी आपली चूक पूर्णपणे मान्य केली आहे त्याबद्दल माफी मागितली, ते दंड भरण्यास तयार आहेत. जेव्हा पंतप्रधानांनी हा व्हिडिओ बनवला तेव्हा ते उत्तर इंग्लंडमधील लँकेशायरमध्ये होते.