रविवार, 30 ऑगस्ट 2026
Switzerland Shooting: स्वित्झर्लंडमध्ये डान्स फ्लोअरवर रक्ताचा सडा; रेव्ह पार्टीत अंधाधुंध गोळीबार, १ ठार ५ जखमी ( फोटो सौजन्य : सोशल मीडिया )
मध्य युरोपमधील शांतताप्रिय आणि अत्यंत सुरक्षित मानल्या जाणाऱ्या स्वित्झर्लंड (switzerland) देशातून एक अत्यंत धक्कादायक आणि थरारक बातमी समोर आली आहे. स्वित्झर्लंडच्या उत्तरेकडील अरगौ (Aargau) कॅन्टोनची राजधानी असलेल्या आरौ (Aarau) शहरामध्ये आयोजित एका भव्य रेव्ह पार्टीवर (Aarau Rave Vol. 7) अज्ञात हल्लेखोराने अचानक अंधाधुंद गोळीबार केला. या भीषण दुर्घटनेत एका २२ वर्षीय तरुणीचा घटनास्थळीच दुर्दैवी मृत्यू झाला, तर २४ ते २७ वर्षे वयोगटातील चार पुरुष आणि एक महिला असे एकूण पाच जण गंभीर जखमी झाले आहेत. या अचानक झालेल्या हल्ल्यामुळे संपूर्ण शहरात आणि कार्यक्रमाच्या ठिकाणी प्रचंड भीतीचे वातावरण पसरले आहे.
मिळालेल्या सविस्तर माहितीनुसार, हा थरारक प्रकार झुरिचच्या पश्चिमेला सुमारे ४६ किलोमीटर अंतरावर असलेल्या आरौ शाचेन रेसकोर्स (Aarau Schachen Racecourse) संकुलात घडला. शनिवार आणि रविवारी मध्यरात्रीच्या दरम्यान या रेसकोर्सवर ‘Aarau Rave Vol. 7’ या लोकप्रिय टेक्नो म्युझिक आणि डान्स फेस्टिव्हलचे आयोजन करण्यात आले होते. या रंगतदार कार्यक्रमासाठी तब्बल ३,५०० हून अधिक तरुण-तरुणी, संगीतप्रेमी आणि नागरिक एकत्र आले होते. संपूर्ण परिसर संगीताच्या तालावर आणि दिव्यांच्या लखलखाटात झगमगत असताना, पहाटे २:३० ते २:३५ च्या सुमारास अचानक एकामागोमाग एक गोळीबाराचे अनेक आवाज घुमले.
जागतिक घडामोडी संबंधित बातम्या वाचण्यासाठी येथे क्लिक करा : India Bhutan Railway: भारत आणि भूतान दरम्यान धावणार पहिली आंतरराष्ट्रीय ट्रेन; भारताच्या ₹4,000 कोटींच्या प्रकल्पाने चीन अस्वस्थ
प्रत्यक्षदर्शींनी दिलेल्या माहितीनुसार, जेव्हा गोळीबाराचा आवाज आला तेव्हा सुरुवातीला उपस्थितांनी पार्टीचा भाग म्हणून छतावर किंवा स्टेजजवळ होणारी फटाक्यांची आतषबाजी असावी असा अंदाज लावला. मात्र, काही क्षणांतच जेव्हा कोणीतरी जोराने “सर्वांनी खाली झुका!” (Everyone down!) अशी ओरड ठोकली, तेव्हा डान्स फ्लोअरवर उपस्थित असलेल्या लोकांच्या पायाखालची जमीनच सरकली. काही तरुण डीजे बूथच्या खाली तर काही जण वास्तूच्या आडोशाला जीव वाचवण्यासाठी लपले. परिस्थितीचे गांभीर्य लक्षात येताच हजारो लोकांची घटनास्थळावरून सुरक्षित स्थळी धावपळ सुरू झाली आणि काही वेळातच तेथे चेंगराचेंगरीसारखी भीतीदायक परिस्थिती निर्माण झाली.
घटनेची माहिती मिळताच अरगौ कॅन्टन पोलीस (Aargau Cantonal Police), आपत्कालीन रुग्णवाहिका, अग्निशामक दल आणि आपत्ती प्रतिसाद पथके (KKE) मोठ्या ताफ्यासह घटनास्थळी दाखल झाले. दुर्दैवाने, गोळी लागल्यामुळे २२ वर्षीय स्विझ तरुणी जागीच गतप्राण झाली होती. इतर पाच जखमींना तातडीने वैद्यकीय पथकांनी ताब्यात घेऊन जवळच्या विविध रुग्णालयांमध्ये दाखल केले. या जखमींवर अतिदक्षता विभागात उपचार सुरू असून काहींची प्रकृती चिंताजनक असल्याचे प्रशासनाकडून स्पष्ट करण्यात आले आहे.
जागतिक घडामोडी संबंधित बातम्या वाचण्यासाठी येथे क्लिक करा : Barron Trump बॅरन ट्रम्पला कुठे मारायचे? इराणच्या हिटलिस्टवर ट्रम्प यांचा मुलगा; 10 दशलक्ष डॉलर बक्षीस अन् 3D VIDEO
गोळीबार केल्यानंतर अंधाराचा फायदा घेऊन पसार झालेल्या अज्ञात हल्लेखोराचा शोध घेण्यासाठी स्वित्झर्लंड प्रशासनाने अत्यंत व्यापक मोहीम हाती घेतली आहे. संपूर्ण आरौ शहर आणि शाचेन परिसराला पोलिसांनी वेढा घातला असून फॉरेन्सिक तज्ज्ञ घटनास्थळावरून पुरावे गोळा करत आहेत. या मोहिमेत स्विस लष्कराचे ‘सुपर पुमा’ (Super Puma) हेलिकॉप्टर हवेतून पाळत ठेवण्यासाठी तैनात करण्यात आले आहे. याशिवाय, हल्लेखोर सीमा ओलांडून पळून जाऊ नये म्हणून जर्मनीच्या फ्रायबर्ग (Freiburg) येथील पोलीस यंत्रणेचीही या शोधकार्यात मदत घेतली जात आहे.
स्विस पोलिसांनी नागरिकांना सुरक्षेचा उपाय म्हणून आरौ शाचेन परिसरापासून दूर राहण्याचे आवाहन केले आहे आणि स्थानिक जलतरण तलाव व सार्वजनिक ठिकाणे बंद ठेवण्यात आली आहेत. सध्या या घटनेमागील नेमका हेतू काय होता व्यक्तिगत वैमनस्य, दहशतवादी कट की अचानक झालेला वाद – याबाबत पोलिसांकडून कोणताही अधिकृत दुजोरा देण्यात आलेला नाही. घटनेनंतर पोलिसांनी पार्टीत अडकलेल्या नागरिकांना आणि प्रत्यक्षदर्शींना सुरक्षिततेसाठी जवळच्या इनडोअर व्यायामशाळेत हलवले असून प्रत्येकाची चौकशी सुरू आहे. युरोपमधील एका अत्यंत शांत देशात घडलेल्या या रक्तरंजित घटनेमुळे संपूर्ण जगभरात खळबळ उडाली आहे.
