पोलीस भरती
राज्यातील अनेक भागांमध्ये तरुण मोठ्या संख्येने पोलीस भरती, आर्मी भरतीची तयारी करत असतात. अशातच आता ज्या उमेदवारांनी ठाणे ग्रामीण पोलीस दलात भरती होण्यासाठी अर्ज भरले आहेत. अशा तरुणांना दिलासा देणारी बातमी समोर आली आहे. “ठाणे ग्रामीण पोलीस दलाकडून येत्या १९ जून पासून आपल्या विविध पदांसाठी भरती प्रक्रिया राबवली जाणार आहे.” अशी माहिती ठाणे ग्रामीणचे पोलीस अधीक्षक डॉ.डी.एस.स्वामी यांनी पत्रकार परिषदेत दिली आहे.
७०१९ उमेदवारांचे अर्ज प्राप्त
ठाणे ग्रामीण पोलीस दलामध्ये एकूण ११९ पदांसाठी भरती प्रक्रिया पार पडणार आहे. या सर्व जागांसाठी एकूण ७०१९ उमेदवारांचे अर्ज प्राप्त झाले आहेत. यामध्ये एकूण १०१५ महिला उमदेवारांचे अर्ज प्राप्त झाले आहेत. तर पुरुष उमेदवारांचे सहा हजार चार अर्ज प्राप्त झाले आहेत. येत्या १९ जून पासून मुंब्रा येथील मौलाना अबुल कलाम आझाद स्टेडीयम येथे ही पोलीस भरतीची प्रक्रिया पार पडणार आहे. असेही डॉ.डी.एस.स्वामी यांनी म्हटले आहे.
करण्यात आलीये उमेदवारांची राहण्याची व्यवस्था
दरम्यान, जे उमेदवार भरतीसाठी मुंब्रा येथे भरतीसाठी येणार आहेत. त्यांची गैरसोय होणार नाही याची संपुर्ण काळजी घेतली जाणार आहे. या भरती प्रक्रियेमध्ये शारीरिक चाचणी पार पडणार आहे. सध्या पावसाचे दिवस आहेत. म्हणून १०० मीटरचा जो ट्रॅक आहे त्या ठिकाणी पुर्णपणे वॉटरप्रुफिंग करण्यात येणार आहे. जे उमेदवार मध्यरात्री येतील किंवा पहाटे येतील त्यांची राहण्याची व्यवस्था करण्यात येणार आहे. अशी माहितीही डॉ.डी.एस.स्वामी यांनी दिली आहे. इतकेच नाही तर आरोग्याच्या दृष्टीकोनातून उमेदवारांसाठी ॲम्ब्युलन्स असणार आहे. तसेच कोणत्या उमेदवाराला काही शंका असतील तर तातडीने त्या शंकाच निरासन करणार असल्याची माहितीही त्यांनी दिली आहे.
