रविवार, 18 ऑक्टोबर 2026
संग्रहित फोटो
सुरज ठोंबरे नाना पेठेत लहानाचा मोठा झाला. शालेय शिक्षण घेत असतानाच त्याची सोमनाथ गायकवाडशी मैत्री झालेली. या मैत्रीनंतर सुरजला शिक्षणासाठी सोमनाथने आर्थिक मदत केली. दोघेही लहानपणापासूनचे मित्र. दहावीपर्यंत शिक्षण घेतल्यानंतर सुरजने देखील शिक्षण सोडले. सोमनाथसोबतच स्वराज वाडेकर आणि तुषार वाडेकर हे बंडू आंदेकरचे भाच्चे व टोळीचे सक्रिय सदस्य सुरजचे मित्र. मित्र परिवार जमा केल्याने सुरज अधून-मधून सोमनाथकडे मुल घेऊन जात असत. पण, ही गोष्ट आंदेकर टोळीच्या डोळ्यात खुपत होती. तशी पहिल्यापासून सुरजकडे मित्र मंडळी मोठी होती.
वादाची पहिली ठिंणगी
सुरज ठोंबरेचा मित्र रूपेश कदम याला आंदेकर टोळीतील ओंमकार साळुंखे व इतरांनी किरकोळ कारणावरून मारहाण केली. ही मारहाण सुरज ठोंबरेला सहन झाली नाही. त्याने लागलीच वर्षभरात २०१८ मध्ये ओंमकार साळुंखे याच्यावर हल्ला केला आणि त्याच्या खूनाचा प्रयत्न केला. त्यापुर्वी आंदेकर टोळीतील मुनाफ पठाण व इतरांनी ठोंबरेचा मित्र आकाश सासवड उर्फ स्काय याच्यावर हल्ला केला. त्यामध्ये त्याचा अंगठा तुटला होता. या सर्वातून सुरज व आंदेकर टोळीत खटके उडू लागले आणि सुरज ठोंबरे वेगळा झाला.
मुलं उभे राहिले नाहीत
गुन्हेगारी विश्वात देखील भाई आल्यानंतर उठून उभे राहणे आणि पाया पडण्याची रित आहे. त्यानूसार, एका कार्यक्रमासाठी नाना पेठेतील एका भागात बंडू आंदेकरसह काहीजन उद्घाटन करण्यासाठी आले होते. ते येण्यापुर्वी सुरज ठोंबरेचे मित्र काही बसलेले होते. पण, ते बंडू आंदेकर आल्यानंतर उठले नाही. परंतु, त्याचवेळी सुरज ठोंबरे येताच सर्वजन उठून उभा राहिले. या गोष्टीचा आंदेकर गँगला मोठा राग आला. कृष्णा आणि वाडेकर बंधूनी यावरून वाद घालत या मुलाशी भांडण देखील केले. हे वाद झाल्यानंतर सुरज ठोंबरेने आंदेकर टोळीतील अक्षय आकोलकर याला हाताने मारहाण केली.
आंदेकर व ठोंबरेत वर्चस्वाला सुरूवात
सातत्याने होणारे किरकोळ वाद. मुलांमधील भांडण, सुरज ठोंबरेचे वाढत चाललेले वजन यावरून आंदेकर व ठोंबरेत दुश्मनी वाढत गेली. त्यात सुरज ठोंबरेकडून त्याच्या मित्रांशी कृष्णा व वाडेकर बंधूनी केलेल्या वादातून अक्षय याला भर चौकात केलेली मारहाण यामुळे दोन्ही टोळ्या स्वतंत्र झाल्या आणि दोन्ही टोळ्यात वर्चस्वाला सुरूवात झाली. हा काळ होता, २०१९-२० चा.
सुरज ठोंबरे व गायकवड टोळीचे मिलन
आंदेकर टोळीचे सुरज ठोंबरेसोबतच दुसरीकडे गायकवाड याच्याशी देखील वादविवाद सुरू होते. तो देखील वेगळा झाला होता. या गोष्टीनंतर आंदेकरशी पंगा घेण्यासाठी जुने मित्र असलेले सुरज ठोंबरे व सोमनाथ गायकवाड हे एकत्र झाले. दोघे एकत्र झाल्याने आपसूकच त्यांची ताकद देखील वाढली. त्यांनी डोके तालीम परिसरातच आंदेकर टोळीतील आदित्य उकिरंडे याच्यावर हल्ला करत त्याच्या खूनाचा प्रयत्न केला. याप्रकरणात गुन्हा दाखल होऊन सुरज ठोंबरे टोळीवर मोक्का कारवाई केली.
आंदेकर टोळीकडून बदल्यातून गोळीबार
टोळीतील सदस्यावर झालेल्या हल्यानंतर आंदेकर टोळीकडून त्याच दिवशी रात्री फरार असलेल्या ठोंबरेचा ठावठिकाणाचा शोध घेत कोंढवा परिसर गाठला. सुरज ठोंबरे समजून त्यांनी गोळीबार देखील केला. पण, विघ्नेश गोरे हा तरुण गोळीबाराच्या समोर आला. थोडक्यात तो बचावला गेला होता. याप्रकरणात कृष्णा व इतरांवर गुन्हा नोंदवून मोक्का कारवाई केली गेली.
सुरज ठोंबरे जामीनावर बाहेर
आदित्य उकिरंडे याच्या खूनाच्या प्रयत्नात कारागृहात असलेला सुरज ठोंबरे २०२१ मध्ये कारागृहातून जामीनावर बाहेर आला. पण, न्यायालयाने त्याला पुण्यात येण्यास मनाई केली. तेव्हापासून सुरज ठोंबरे हा पुण्याच्या बाहेर राहून टोळीच्या संपर्कात आहे.
पुण्यात आगमन ते थेट संघटनेत प्रवेश
पुण्याच्या बाहेर राहून देखील पुण्यावर लक्ष ठेवणाऱ्या सुरज ठोंबरे याचे गेल्या काही वर्षात मध्यभागात मोठे वर्चस्व निर्माण झाले आहे. शेकडो मुलांच्या संपर्कात असलेला सुरज ठोंबरने डेक्कन परिसरातील एका संघटनेच्या कार्यक्रमात हजेरी लावली. ही हजेरी नव्हती, तर संघटनेत प्रवेश आणि शक्तीप्रदर्शन होते. पण, त्यापुर्वीच पोलिसांना याची भनक लागली आणि सुरज ठोंबरे याला तेथून काढता पाय घ्यावा लागला. हा क्षण देखील एखाद्या चित्रपटाला शोभावा असा घडल्याचे काहीजन सांगतात. शेकडो मुले घेऊन सुरज ठोंबरे या कार्यक्रमाला आला होता.
सुरज ठोंबरे आणि सोमनाथ गायकवाड
सुरज ठोंबरेच्या टोळीत पोलिसांच्या नोंदीत २३ जण सक्रिय आहेत. ही सर्व मुल २५ च्या आतील आहेत. दुसरीकडे गायकवाड याच्या टोळीत मध्यभागातील तसेच आंबेगाव पठारावरची मुल आहेत. ते देखील २५ च्या आतील आहेत. टोळीत सहभागी झालेले अनेक मुलांची नावे देखील पोलिसांच्या नोंदीत नाहीत. एखादा गुन्हा घडल्यानंतरच पोलिसांना ही मुले यांच्या टोळीत सक्रिय असल्याचे स्पष्ट होत असल्याने पोलिसांना देखील अनेक अडचणींना सामोरे जावे लागत असल्याचे वास्तव आहे.
