शनिवार, 17 ऑक्टोबर 2026
फोटो सौजन्य- सोशल मीडिया
ABVP Campaign: देशातील लोकशाही व्यवस्था, भारतीय संविधानाची मूल्ये आणि राष्ट्रीय एकात्मता यांचे रक्षण करण्याच्या महत्त्वपूर्ण उद्देशाने अखिल भारतीय विद्यार्थी परिषदने (अभाविप) मुंबई विद्यापीठाच्या कलिना कॅम्पस येथील मुख्य प्रवेशद्वाराजवळ ‘अराजकता रोको – लोकतंत्र बचाओ! या घोषवाक्याखाली भव्य स्वाक्षरी अभियान व शांततापूर्ण निदर्शने शुक्रवारी करण्यात आली.
सध्या देशात काही प्रवृत्तींकडून जाणीवपूर्वक अराजकता निर्माण करण्याचे प्रयत्न होत असून त्यांना मिळणारे संभाव्य बाह्य समर्थन अत्यंत चिंताजनक आहे. भारतविरोधी शक्ती विविध संघटनांच्या माध्यमातून देशात अस्थिरता पसरवण्याचा प्रयत्न करत आहेत, असा गंभीर आरोप आयोजकांनी केला आहे.
या पार्श्वभूमीवर, राष्ट्रीय हित, लोकशाही मूल्ये आणि देशाची एकात्मता अबाधित राखण्यासाठी जनतेमध्ये जनजागृती करणे अत्यंत गरजेचे असल्याचे अभाविपने म्हटले आहे.
लोकशाही ही केवळ एक शासनप्रणाली नसून स्वातंत्र्य, समानता, न्याय आणि बंधुता या मूल्यांवर आधारित आपल्या संविधानाचा आत्मा आहे. लोकशाही संस्थांवरील जनतेचा विश्वास कायम राहावा, कायद्याचे राज्य चोखपणे चालावे आणि कोणत्याही हिंसक किंवा बेकायदेशीर मार्गांना थारा मिळू नये, यासाठी समाजातील सर्व घटकांनी एकत्र येऊन सजग राहण्याची गरज आहे, यावर या अभियानादरम्यान भर देण्यात आले असल्याचे सांगण्यात आले.
Top IIIT Colleges : भारतातील ‘या’ ५ टॉप IIIT महाविद्यालयांमध्ये कसा मिळवाल प्रवेश? जाणून घ्या
याच भूमिकेतून शुक्रवारी राबविण्यात आलेल्या या स्वाक्षरी अभियानाला विद्यार्थी, तरुण वर्ग आणि जागरूक नागरिकांचा व्यापक प्रतिसाद लाभला असल्याचे अभाविपने म्हटले आहे.
लोकशाहीच्या समर्थनात नागरिकांनी मोठ्या संख्येने आपली स्वाक्षरी नोंदवली. तसेच, शांततापूर्ण निदर्शनांच्या माध्यमातून लोकशाहीचे संरक्षण, संविधानाचा सन्मान आणि राष्ट्रीय एकात्मतेचा संदेश जनमानसात पोहोचविण्यात आला असल्याचे सांगण्यात आले.
देशातील सर्व विद्यार्थी व युवकांनी लोकशाही मूल्यांच्या रक्षणासाठी नेहमीच पुढे यावे, संविधानिक मार्गाने आपली भूमिका स्पष्ट करावी आणि एका सशक्त, शांततापूर्ण व न्याय्य समाजाच्या निर्मितीसाठी सदैव कटिबद्ध राहावे, असे आवाहन या अभियानानंतर अखिल भारतीय विद्यार्थी परिषदेतर्फे करण्यात आले आहे.
Ans: ABVP च्या वतीने मुंबई विद्यापीठाच्या कलिना कॅम्पसमध्ये ‘अराजकता रोको – लोकतंत्र बचाओ!’ या घोषवाक्याखाली स्वाक्षरी अभियान व शांततापूर्ण निदर्शने करण्यात आली.
Ans: हे आंदोलन मुंबई विद्यापीठाच्या कलिना कॅम्पस येथील मुख्य प्रवेशद्वाराजवळ पार पडले.
