धक्कादायक ! जन्मदात्या आईनेच केली मुलाची हत्या; अनैतिक संबंधास आड येत असल्याने काढला काटा (संग्रहित फोटो)
हिंगोली : जिच्या कुशीत जन्म घेतला, जिच्या मायेच्या सावलीत वाढला, त्याच लेकरासाठी आईच वैरीण ठरावी, अशी संतापजनक आणि काळजाचा ठोका चुकवणारी घटना सेनगाव तालुक्यात उघडकीस आली आहे. अनैतिक संबंधास आड येणाऱ्या स्वतःच्या मुलाचा काटा काढण्यासाठी मातेनेच कट रचल्याचा धक्कादायक प्रकार समोर आला आहे.
सचिन रामकिशन राजगुरू (वय २८, रा. वढव, ता. लोणार, जि. बुलडाणा) असे मयताचे नाव असून, याप्रकरणी आई ललिताबाई राजगुरू (वय ५५), प्रियकर रामदास तनपुरे (वय ६५) आणि साथीदार नरेश पवार (सर्व रा. वढव) या तिघांना पोलिसांनी ताब्यात घेतले आहे. पोलिसांच्या माहितीनुसार, सेनगाव तालुक्यातील जामदया शिवारात ८ एप्रिल रोजी नाल्यात सापडलेल्या अज्ञात मृतदेहाने परिसर हादरला होता. डोक्यात दगड मारून निर्घृण खून केल्याचे स्पष्ट होताच पोलिसांनी तपासाची सूत्रे हाती घेतली.
दरम्यान, सोशल मीडियाच्या आधारे मृताची ओळख पटली असून, सचिन असे नाव आहे. चौकशीत उघड झालेले सत्य अंगावर काटा आणणारे होते. सचिनची आई ललिताबाई हिचे रामदास याच्यासोबत अनैतिक संबंध होते.
48 तासांत खुनाचा उलगडा
जामदया येथील खून प्रकरणाचा अवघ्या ४८ तासांत उलगडा करण्यात पोलिसांना यश आले. या संदर्भात पोलिस अधीक्षक डॉ. निलाभ रोहन यांनी पत्रकार परिषदेत माहिती दिली. तपास पथकाने जलद आणि अचूक कामगिरी केल्यामुळे संबंधित तपास अधिकाऱ्यांचा सत्कार करण्यात येणार असल्याचेही त्यांनी सांगितले.
डोक्यात दगड घालून खून; मृतदेह फेकला नाल्यात
मुलगा सचिनचा ललिताबाई आणि रामदास यांच्या या अनैतिक संबंधाला विरोध करत असल्याने तोच त्यांच्या डोळ्यांतील काटा बनला. अखेर त्याचा कायमचा बंदोबस्त करण्याचा कट आरोपींकडून रचण्यात आला. कटानुसार सचिनला पाहुण्यांकडे जाण्याचे आमिष दाखवून सोबत नेण्यात आले. साखरा येथे त्याला दारू पाजून बेसावध केले आणि जामदया शिवारात नेऊन डोक्यात दगड घालून त्याचा निर्दयी खून करण्यात आला. गुन्हा लपविण्यासाठी मृतदेह नाल्यात फेकण्यात आला.
तिघांना पोलिसांनी घेतले ताब्यात
कटात सहभागी असलेल्या सदर तिघांना पोलिसांनी ताब्यात घेतले असून, आईच्या मायेचे रूप घेऊनच मृत्यू देणारी ही ‘वैरीण’ माणुसकीलाच काळिमा फासणारी ठरली असून या घटनेने संपूर्ण समाज सुन्न झाला आहे.
चोरीचा माल घेणाऱ्या भंगार व्यवसायिकासह तिघांना ठोकल्या बेड्या; बारामती पोलिसांची मोठी कारवाई
