शनिवार, 17 ऑक्टोबर 2026
हिंडनबर्ग रिसर्चच्या अहवालावर अदानी समूहाची मोठी प्रतिक्रिया; म्हटले... हा तर नफा कमावण्याचा धंदा!
अमेरिकेची शॉर्ट सेलर फर्म हिंडनबर्ग रिसर्चने सिक्युरिटीज अँड एक्सचेंज बोर्ड ऑफ इंडिया अर्थात सेबीच्या अध्यक्ष माधवी पुरी बुच यांच्यावर गंभीर आरोप केले आहेत.अदानी घोटाळ्याशी संबंध असलेल्या कंपन्यांमध्ये त्यांची गुंतवणूक असल्याचा आरोप हिंडनबर्गने केला आहे. मात्र, माधवी पुरी यांनी हे आरोप फेटाळून लावले आहेत. सर्व आरोप बिनबुडाचे आणि नाराधार असल्याचे पुरी यांनी म्हटले आहे. अशातच आता या प्रकरणात आशियातील सर्वात श्रीमंत व्यक्ती गौतम अदानी यांच्या नेतृत्वाखालील अदानी समूहाकडून एक निवेदन जारी करण्यात आले आहे. यात हिंडनबर्ग रिसर्चने माधवी पुरी बुच यांच्यावर केलेले आरोप फेटाळण्यात आले आहे.
काय म्हटलंय अदानी समूहाने आपल्या अहवालात?
हिंडेनबर्ग रिसर्चकडून प्रसिद्ध करण्यात आलेल्या नवीन अहवालाबाबत अदानी समूहाकडून निवेदन जारी करण्यात आले आहे. या अहवालात करण्यात आलेले आरोप दुर्भावनापूर्ण असून, वस्तुस्थितीशी छेडछाड करून मांडण्यात आले आहे. अदानी समूह हिंडेनबर्गने केलेले हे सर्व आरोप फेटाळून लावत आहे. हे केवळ समूहाची बदनामी करण्यासाठीचे कारस्थान आहे. दरम्यान, यापूर्वी २०२३ मध्ये करण्यात आलेल्या सर्व आरोपांची सखोल चौकशी करण्यात आली असून, ते पूर्णपणे निराधार असल्याचे सिद्ध झाल्याचे अदानी समूहाच्या वतीने सांगण्यात आले आहे. २०२३ मधील आरोप सर्वोच्च न्यायालयाने जानेवारी 2024 मध्ये आधीच फेटाळले आहेत.
हेही वाचा : “माझे नाव घेऊ नका…”, हिंडनबर्ग रिसर्चच्या पोस्टनंतर समाजमाध्यमांवर मजेदार मीम्स व्हायरल!
हिंडेनबर्गच्या अहवालावर जारी केलेल्या निवेदनात, अदानी समूहाने पुनरुच्चार केला की, ‘आमची परदेशातील होल्डिंग संरचना पूर्णपणे पारदर्शक आहे, सर्व तथ्ये आणि तपशील अनेक सार्वजनिक दस्तऐवजांमध्ये नियमितपणे प्रदर्शित केले जातात.’ बदनामी करण्याच्या या हेतुपुरस्सर प्रयत्नात नमूद केलेल्या व्यक्ती किंवा बाबींशी अदानी समूहाचा कोणताही व्यावसायिक संबंध नाही.
अदानी समूहाची परदेशातील संरचना पूर्णपणे पारदर्शक आहे. यात समूहाने वेळोवेळी सर्व तथ्ये आणि तपशील सार्वजनिक दस्तावेजांमध्ये प्रसिद्ध देखील करण्यात आले आहेत. अदानी समूहाला जाणूनबुजून बदनाम करण्याचे हे कारस्थान आहे. हिंडेनबर्गच्या अहवालात उल्लेख करण्यात आलेल्या व्यक्तींचा अदानी समूहाशी कोणताही व्यावसायिक संबंध नाही. असेही अदानी समूहाने आपल्या जारी केलेल्या निवेदनात म्हटले आहे.
Adani Group issues a statement on the latest report from Hindenberg Research. The latest allegations by Hindenburg are malicious, mischievous and manipulative selections of publicly available information to arrive at pre-determined conclusions for personal profiteering with… pic.twitter.com/WwKbPLTkrv — ANI (@ANI) August 11, 2024
काय आरोप केलेत हिंडनबर्गने माधबी पुरी बुच यांच्यावर?
अमेरिकन शॉर्ट सेलर फर्म हिंडेनबर्गने प्रसिद्ध केलेल्या अहवालात अदानी समूह आणि सेबी प्रमुख माधबी पुरी बुच यांच्यात संबंध असल्याचा दावा केला आहे. व्हिसलब्लोअरकडून मिळालेल्या कागदपत्रांवरून अदानी मनी सिफनिंग स्कँडलमध्ये वापरल्या गेलेल्या ऑफशोर संस्था उघड झाल्या आहेत त्यात सेबी प्रमुख माधबी पुरी बुच वाटा होता. असे हिंडेनबर्गने म्हटले आहे. याशिवाय हिंडनबर्ग रिसर्चने माधवी पुरी आणि त्यांच्या पतीने मॉरिशस आणि बर्म्युडामधील ऑफशोअर फंडामध्ये गुंतवणूक केल्याचा आरोप देखील केला आहे.
हेही वाचा : भारतात लवकरच काहीतरी मोठे घडणार? हिंडेनबर्ग रिसर्चची एक पोस्ट, अन् चर्चांना उधाण!
काय आरोप केले होते हिंडेनबर्गने अदानी समूहावर?
मागील वर्षी 24 जानेवारी 2023 रोजी हिंडेनबर्ग रिसर्चने आशियातील दुसरे सर्वात श्रीमंत व्यक्ती गौतम अदानी यांच्या अदानी समूहावर एक अहवाल प्रसिद्ध केला होता. यामध्ये शेअर बाजारात सूचीबद्ध कंपन्यांच्या शेअर्समध्ये फेरफार करण्यापासून ते समूहावरील कर्जापर्यंत अनेक गंभीर आरोप करण्यात आले होते. हा अहवाल प्रसिद्ध झाल्यानंतर गौतम अदानी यांच्या संपत्तीत मोठी घसरण झाली होती. त्यांच्या कंपन्यांचे शेअर्स 85 टक्क्यांनी घसरले होते आणि गौतम अदानी यांची संपत्ती 60 अब्ज डॉलर्सनी कमी झाली होती.
