मंगळवार, 1 सप्टेंबर 2026
फोटो सौजन्य- सोशल मीडिया
Major Rishabh Singh Sambyal: राष्ट्रपती द्रौपदी मुर्मू यांचे एड-डी-कॅम्प (ADC) राहिलेले मेजर ऋषभ सिंह सांब्याल यांनी भारतीय सैन्यातून अकाली निवृत्ती घेण्याचा निर्णय घेतला आहे. राष्ट्रपतींच्या सुरक्षेत नेहमी सोबत दिसणाऱ्या मेजर सांब्याल यांच्या लष्करी शिस्तीमुळे आणि व्यक्तिमत्त्वामुळे सोशल मीडियावर त्यांना “नॅशनल क्रश” म्हटले जात होते. त्यांच्या सैन्य सोडण्याच्या निर्णयामुळे आणि त्यांच्या जीवनप्रवासाविषयी लोकांमध्ये मोठी उत्सुकता आहे.
मेजर ऋषभ सिंह सांब्याल हे मूळचे जम्मू-कश्मीरच्या सांबा जिल्ह्यातील असून ते एका डोगरा राजपूत कुटुंबातून येतात. त्यांच्या कुटुंबाची लष्कराची पार्श्वभूमी राहिली असून, लहानपणापासूनच त्यांना सैन्यात जाऊन देशसेवा करण्याची इच्छा होती. त्यांनी आपली शालेय शिक्षण सैनिक शाळा, कपूरथला येथून पूर्ण केले. त्यानंतर नॅशनल डिफेन्स अकॅडमी (NDA) मधून प्रशिक्षण घेतल्यानंतर २०१८ मध्ये त्यांना भारतीय सैन्याच्या जाट रेजिमेंटमध्ये कमिशन मिळाले.
जाट रेजिमेंटचे नेतृत्व: २०२१ च्या प्रजासत्ताक दिन परेडमध्ये त्यांनी जाट रेजिमेंटच्या तुकडीचे नेतृत्व केले होते, ज्यांना सर्वोत्कृष्ट मार्चिंग कंटिजेंटचा सन्मान मिळाला होता.
४ पॅरा स्पेशल फोर्स: कठीण शारीरिक व मानसिक प्रशिक्षणानंतर ते सैन्याच्या अत्यंत प्रतिष्ठित मानल्या जाणाऱ्या ‘४ पॅरा स्पेशल फोर्स’चा भाग बनले. याच काळात त्यांना प्रतिष्ठित ‘बलिदान बॅज’ देखील मिळाला.
राष्ट्रपतींचे ADC: उत्कृष्ट सेवेमुळे त्यांची राष्ट्रपती द्रौपदी मुर्मू यांच्या एडीसी (ADC) पदी नियुक्ती झाली होती. राष्ट्रपतींसोबतच्या त्यांच्या सतर्कतेमुळे आणि साधेपणाने ते सोशल मीडियावर प्रचंड लोकप्रिय झाले.
सैन्याची वर्दी घालणे हे त्यांचे बालपणाचे स्वप्न होते, मात्र काही वैयक्तिक आणि कौटुंबिक परिस्थितीमुळे त्यांना वेळेपूर्वीच सैन्यदलातून निवृत्ती घेण्याचा हा कठीण निर्णय घ्यावा लागला. हा निर्णय पूर्णपणे वैयक्तिक कारणांमुळे घेतल्याचे त्यांनी स्पष्ट केले आहे. भविष्यातही वेगवेगळ्या रूपाने देशाची सेवा करत राहण्याचा मानस त्यांनी व्यक्त केला आहे.
