उमरखेड तालुक्यातील पैनगंगा अभयारण्य परिसरातील जवळपास ४० गावांचा संपर्क तुटला

गेल्या दोन दिवसांपासून सुरू असलेल्या संततधार पावसामुळे आज गुरूवारी जिल्ह्यात अनेक ठिकाणी जनजीवन विस्कळीत झाले. उमरखेड, महागाव, पुसद, दिग्रस, नेर, वणी, झरी जामणी आदी तालुक्यांत पावसाचा जोर अधिक होता. उमरखेड, महागाव, पुसद तालुक्यात पावसाने अधिक नुकसान झाले.

    यवतमाळ (Yavatmal). गेल्या दोन दिवसांपासून सुरू असलेल्या संततधार पावसामुळे आज गुरूवारी जिल्ह्यात अनेक ठिकाणी जनजीवन विस्कळीत झाले. उमरखेड, महागाव, पुसद, दिग्रस, नेर, वणी, झरी जामणी आदी तालुक्यांत पावसाचा जोर अधिक होता. उमरखेड, महागाव, पुसद तालुक्यात पावसाने अधिक नुकसान झाले. अनेक नदी, नाल्यांना पूर आला आहे. उमरखेड तालुक्यातील पैनगंगा अभयारण्य परिसरातील जवळपास ४० गावांचा आज सकाळी संपर्क तुटला होता.

    दरम्यान, उमरखेड तालुक्यात नाल्याला आलेल्या पुरात वाहून गेलेल्या युवकाला वाचविण्यात प्रशासनाला यश आले. जिल्ह्यात गेल्या दोन दिवसांपासून कुठे मुसळधार तर कुठे संततधार पाऊस कोसळत आहे. आज शुक्रवार सकाळपासून पावसाचा जोर चांगलाच वाढला. त्यात उमरखेड, पुसद, महागाव या तालुक्यात मुसळधार पाऊस झाला. त्यामुळे परिसरातील अनेक नदी, नाले ओसंडून वाहत होते. उमरखेड तालुक्यातील ढाणकी, गांजेगाव, कुपटी, बिटरगाव, दहागाव यासह अनेक ठिकाणी पूर परिस्थिती निर्माण झाली.

    दहागाव जवळील नाल्याच्या पुरात कुपटी येथील विजय दत्ता इलतकर हा युवक वाहुन गेला. प्रसंगावधान राखून त्याने एका झाडाची फांदी पकडून ठेवली. घटनेची माहिती प्रशासनास देण्यात आली. प्रशासनाने तत्काळ रेस्क्यू ऑपरेशन करून या युवकास पुरातून बाहेर काढले.

    पावसामुळे उमरखेड तालुक्यात सर्वाधिक ३४ घरांची पडझड झाली. तर ७५० हेक्टरवरील पिकांचे नुकसान झाले. याशिवाय दिग्रस, नेर, केळापूर, वणी, झरी जामणी तालुक्यात पावसामुळे काही ठिकाणी घरांची पडझड झाली. पुसद तालुक्यातही पावसाने शेती खरडून गेल्याने नुकसान झाले.

    पुरामुळे पैनगंगा अभयारण्यातील ४० गावांचा आज सकाळी संपर्क तुटला होता. मात्र दुपारनंतर परिस्थिती पूर्वपदावर आली. उमरखेड, पुसद, ढाणकी, हिमायतनगर व अन्य भागातील वाहतूकही पुरामुळे काही काळ ठप्प झाली होती. बाभुळगाव तालुक्यातील बेंबळा प्रकल्पाचे दोन दरवाजे १० सेंमीने उघडण्यात आले आहे. मात्र जिल्ह्यात इतर ठिकाणी कोणतेही धरण, प्रकल्प अद्याप पूर्ण क्षमतेने भरले नाही.