सोमवार, 19 ऑक्टोबर 2026
(फोटो सौजन्य- सोशल मीडिया)
Paach Futacha Bachchan: आंदोलने आणि नवरात्रोत्सवाच्या धामधुमीमुळे सुरुवातीला संथ प्रतिसाद मिळालेल्या ‘पाच फुटाचा बच्चन’ या मराठी चित्रपटाने दुसऱ्या आठवड्यात जोरदार मुसंडी मारली आहे. महाराष्ट्राच्या कानाकोपऱ्यात या चित्रपटाची चर्चा सुरू असून, प्रेक्षक चित्रपटगृहांकडे वळू लागले आहेत. विशेषतः पश्चिम महाराष्ट्रातील पुणे, सोलापूर, पंढरपूर, कोल्हापूर, सांगली, नाशिक आणि नगर येथे चित्रपटाला प्रतिसाद मिळत असल्याचे सांगितले जात आहे. आता येत्या आठवड्यात हा चित्रपट अमेरिकेतही प्रदर्शित होणार असून, मराठी चित्रपटाची वाटचाल आंतरराष्ट्रीय स्तरावर सुरू होणार आहे.
आपल्या वेगळ्या नावामुळे सुरुवातीपासूनच चर्चेत असलेला ‘पाच फुटाचा बच्चन’ हा चित्रपट ९ ऑक्टोबर रोजी प्रेक्षकांच्या भेटीला आला. प्रदर्शनापूर्वी अभिनेता रितेश देशमुख यांच्या हस्ते चित्रपटाचा ट्रेलर दिमाखात प्रदर्शित करण्यात आला होता. या कार्यक्रमाचीही मनोरंजनविश्वात चर्चा झाली होती.
मात्र, सीजेपीचे आंदोलन, एमपीएससीच्या विद्यार्थ्यांचे आंदोलन आणि नवरात्रोत्सवाची धामधूम यांमुळे सुरुवातीला चित्रपटाला अपेक्षित प्रतिसाद मिळाला नाही. आता दुसऱ्या आठवड्यात चित्रपटाबद्दलची चर्चा वाढू लागली असून, प्रेक्षकांकडूनही त्याला प्रतिसाद मिळत असल्याचे चित्र आहे.
महाराष्ट्रातील विविध शहरांमध्ये चित्रपटाची चर्चा सुरू असतानाच, येत्या आठवड्यात ‘पाच फुटाचा बच्चन’ अमेरिकेत प्रदर्शित होणार आहे. त्यामुळे मराठी मातीतील कथा आणि संस्कृतीचा सुगंध परदेशातील प्रेक्षकांपर्यंत पोहोचणार आहे. या प्रदर्शनामुळे चित्रपटाच्या प्रवासाला नवे वळण मिळण्याची अपेक्षा व्यक्त केली जात आहे.
महिला कीर्तनकाराची कथा ठरतेय लक्षवेधी
एका महिला कीर्तनकाराची व्यक्तिरेखा या चित्रपटाच्या केंद्रस्थानी आहे. अभिनेत्री श्रुती मधुदीप हिने आपल्या दमदार अभिनयाने ही भूमिका साकारली आहे. लेखक कौस्तुभ रमेश देशपांडे यांची कथा आणि खुसखुशीत संवाद हेही चित्रपटाचे महत्त्वाचे आकर्षण ठरत आहेत.
विठुरायाचा जयघोष, कीर्तनपरंपरेतील मूल्ये आणि संतविचारांचा वेध घेत हा चित्रपट प्रेक्षकांसमोर एक वेगळा विषय मांडतो. सध्या भोंदू कीर्तनकारांबाबत चर्चा सुरू असताना, खरा कीर्तनकार कोण आणि कीर्तनपरंपरेचा मूळ गाभा काय, याचा विचार करायला लावणारा हा सिनेमा लक्ष वेधून घेत आहे.
गाणी आणि कलाकारांच्या अभिनयाचीही चर्चा
चित्रपटातील गाणी आणि संगीत हे त्याचे आणखी एक बलस्थान आहे. चित्रपटातील गाणी चित्रपटगृहांबाहेरही ऐकू येऊ लागल्याचे सांगितले जात आहे. अभिनेते किशोर कदम, चिन्मयी सुमीत, शशांक शेंडे, गौरी नलावडे आणि क्षितीश दाते यांसारखे परिचित कलाकार या चित्रपटात महत्त्वाच्या भूमिकांमध्ये दिसतात. त्यांच्यासोबत नवोदित कलाकारांनीही आपल्या भूमिका प्रभावीपणे साकारल्या आहेत.
मनोरंजनासोबत सामाजिक संदेश
समता, सामाजिक जाणीव, प्रेम आणि सहजीवनाचा अर्थ उलगडून सांगणारा हा चित्रपट प्रेक्षकांना अंतर्मुख करण्याचा प्रयत्न करतो. आयुष्यातील नकारात्मक गोष्टी बाजूला सारून सकारात्मकतेने जगण्याची प्रेरणा देणारा हा सिनेमा कुटुंबासह पाहण्यासाठी प्रेक्षकांची पसंती मिळवत असल्याचे सांगितले जात आहे. विशेषतः नव्या पिढीला चित्रपटाचा विषय भावत असल्याचे चित्र आहे.
सुरुवातीला संथ वाटचाल करणाऱ्या ‘पाच फुटाचा बच्चन’ने दुसऱ्या आठवड्यात वेग पकडल्याचा दावा चित्रपटाच्या प्रसिद्धीमधून करण्यात येत आहे. आता महाराष्ट्रातील प्रतिसादासोबतच अमेरिकेतील प्रदर्शनाला कसा प्रतिसाद मिळतो, याकडे चित्रपटाच्या टीमसह मराठी चित्रपटप्रेमींचे लक्ष लागले आहे.
