शनिवार, 17 ऑक्टोबर 2026
( फोटो सौजन्य- सोशल मिडिया)
The Paradise: नॅचरल स्टार नानीचा बहुप्रतिक्षित चित्रपट ‘द पैराडाइज’ सध्या चांगलाच चर्चेत आहे. ‘जर्सी’ आणि ‘हाय नन्ना’सारख्या चित्रपटांमधून आपल्या अभिनयाची छाप पाडणारा नानी या सिनेमात एका वेगळ्या आणि रॉ अवतारात दिसणार आहे. दिग्दर्शक श्रीकांत ओडेला आणि नानी यांचा हा दुसरा चित्रपट असून, याआधी दोघांनी ‘दसरा’मध्ये एकत्र काम केले होते.
चित्रपटाचा टीझर आणि पहिलं गाणं ‘आया शेर’ रिलीज झाल्यापासून चाहत्यांमध्ये ‘द पैराडाइज’ची उत्सुकता वाढली आहे. आता निर्मात्यांनी चित्रपटाच्या दुसऱ्या सिंगलच्या लॉन्चची मोठी घोषणा केली आहे.
डॅलसमध्ये होणार दुसऱ्या सिंगलचा लाईव्ह लॉन्च
‘द पैराडाइज’चं बहुप्रतिक्षित दुसरं सिंगल २८ ऑगस्ट रोजी डॅलसमध्ये लाईव्ह लॉन्च करण्यात येणार आहे. विशेष म्हणजे, चित्रपटाचे संगीतकार अनिरुद्ध रविचंदर यांच्या म्युझिकल कॉन्सर्टमध्ये हे गाणं हजारो चाहत्यांसमोर स्टेजवर लॉन्च केलं जाणार आहे.
या खास सोहळ्यासाठी नॅचरल स्टार नानीदेखील डॅलसला पोहोचला आहे. त्यामुळे अनिरुद्धच्या कॉन्सर्टमध्ये नानीची उपस्थिती आणि ‘द पैराडाइज’च्या गाण्याचा लाईव्ह लॉन्च हा चाहत्यांसाठी खास अनुभव ठरणार आहे.
मेकर्सच्या माहितीनुसार, स्टेजवर गाण्याचा लॉन्च झाल्यानंतर २९ ऑगस्ट रोजी ते डिजिटल प्लॅटफॉर्म्सवर रिलीज करण्यात येईल.
‘द पैराडाइज’साठी अनिरुद्ध रविचंदर यांनी संगीत दिलं आहे. दुसऱ्या सिंगलसाठी त्यांच्यासोबत प्रसिद्ध गीतकार कसरला श्याम यांनी काम केलं आहे. ‘दसरा’मधील ‘चमकीला एंजेल्सी’सारख्या लोकप्रिय गाण्यांसाठी कसरला श्याम ओळखले जातात. ‘बलगम’साठी त्यांना राष्ट्रीय पुरस्कारही मिळाला आहे. त्यामुळे अनिरुद्ध आणि कसरला श्याम यांची ही जोडी नव्या गाण्यात काय कमाल करते, याकडे संगीतप्रेमींचं लक्ष लागलं आहे.
‘द पैराडाइज’च्या पहिल्या सिंगल ‘आया शेर’ने यूट्यूबवर २०० मिलियनहून अधिक व्ह्यूजचा टप्पा पार केला आहे. या गाण्याला १.८ मिलियनहून अधिक लाईक्स मिळाले असून, सोशल मीडियावरही ते मोठ्या प्रमाणात व्हायरल झालं आहे. नानीचा लूक आणि त्याचा हुकस्टेप चाहत्यांच्या विशेष पसंतीस उतरला आहे.
एसएलव्ही सिनेमाजच्या बॅनरखाली तयार झालेला ‘द पैराडाइज’ २४ सप्टेंबर २०२६ रोजी चित्रपटगृहांमध्ये प्रदर्शित होणार आहे. हा चित्रपट हिंदी, तेलुगू, तमिळ, इंग्लिश, स्पॅनिश, बंगाली, कन्नड आणि मल्याळम अशा ८ भाषांमध्ये प्रदर्शित केला जाणार आहे.
नानीचा दमदार अवतार, श्रीकांत ओडेला यांचं दिग्दर्शन आणि अनिरुद्धचं संगीत यामुळे ‘द पैराडाइज’च्या रिलीजची प्रेक्षक आतुरतेने वाट पाहत आहेत
