मंगळवार, 13 ऑक्टोबर 2026
(फोटो सौजन्य- सोशल मीडिया)
Hema Malini: बॉलिवूडच्या ज्येष्ठ अभिनेत्री हेमा मालिनी सध्या त्यांच्या एका खास डान्स व्हिडीओमुळे चर्चेत आल्या आहेत. वयाच्या ७७व्या वर्षीही त्यांनी आपल्या नृत्यकलेची मोहिनी कायम ठेवली आहे. नवरात्रीच्या पहिल्या दिवशी हेमा मालिनी यांनी तेलंगणातील हैदराबाद येथे ‘दुर्गा’ हा त्यांचा प्रसिद्ध नृत्याविष्कार सादर केला. त्यांच्या या सादरीकरणाची झलक त्यांनी सोशल मीडियावर शेअर केली असून, चाहत्यांकडून त्यांच्यावर कौतुकाचा वर्षाव होत आहे.
हेमा मालिनी यांनी क्लासिक कन्व्हेन्शन सेंटरमध्ये ‘दुर्गा’ हा प्रसिद्ध बॅले सादर केला. तेलंगणातील अग्रवाल समाजाच्या आग्रा दांडिया नवरात्री उत्सवाचा हा एक भाग होता. विशेष म्हणजे, याच दिवशी महाराजा अग्रसेन जयंतीही साजरी करण्यात आली. नवरात्रीच्या पहिल्या दिवशी आपला हा प्रसिद्ध नृत्याविष्कार सादर करण्याची संधी मिळाल्याने आपण आनंदी आणि धन्य असल्याची भावना हेमा मालिनी यांनी व्यक्त केली.
हेमा मालिनी यांनी सोशल मीडियावर शेअर केलेल्या फोटोंमध्ये त्या देवी पार्वतीच्या भूमिकेत दिसत आहेत, तर एका कलाकाराने भगवान शिवाची भूमिका साकारली आहे. त्यांच्या या पारंपरिक आणि भक्तिमय रूपाने चाहत्यांचे लक्ष वेधून घेतले आहे.
“हा माझ्यासाठी खूप सुंदर आणि विशेष अनुभव होता”
आपल्या सादरीकरणाविषयी माहिती देताना हेमा मालिनी यांनी सोशल मीडियावर लिहिले की, तेलंगणातील अग्रवाल समाजाच्या नवरात्री उत्सवासाठी क्लासिक कन्व्हेन्शन सेंटरमध्ये सादरीकरण करणे हा आनंदाचा अनुभव होता. त्याच दिवशी महाराजा अग्रसेन जयंती असल्याने हा प्रसंग आणखी खास ठरला. नवरात्रीच्या पहिल्या दिवशी आपला प्रसिद्ध ‘दुर्गा’ बॅले सादर करता आला, याचा आनंद आणि समाधान असल्याचेही त्यांनी सांगितले.
यासोबतच त्यांनी आपल्या सादरीकरणाचा व्हिडीओ शेअर करत चाहत्यांना नवरात्री आणि दुर्गापूजेच्या शुभेच्छाही दिल्या. त्यांच्या नृत्यातून देवीच्या शक्तीचे आणि भक्तिभावाचे दर्शन घडल्याची भावना अनेकांनी व्यक्त केली.
View this post on Instagram
हेमा मालिनी यांचा व्हिडीओ सोशल मीडियावर शेअर झाल्यानंतर अनेक चाहत्यांनी त्यांच्या सादरीकरणाचे कौतुक केले. एका चाहत्याने हैदराबादमधील क्लासिक कन्व्हेन्शन सेंटरमध्ये त्यांना पाहून आनंद झाल्याचे म्हटले. तर दुसऱ्या एका चाहत्याने त्यांचे सादरीकरण ‘सुंदर आणि दिव्य’ असल्याची प्रतिक्रिया दिली. आणखी एका चाहत्याने हैदराबादमध्ये येऊन इतके सुंदर सादरीकरण केल्याबद्दल त्यांचे आभार मानले.
हेमा मालिनी या अभिनेत्री असण्यासोबतच एक उत्कृष्ट शास्त्रीय नृत्यांगना म्हणूनही ओळखल्या जातात. आपल्या नृत्याविष्कारातून भारतीय संस्कृती आणि पौराणिक कथांचे दर्शन घडवण्याची त्यांची परंपरा आजही कायम आहे. वयाच्या ७७व्या वर्षीही त्यांचा उत्साह आणि नृत्याप्रती असलेली निष्ठा पाहून चाहते प्रभावित झाले आहेत.
