पाटस टोलनाक्याची तोडफोड करणे तरुणांना भोवलं; यवत पोलिसांत गुन्हा दाखल
पाटस : पुणे-सोलापूर राष्ट्रीय महामार्गावर असलेल्या पाटस येथील टोलनाक्यावर कोयत्यांनी टोलनाक्याची तोडफोड करत एका टोल कर्मचाऱ्यावर जीवघेणा हल्ला केला. याप्रकरणी सहा तरुणांवर यवत पोलीस ठाण्यात गंभीर स्वरूपाचे गुन्हे दाखल करण्यात आले आहेत. याप्रकरणी चार संशयित आरोपींना ताब्यात घेतले असून, दोघे जण फरार असून त्यांचा शोध सुरू आहे.
रमेश बाबाजी शेगर, शाहरुख बाबु शेख, अभिषेक सुधीर चौगुले (तिघे रा. पाटस, ता. दौंड, जि. पुणे), प्रसाद शंकर मेरगळ, (रा. बिरोबावाडी ता. दौंड, जि. पुणे) शुभम रामचंद्र मारणे (रा. कात्रत्र, पुणे), जीवन रविंद्र गायकवाड (रा. कानगाव ता.दौंड जि. पुणे) अशी या आरोपींची नावे आहेत. याबाबत पोलिसांनी दिलेली अधिक माहिती अशी की, पुणे-सोलापूर राष्ट्रीय महामार्गावरील पाटस टोलनाक्यावर सोमवारी (दि. १३) सायंकाळी ५.१५ वाजण्याच्या सुमारास टोल नाक्यावर लेन क्रमांक ४ वर चारचाकी स्विफ्ट कारमधून चार-पाच जण खाली उतरले. हातात कोयता आणि लोखंडी गजाने टोल बुथची तोडफोड करून दहशत निर्माण केली.
तोडफोड करून ते चार-पाच जण पुन्हा स्विफ्ट कारमध्ये बसून ४ नंबर लेनने सोलापूर बाजूकडे पुढे जाऊन परत वळून लेन नंबर ११ वर आली. यावेळी सहा जण गाडीतून खाली उतरून हातातील लोखंडी गज आणि कोयत्याने पुन्हा टोल बुथची तोडफोड केली. यावेळी टोल कर्मचाऱ्यांनी त्यांना समजावून सांगण्याचा प्रयत्न केला असता त्यांनी टोल कर्मचारी राहुल कर्मचारी यांच्यावर कोयत्याने हल्ला केला.
कोयता डोक्यात मारत असताना खोमणे यांनी हाताने अडवला असता हाताच्या बोटावर वार बसला. या हल्ल्यात खोमणे यांच्या हाताला मार लागल्याने ते जखमी झाले, अशी फिर्याद टोल कर्मचारी राहुल पांडुरंग खोमणे यांनी पोलिस ठाण्यात दिली. याप्रकरणी सहा जणांवर टोलच्या बुथची तोडफोड करून नुकसान करणे, जीवघेणा हल्ला करणे यासह विविध गंभीर स्वरूपाचे गुन्हे दाखल करण्यात आले आहेत, अशी माहिती पोलिसांनी दिली.
