फोटो सौजन्य - Social Media
हिवाळ्यात सूर्यप्रकाश कमी असतो म्हणून चेहऱ्यावर टॅन होत नाही असा अनेक महिलांचा समज असतो, परंतु हा समज चुकीचा आहे. थंडीत जरी गार हवा असली तरी धुक्यांमधून येणारे अल्ट्राव्हायोलेट किरण त्वचेसाठी अधिक हानिकारक ठरू शकतात. हिवाळ्यात सनस्क्रीन वापरणं अनेकजणी टाळतात आणि नकळत त्वचेवर टॅनिंग वाढत जातं. गारवा असल्याने सकाळच्या उन्हात बसण्याची किंवा फिरण्याची इच्छा होते, परंतु तज्ज्ञांच्या मते सकाळी ८ ते १० ही वेळ तुलनेने सुरक्षित असून त्यानंतर त्वचेवर युएव्ही किरणांचा प्रभाव वाढतो आणि त्वचा पटकन काळवंडू शकते. (How to get rid of tanning in Winter)
जर तुमची त्वचा आधीच टॅन झाली असेल, तर घरच्या घरी करता येणारे गव्हाच्या पिठाचे फेस पॅक प्रभावी ठरतात. दही–गहू पीठ पॅक त्वचेवरील मृत पेशी दूर करून चेहऱ्याचा नॅचरल ग्लो परत आणतो. एका वाटीत एक चमचा गव्हाचं पीठ, दही आणि काही थेंब गुलाबजल मिसळून तयार केलेली पेस्ट चेहऱ्यावर लावून १५ ते २० मिनिटांनी धुतल्यास त्वचा उजळते आणि टॅनिंग कमी होण्यास मदत होते. आठवड्यातून दोन ते तीन वेळा हा पॅक वापरावा. दुसरा म्हणजे केळी–गहू पीठ फेस पॅक. केळ्यातील नैसर्गिक मॉइश्चर त्वचेची कोरडेपणा कमी करत उजळपणा वाढवते. यासाठी एक चमचा गव्हाचं पीठ, पिकलेल्या केळीची पेस्ट आणि थोडं कच्चं दूध मिसळून चेहऱ्यावर लावावं. हा पॅक ३० मिनिटं ठेवून नंतर हलका स्क्रब केल्यास मृत त्वचा दूर होते आणि टॅनिंग कमी दिसू लागते.
आठवड्यातून दोनदा हा पॅक वापरणं फायदेशीर. तिसरा म्हणजे पपई–गहू पीठ फेस पॅक. पपईत असलेलं व्हिटॅमिन C त्वचेला उजळपणा देतं तर गव्हाचं पीठ नैसर्गिक एक्सफोलिएशन करतं. पपईची पेस्ट, एक चमचा गव्हाचं पीठ आणि मध मिसळून तयार केलेली पेस्ट चेहऱ्यावर २० ते ३० मिनिटं ठेवून नंतर स्क्रब करावा. नियमित वापराने टॅनिंग कमी होतं आणि त्वचा ताजी दिसते. टॅनिंग टाळण्यासाठी काही मूलभूत सवयी आवश्यक आहेत.
बाहेर जाण्यापूर्वी SPF 30+ सनस्क्रीन वापरणं, चेहऱ्यावर दिवसातून किमान दोन वेळा मॉइश्चरायझर लावणं, पुरेसं पाणी पिणं आणि दुपारी १२ ते ३ या वेळेत सूर्यप्रकाश टाळणं. त्वचेची योग्य काळजी घेतली आणि हे सोपे घरगुती उपाय नियमित केले तर हिवाळ्यातही चेहरा उजळ, टॅन-फ्री आणि निरोगी राहू शकतो.
