सोमवार, 19 ऑक्टोबर 2026
(फोटो सौजन्य: सोशल मीडिया)
टाटा मोटर्सच्या मालकीची लक्झरी कार कंपनी जग्वार लँड रोव्हर JLR ऐच्छिक नोकरकपात सुरू करत आहे. याचा परिणाम सुमारे ४,००० कर्मचाऱ्यांच्या नोकऱ्या कमी होऊ शकतात, असे वृत्त ब्रिटिश माध्यमांनी शनिवारी सांगितलं. ‘द टाइम्स’च्या वृत्तानुसार, ही लक्झरी कार कंपनी सोमवारी याबाबत औपचारिक घोषणा करण्याची शक्यता आहे.
युकेमधील ‘द टाइम्स’ या वृत्तपत्रातील एका अहवालानुसार, कर्मचारी कपातीची ही योजना JLR च्या अंदाजे १.७ अब्ज युरो म्हणजेच २१,७०० कोटी रुपये वाचवण्याच्या प्रयत्नांचा एक भाग आहे. कंपनीचा उद्देश आपले व्यवसाय मॉडेल सोपं करणे आणि आपला ब्रेक-इव्हन पॉइंट म्हणजे ज्या टप्प्यावर खर्च आणि महसूल समान होतात अशा परिस्थितीत वार्षिक ३,००,००० वाहनांपर्यंत कमी करणे हा देखील उद्देश आहे. याचा अर्थ असा की, कंपनी आता कमी वाहने विकूनही नफा मिळवण्याची योजना आखत आहे.
JLR चे यूकेमध्ये ३३,००० हून अधिक प्रत्यक्ष कर्मचारी आहेत आणि सप्लाई चेनद्वारे आणखी १,२०,००० लोकांना रोजगार दिला जातो. कंपनीने स्पष्ट केले आहे की, या कर्मचारी कपातीचा कारखान्यांमधील तासावर काम करणाऱ्या असेंब्ली लाईन कामगारांवर परिणाम होणार नाही. अधिक सुटसुटीत आणि लवचिक व्यवस्थापनावर लक्ष केंद्रित करणं हा कंपनीचा फोकस आहे. यामुळे पगार आणि कार्यालयीन देखभाल यांसारखे वार्षिक खर्च देखील कमी होणार आहे. त्यामुळे, जागतिक मंदी किंवा अमेरिकेच्या टॅरिफमुळे त्यांच्या वाहनांची मागणी कमी झाली तरी, कंपनी वर्षाला कमी वाहने विकून आपला खर्च वसूल करेल.
२९% बाजारपेठेतील हिस्सेदारीसह अमेरिका ही JLR ची सर्वात मोठी जागतिक बाजारपेठ आहे. अमेरिकेचे अध्यक्ष डोनाल्ड ट्रम्प यांनी ब्रिटिश बनावटीच्या प्रवासी वाहनांच्या आयातीवर १०% नवीन आयात शुल्काची घोषणा केल्याने JLR च्या नफ्यावर आणि विक्रीवर थेट परिणाम झाला आहे. अमेरिका आणि यूके यांच्यातील करारानुसार, दरवर्षी पहिल्या १,००,००० वाहनांवर १०% सवलतीचे शुल्क लागू आहे. मात्र, एकदा हा कोटा ओलांडला की, ब्रिटिश गाड्यांवर २७.५% चा मोठा कर लादला जातो, ज्यामुळे निर्यात आव्हानात्मक बनते.
शिवाय, JLR च्या सर्वात लोकप्रिय एसयूव्हींपैकी एक, डिफेंडर, स्लोव्हाकियामध्ये म्हणजेच युरोपमध्ये तयार केली जाते. मात्र, तो देश युरोपियन युनियनचा भाग नसल्यामुळे, या मॉडेलला अमेरिका-यूके कराराच्या १०% सवलतीच्या कोट्याचा लाभ मिळत नाही, ज्यामुळे कंपनीसमोरील आव्हाने आणखी वाढतात.
