शनिवार, 17 ऑक्टोबर 2026
( फोटो सौजन्य- सोशल मिडिया)
Rakshabandhan 2026: भाऊ-बहिणीच्या प्रेमाचा खास सण म्हणजे रक्षाबंधन. देशभरात आज रक्षाबंधनाचा उत्साह पाहायला मिळत असून, बॉलिवूडमध्येही सेलिब्रिटी भाऊ-बहिणी हा सण मोठ्या आनंदात साजरा करत आहेत. राखीच्या या खास निमित्ताने आज आपण बॉलिवूडमधील अशा काही भावांबद्दल जाणून घेणार आहोत, जे आपल्या बहिणींची केवळ भावाप्रमाणेच नव्हे तर पालकाप्रमाणेही काळजी घेतात.
अभिनेता अर्जुन कपूर आणि त्याची धाकटी बहीण अंशुला कपूर यांच्यातील बॉन्डिंग कायमच चर्चेत असते. दोघेही निर्माता बोनी कपूर आणि दिवंगत मोना शौरी कपूर यांची मुलं आहेत. आईच्या निधनानंतर अर्जुनने अंशुलाला प्रत्येक टप्प्यावर खंबीर साथ दिली.
अर्जुन हा अंशुलासाठी केवळ मोठा भाऊ नाही, तर तिचा ‘सेफ स्पेस’ आणि भावनिक आधारही आहे. अंशुला याच वर्षी रोहन ठक्करसोबत विवाहबंधनात अडकली. तिच्या लग्नावेळी आणि विशेषतः विदाईच्या प्रसंगी अर्जुन भावूक झालेला पाहायला मिळाला होता.
अर्जुन केवळ अंशुलाचीच नाही तर वडील बोनी कपूर आणि दिवंगत अभिनेत्री श्रीदेवी यांच्या मुली जान्हवी कपूर आणि खुशी कपूर यांचीही काळजी घेतो. जान्हवी आणि खुशीदेखील अर्जुनला राखी बांधतात.
बॉलिवूडचा ‘भाईजान’ सलमान खान हा आपल्या कुटुंबीयांसाठी कायमच खंबीरपणे उभा राहतो. इंडस्ट्रीत कोणालाही मदतीची गरज असेल तर पुढे येणारा सलमान आपल्या बहिणींबाबतही तितकाच काळजीवाहू आहे.
सलमान आपल्या बहिणी अलवीरा खान अग्निहोत्री आणि अर्पिता खान शर्मा यांची विशेष काळजी घेतो. विशेषतः धाकटी बहीण अर्पितासोबत त्याचे खास नाते आहे. तिच्या आयुष्यातील महत्त्वाच्या प्रसंगी सलमान कायम तिच्या पाठीशी उभा राहतो.
बॉलिवूडचा किंग शाहरुख खान आपल्या कुटुंबासाठी किती भावनिक आहे, हे अनेकदा पाहायला मिळाले आहे. शाहरुखची मोठी बहीण शहनाज लालारुख खान असून, दोघांमध्ये घट्ट नाते आहे.
आई-वडिलांच्या निधनानंतर शहनाज यांना मोठा धक्का बसला होता. त्या काळात त्या बराच काळ शांत आणि अस्वस्थ राहिल्या. अशा कठीण प्रसंगी शाहरुखने बहिणीला मजबूत आधार दिला. रिपोर्ट्सनुसार, शहनाज आपल्या भावाच्या कुटुंबासोबत मुंबईतील त्यांच्या ‘मन्नत’ या घरात राहतात.
शाहरुखची राखी बहीण म्हणून पश्चिम बंगालच्या माजी मुख्यमंत्री ममता बॅनर्जी यांचेही नाव घेतले जाते. त्या शाहरुखला राखी बांधतात.
अभिनेता सैफ अली खान याच्या दोन धाकट्या बहिणी म्हणजे सबा अली खान आणि सोहा अली खान. सैफ आपल्या दोन्ही बहिणींबाबत प्रोटेक्टिव्ह असल्याचे पाहायला मिळते.
मात्र, सैफ या नात्यात केवळ मोठा भाऊ म्हणून अधिकार गाजवण्यापेक्षा बहिणींना समान स्थान देण्यावर विश्वास ठेवतो. गरज पडल्यास तो धाकटी बहीण सबाचा सल्लाही घेतो. त्यामुळे त्यांच्या नात्यातील परस्पर आदर आणि विश्वासही विशेष आहे.
निरागस हास्याने खुलली राखीपौर्णिमा; विशेष मुलांसोबत ‘सन मराठी’च्या कलाकारांनी साजरा केला प्रेमाचा सण
अभिनेता कार्तिक आर्यन आणि त्याची धाकटी बहीण डॉ. कृतिका तिवारी यांच्यातही खास बॉन्डिंग आहे. कृतिका या व्यवसायाने डॉक्टर असून हेअर ट्रान्सप्लांट स्पेशलिस्ट आहेत.
कार्तिक अनेकदा बहिणीसोबतचे मजेशीर व्हिडीओ आणि फोटो सोशल मीडियावर शेअर करत असतो. दोघांमधील मस्ती चाहत्यांना आवडते. मात्र, बहिणीच्या सुरक्षेपासून तिच्या आयुष्यातील महत्त्वाच्या निर्णयांपर्यंत कार्तिक कायम तिच्या पाठीशी उभा राहतो.
रक्षाबंधन हा केवळ राखी बांधण्याचा सण नाही, तर भाऊ-बहिणीमधील प्रेम, विश्वास आणि आयुष्यभराच्या साथीची आठवण करून देणारा दिवस आहे. बॉलिवूडमधील या भावंडांचे नातेही त्याच प्रेमाची आणि जबाबदारीची सुंदर झलक दाखवते.
राम-लक्ष्मणाच्या अतूट बंधाची आठवण करून देणारा ‘बंधू’; उपेंद्र लिमये आणि जितेंद्र जोशी प्रथमच एकत्र
