शनिवार, 17 ऑक्टोबर 2026
FD पेक्षा जास्त परतावा देणाऱ्या या ४ सरकारी योजना देतात सुरक्षित गुंतवणूक (फोटो-सोशल मीडिया)
Safe Investment Plans: भारतीय गुंतवणूकदार नेहमीच त्यांचे पैसे सुरक्षित राहावे आणि चांगला परतावा मिळवा यासाठी असे पर्याय शोधत असतात. जर तुम्हाला एकरकमी गुंतवणूक करायची असेल परंतु, तुम्हाला फिक्स्ड डिपॉझिट (एफडी) पेक्षा अधिक सुरक्षित आणि मजबूत व्याजदर मिळवायचे असतील, तर तुम्ही सरकारच्या या ४ योजनामध्ये पैसे गुंतवू शकतात. हे चार पर्याय केवळ सुरक्षिततेची हमी देत नाहीत तर एफडीपेक्षा चांगले व्याजदर देखील देतात.
ग्राहकांसाठी गुंतवणूक करताना सुरक्षा आणि परतावा या दोन सर्वात महत्त्वाच्या गोष्टी असतात. फिक्स्ड डिपॉझिट नेहमीच सुरक्षित मानले गेले असले तरीही सरकारी योजनांमध्ये गुंतवणूक करण्याचा सर्वात मोठा फायदा म्हणजे ते फिक्स्ड डिपॉझिटपेक्षा चांगले व्याजदर मिळते. तसेच, या सरकारी योजना कर लाभ देखील देतात. या योजना तुमच्या पैशांना दीर्घकाळ वाढण्यास मदत करतात आणि बाजारातील चढउतारांपासून अप्रभावित राहतात.
सार्वजनिक भविष्य निर्वाह निधी (PPF)
गुंतवणूकदारांसाठी दीर्घकालीन सुरक्षित गुंतवणूक म्हणून सार्वजनिक भविष्य निर्वाह निधी (PPF) हा एक उत्तम पर्याय आहे. या योजनेचा व्याजदर ७.१% असून त्याची परिपक्वता कालावधी १५ वर्षे आहे. PPF चा सर्वात मोठा फायदा म्हणजे त्याची ठेवीची रक्कम, मिळालेले व्याज आणि संपूर्ण परिपक्वता रक्कम पूर्णपणे करमुक्त आहे.
ज्येष्ठ नागरिक बचत योजना (SCSS)
सरकारने ही योजना विशेषतः ६० वर्षे किंवा त्याहून अधिक वयाच्या ज्येष्ठ नागरिकांसाठी तयार करण्यात आली आहे जेणेकरून त्यांना निवृत्तीनंतर नियमित आणि सुरक्षित उत्पन्न मिळेल. या योजनेचा व्याजदर ८.२% चा असून त्याचा प्रारंभिक कालावधी ५ वर्षे आहे, जो पुढे वाढवता येतो. या योजनेत गुंतवणूक केल्याने आयकर कायद्याच्या कलम ८०C अंतर्गत कर लाभ देखील मिळतो.
पोस्ट ऑफिस टाईम डिपॉझिट (POTD)
पोस्ट ऑफिस टाईम डिपॉझिट हे बँक फिक्स्ड डिपॉझिट प्रमाणेच काम करते, परंतु ते पोस्ट ऑफिसमध्ये असल्याने, ते अधिक सुरक्षित मानले जाते आणि त्याचे व्याजदर अनेकदा बँकांपेक्षा थोडे चांगले असतात. हे १, २, ३ आणि ५ वर्षांच्या कालावधीत उपलब्ध असून व्याजदर कालावधीनुसार बदलतात, परंतु ते आकर्षक असतात. या योजनेत ५ वर्षांचा पर्याय कर लाभ देखील देतो.
सुकन्या समृद्धी योजना (SSY)
ही योजना भारत सरकारने मुलींचे भविष्य सुरक्षित करण्यासाठी सुरू केली होती. ती पालकांना त्यांच्या मुलीच्या शिक्षण आणि लग्नासाठी एक मोठा निधी उभारण्यास मदत करते. ही योजना सुमारे ८.२% चा उत्कृष्ट व्याजदर देत असून २१ वर्षांचा कालावधी आहे. PPF प्रमाणे, ही योजना करमुक्त आहे. गुंतवणूक, व्याज आणि परिपक्वता रकमेवर कोणताही कर नाही.
या चार सरकारी योजना तुमच्या गुंतवणुकीच्या सुरक्षिततेची हमी देतातच, शिवाय मुदत ठेवींपेक्षा चांगले व्याजदर आणि कर सवलती देखील देतात. तुमच्या गरजा आणि कालावधीनुसार यापैकी कोणताही पर्याय निवडून तुम्ही तुमचे पैसे सुरक्षितपणे वाढवू शकता.
