Photo Credit- X@ Anjali Damania
मुंबई: सरपंच संतोष देशमुख हत्या प्रकरणाबाबत पहिल्या दिवसापासून अॅक्टिव्ह मोडवर असणाऱ्या सामाजिक कार्यकर्त्या अंजली दमानिया यांनी पुन्हा एकदा नवा दावा केला आहे. त्यांच्या नव्या दाव्यामुळे या प्रकरणाला पुन्हा नवे वळण लागण्याची शक्यता निर्माण झाली आहे. संतोष देशमुख हत्या प्रकरणाची सुनावणी करणाऱ्या न्यायाधिशांनीच या प्रकरणत निंलबित करण्यात आलेल्या पोलीस अधिकाऱ्यांसोबत धुळवड खेळल्याचा दावा दमानिया यांनी केला आहे. हा दावा करताना त्यांनी काही फोटोही पोस्ट केले आहेत.
9 डिसेंबर 2024 रोजी संतोष देशमुख यांची हत्या करण्यात आली होती. या हत्या प्रकरणात राष्ट्रवादी काँग्रेसचे नेते आणि तत्त्कालीन मंत्री धनंजय मुंडे यांचे निकटवर्तीय वाल्मिक कराडला अटक करण्यात आली. सुरूवातीला खंडणी प्रकरणात कराडला अटक करण्यात आली होती. पण खंडणीतूनच संतोष देशमुख यांची हत्या केल्याचा आणि वाल्मिक कराड हाच या हत्येचा सुत्रधार असल्याचाही दावा करण्यात आला. संतोष देशमुख हत्या प्रकरण आणि या प्रकरणातील इतर आरोपींवर महाराष्ट्र संघटित गुन्हेगारी नियंत्रण कायद्यांतर्गत ( मकोका) त्यांच्यावर कारवाई करण्यात आली. त्याचवेळी धनंजय मुंडे यांच्यावरही गंभीर आरोप करत त्यांच्याही राजीनाम्याची मागणी होऊ लागली. त्यामुळे धनंजय मुंडे यांनादेखील आपल्या मंत्रीपदाचा राजीनामा द्यावा लागला. दोन दिवसांपूर्वी या बीड न्यायालयात संतोष देशमुख हत्या प्रकरणाची सुनावणी पार पडली.
सामाजिक कार्यकर्त्या अंजली दमानिया यांनी वेळोवेळी या प्रकरणातील धागेदोरे दाखवत वाल्मिक कराडसह थेट धनंजय मुंडे आणि बीड पोलीस अधिकाऱ्यांवरही गंभी आरोप केले. राज्यात हे प्रकरण तापले असतानाच आता अंजली दमानिया यांनी पुन्हा एकदा मोठा दावा केला आहे. संतोष देशमुख हत्या प्रकरणाची सुनावणी करणाऱ्या न्यायाधिशांनीच बीडमधील निलंबित पोलीस अधिकाऱ्यांसोबत धुळवड खेळल्याचा दावा केला आहे.
“हे फोटो तपासा आणि आधी खात्री करा. मला मिळालेल्या माहितीप्रमाणे …संतोष देशमुख हत्या प्रकरणामुळे निलंबित पोलीस उपनिरिक्षक राजेश पाटील व याच हत्याकांडामुळे सक्तीच्या रजेवर पाठवलेले पोलीस निरिक्षक प्रशांत महाजन हे धुरवडीला रंगाची उधळण करुन आनंद साजरा करताना दिसत आहेत.
पण कोणाबरोबर ? संतोष देशमुख हत्याकांडाची सूनावणी करणारे जिल्हा व सत्र न्यायालयाचे न्यायाधिस सुधिर भाजीपाले यांच्या सोबत रंगाची उधळण करताना दिसत आहेत आता यांचे जर आरोपीला वाचणारे हे निंलबित आधिकारी यांच्या सोबत केस चालू असताना, जज होळी खेळत असतील तर हे खूप चुकीचे आहे.”
केज :- हे फोटो तपासा आणि आधी खात्री करा. मला मिळालेल्या माहितीप्रमाणे ….. संतोष देशमुख हत्या प्रकरणामुळे निलंबित पोलीस उपनिरिक्षक राजेश पाटील व याच हत्याकांडामुळे सक्तीच्या रजेवर पाठवलेले पोलीस निरिक्षक प्रशांत महाजन हे धुरवडीला रंगाची उधळण करुन आनंद साजरा करताना दिसत आहेत पण… pic.twitter.com/16wfqJ6Cnh — Mrs Anjali Damania (@anjali_damania) March 14, 2025
संतोष देशमुख हत्या प्रकरणात पीएसआय राजेश पाटील यांच्यावर आरोपींसोबत संगनमत केल्याचा आरोप आहे. त्यामुळे त्यांच्या चौकशीची मागणी होत आहे. या प्रकरणातील आरोपी विष्णू चाटे यांच्या कार्यालयातील 29 नोव्हेंबर 2024 रोजीचे सीसीटीव्ही फुटेज समोर आले असून, त्यामध्ये वाल्मीक कराडसोबत राजेश पाटीलदेखील दिसत आहेत. याशिवाय, संतोष देशमुख यांच्या हत्येच्या एक दिवस आधी, म्हणजे 8 डिसेंबर 2024 रोजी, राजेश पाटील यांनी केज येथील एका हॉटेलमध्ये आरोपी सुदर्शन घुलेची भेट घेतल्याचा आरोप आहे. त्याचेही सीसीटीव्ही फुटेज समोर आल्याने या प्रकरणाला नवे वळण मिळाले आहे.
