बुधवार, 2 सप्टेंबर 2026
(फोटो सौजन्य- सोशल मीडिया)
पॅनोरमा स्टुडिओ आणि लोकोमोटिव ग्लोबल यांच्या सहयोगाने या अद्याप शीर्षक निश्चित न झालेल्या चित्रपटाची निर्मिती केली जात आहे. चित्रपटात त्रिशा कृष्णन, ज्येष्ठ अभिनेत्री राधिका सरथकुमार आणि राष्ट्रीय पुरस्कार विजेत्या अपर्णा बालमुरली या तिघी मुख्य भूमिकेत दिसणार आहेत.
या तीन वैशिष्ट्यपूर्ण अभिनेत्रींच्या माध्यमातून कथेला आवश्यक असलेली भावनिक खोली आणि प्रभावी मांडणी साधण्याचा प्रयत्न करण्यात येणार आहे. विशेष म्हणजे, हा राजा कृष्ण मेनन यांचा पहिला तमिळ चित्रपट असून, पहिल्यांदाच ते मानसशास्त्रीय भयपट या प्रकारातही काम करत आहेत.
View this post on Instagram
आपल्या नव्या प्रोजेक्टबद्दल बोलताना राजा कृष्ण मेनन यांनी स्वतःला एकदा ‘genre agnostic’ म्हणजेच कोणत्याही एका विशिष्ट प्रकारापुरते मर्यादित नसलेला दिग्दर्शक म्हटलं गेल्याचा उल्लेख केला. हा चित्रपट त्यांच्या सर्जनशील प्रवासातील आणखी एक वेगळा प्रयोग असल्याचं त्यांनी सांगितलं.
तमिळ भाषेतील हा त्यांचा पहिलाच चित्रपट आहे. त्यासोबतच मानसशास्त्रीय भयपट आणि पूर्णपणे महिलांच्या व्यक्तिरेखांभोवती केंद्रित कथा साकारण्याचा हा त्यांचा पहिलाच अनुभव आहे. त्रिशा कृष्णन, राधिका सरथकुमार आणि अपर्णा बालमुरली यांसारख्या कलाकारांसोबत काम करण्याची संधी मिळणं ही त्यांच्यासाठी विशेष बाब असल्याचं त्यांनी म्हटलं आहे.
या चित्रपटात केवळ अचानक घाबरवणाऱ्या ‘जंप स्केअर’वर भर न देता वातावरणनिर्मिती आणि व्यक्तिरेखांच्या भावनिक संघर्षातून भय निर्माण करण्याचा प्रयत्न केला जाणार आहे. त्यामुळे हा भयपट प्रेक्षकांना केवळ घाबरवण्याऐवजी त्यांच्या मनावर परिणाम करणारा ठरण्याची शक्यता आहे.
हा चित्रपट पॅनोरमा स्टुडिओच्या दक्षिण भारतीय विस्ताराचा भाग असून, कंपनीचा हा पहिला तमिळ उपक्रम ठरला आहे. कुमार मंगत पाठक, अभिषेक पाठक, सुंदर आरोन, विकास शर्मा आणि अमित दलमिया यांच्या सहकार्याने या प्रोजेक्टची निर्मिती केली जात आहे.
राजा कृष्ण मेनन यांचा तमिळ चित्रपटसृष्टीतील हा प्रवेश आणि त्रिशा कृष्णन, राधिका सरथकुमार व अपर्णा बालमुरली यांची दमदार फळी यामुळे या मानसशास्त्रीय भयपटाबद्दल उत्सुकता वाढली आहे. चित्रपटाचं शीर्षक आणि प्रदर्शनाची तारीख अद्याप जाहीर करण्यात आलेली नाही.
