गुरुवार, 22 ऑक्टोबर 2026
(फोटो सौजन्य- सोशल मीडिया)
Maitreya Marathi Movie: मराठी अभिनेत्री क्रांती रेडकर लवकरच मैत्रीच्या अनोख्या दुनियेची सफर घडवणार आहे. नुकतच तिच्या ‘मैत्रेया’ या आगामी मराठी चित्रपटाचं टायटल साँग नुकतंच प्रेक्षकांच्या भेटीला आलं आहे. मस्ती, मैत्री आणि प्रेमाच्या विविध रंगांनी सजलेल्या या गाण्याला सिद्धांत भोसले आणि क्रांती रेडकर यांच्या आवाजाची साथ लाभली आहे. विशेष म्हणजे, या गाण्याच्या निमित्ताने क्रांती रेडकरने पहिल्यांदाच रॅप लिहिलं असून ते गायलंही आहे.
मित्र-मैत्रिणींसोबतच्या बेधुंद क्षणांपासून प्रेमाच्या हळुवार भावनांपर्यंतचा प्रवास या गाण्यातून अनुभवायला मिळतो. मैत्रीतील मोकळेपणा, एकत्र असण्याचा आनंद आणि नात्यांमधून फुलणारा जिव्हाळा यांची सुंदर गुंफण गाण्यात पाहायला मिळते. मित्रांसोबत केलेली मजा, एकमेकांची चेष्टामस्करी आणि प्रत्येक प्रसंगात एकमेकांच्या पाठीशी उभं राहण्याची भावना या गाण्यातून प्रभावीपणे व्यक्त होते. त्याचबरोबर मैत्रीच्या नात्यात नकळत फुलणारं प्रेम आणि एकत्र घालवलेल्या क्षणांतून तयार होणाऱ्या आठवणी गाण्याला वेगळीच रंगत आणतात.
‘मैत्रेया’च्या टायटल साँगचं आणखी एक खास वैशिष्ट्य म्हणजे क्रांती रेडकरने पहिल्यांदाच रॅप लिहिण्याचा आणि गाण्याचा अनुभव घेतला आहे. सिद्धांत भोसले आणि क्रांती रेडकर यांच्या आवाजाने सजलेल्या या गाण्याचे बोल ओंकार मंगेश दत्त यांचे असून, पंकज पडघण यांनी संगीत दिलं आहे. शब्द, संगीत आणि आवाज यांचा सुरेख मेळ साधणारं हे गाणं मैत्रीच्या विश्वातील उत्साह आणि प्रेमाच्या हळुवार भावना एकत्र आणतं.
संगीतकार पंकज पडघण यांनी गाण्याच्या निर्मितीविषयी सांगितलं, “मैत्रीच्या नात्यात एक वेगळीच ऊर्जा आणि सहजता असते. मित्रांसोबतची धमाल, मस्ती, एकमेकांची चेष्टा आणि या सगळ्यातून निर्माण होणारा जिव्हाळा हे अनुभव प्रत्येकाच्या आयुष्याचा भाग असतात. ‘मैत्रेया’च्या टायटल साँगमधून मैत्रीचा हाच उत्साह आणि तरुणाईचा आनंद संगीताच्या माध्यमातून व्यक्त करण्याचा प्रयत्न केला आहे. गाण्याचे शब्द आणि त्यातील भावना यांना साजेसं संगीत देताना त्यातला खेळकरपणा आणि भावनिक ओलावा जपण्यावर भर दिला. हे गाणं ऐकताना प्रेक्षकांना आपल्या मित्रांसोबतच्या आठवणी पुन्हा अनुभवता येतील, अशी आशा आहे.”
मैत्री आणि प्रेमाच्या नात्यांची भावनिक गुंफण
लेखिका-दिग्दर्शिका क्रांती रेडकर वानखेडे म्हणाली, “मैत्री आणि प्रेम ही आयुष्यातील अशी नाती आहेत, जी आपल्या जगण्यात आनंदाचे अनेक रंग भरतात. मित्रांसोबत केलेली धमाल, एकमेकांना चिडवणं, एकत्र घालवलेले क्षण आणि नकळत निर्माण होणारी भावनिक जवळीक या सगळ्याच गोष्टी खास असतात. ‘मैत्रेया’च्या टायटल साँगमधून मैत्रीची ही अनोखी दुनिया आणि त्यातील निरागस आनंद प्रेक्षकांपर्यंत पोहोचवण्याचा प्रयत्न केला आहे.”
चित्रपटाचे निर्माते मनोज खळतकर यांनीही गाण्यातून मैत्रीच्या आठवणींना उजाळा देण्याचा प्रयत्न केल्याचं सांगितलं. ते म्हणतात, “मित्रांसोबतच्या आठवणी या प्रत्येकाच्या आयुष्यातील अनमोल ठेवा असतात. कधी हसवणारे, कधी भावूक करणारे, तर कधी आयुष्यभर चेहऱ्यावर हसू आणणारे हे क्षण आपल्या नात्यांना अधिक घट्ट करतात. ‘मैत्रेया’च्या टायटल साँगमधून मैत्री, प्रेम आणि तरुणाईच्या उत्साही जगण्याचं प्रतिबिंब दाखवण्याचा प्रयत्न केला आहे. हे गाणं पाहताना प्रेक्षकांना आपल्या मित्रांची आणि त्यांच्यासोबतच्या अविस्मरणीय क्षणांची नक्कीच आठवण होईल.”
समर टाईम्स प्रॉडक्शन निर्मित ‘मैत्रेया’ या चित्रपटाचं लेखन आणि दिग्दर्शन क्रांती रेडकर वानखेडे यांनी केलं आहे. मनोज खळतकर चित्रपटाचे निर्माते असून, अमन खळतकर सहनिर्माते आहेत. चित्रपटात समर, आयुषी, स्काय आणि रुची यांच्या प्रमुख भूमिका आहेत.
