सोमवार, 19 ऑक्टोबर 2026
सौजन्य फोटो- सोशल मिडीया
कोल्हापूर जिल्ह्यातील जयसिंगपूर परिसरातून एक खळबळजनक बातमी समोर आली आहे. जयसिंगपूरजवळील दानोळी गावात सराईत गुन्हेगार महेश दळवी यांच्यावर दिवसाढवळ्या गोळीबार करण्यात आल्याची घटना घडली. या घटनेत गोळी लागल्याने दळवी यांचा मृत्यू झाल्याची माहिती आहे. सकाळी ११ वाजण्याच्या सुमारास ही घटना घडल्याचे सांगण्यात येत आहे.
मिळालेल्या प्राथमिक माहितीनुसार, काही अज्ञात व्यक्तींनी महेश दळवी यांच्यावर गोळ्या झाडल्या. या हल्ल्यात त्यांचा मृत्यू झाला. दिवसाढवळ्या घडलेल्या या घटनेमुळे दानोळी गावासह परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. घटनेची माहिती मिळताच जयसिंगपूर पोलीस घटनास्थळी दाखल झाले. पोलिसांकडून पुढील तपास आणि आवश्यक कारवाई सुरू करण्यात आली आहे. मात्र, महेश दळवी यांच्यावर गोळीबार कोणी केला आणि त्यामागील नेमके कारण काय, हे अद्याप स्पष्ट झालेले नाही. तपासातून या घटनेचा उलगडा होण्याची शक्यता आहे.
दरम्यान, कोल्हापूर जिल्ह्यात अलीकडच्या काळात घडलेल्या गंभीर गुन्ह्यांमुळे कायदा आणि सुव्यवस्थेचा प्रश्न पुन्हा चर्चेत आला आहे. माणगाव येथे 13 वर्षीय मुलीची धारदार शस्त्राने हत्या झाल्याची घटना समोर आली होती. त्यानंतर आता जयसिंगपूर परिसरात गोळीबाराची घटना घडल्याने नागरिकांमध्ये चिंता व्यक्त केली जात आहे. सलग घडणाऱ्या गंभीर घटनांमुळे ‘कोल्हापूर जिल्ह्यात नेमकं चाललंय तरी काय?’ असा सवाल उपस्थित होत आहे. गुन्हेगारीला आळा घालण्यासाठी पोलिसांनी कठोर कारवाई करावी, अशी मागणी नागरिकांकडून केली जात आहे.
दुसरीकडे, नाशिकच्या आडगाव परिसरातही एका युवकावर गोळीबार झाल्याची घटना घडली होती. या घटनेत उमेश मालोदे बचावल्याची माहिती आहे. या प्रकरणी दाखल फिर्यादीच्या आधारे आडगाव पोलिसांकडून तपास सुरू असून आरोपींचा शोध घेण्यासाठी पथके रवाना करण्यात आल्याचे सांगण्यात आले आहे. प्रेमप्रकरणातून हा गोळीबार झाल्याचा प्राथमिक अंदाज व्यक्त केला जात असला, तरी त्याबाबत अधिकृत पुष्टी होणे आवश्यक आहे. या घटनेमुळे नाशिकमध्येही गुन्हेगारीच्या वाढत्या घटनांबाबत चिंता व्यक्त केली जात आहे. एकीकडे नाशिकमध्ये गोळीबाराची घटना, तर दुसरीकडे कोल्हापूर जिल्ह्यात महेश दळवी यांच्या मृत्यूची घटना समोर आल्याने नागरिकांमध्ये अस्वस्थता आहे. जयसिंगपूरमधील गोळीबारामागील कारण आणि आरोपींची ओळख पोलिसांच्या तपासानंतरच स्पष्ट होणार आहे.
Ans: कोल्हापूर जिल्ह्यातील जयसिंगपूरजवळील दानोळी गावात ही घटना घडल्याची माहिती आहे.
Ans: महेश दळवी यांचा गोळी लागल्याने मृत्यू झाल्याचे वृत्त आहे.
Ans: गोळीबार कोणी केला आणि त्यामागील कारण काय, हे अद्याप स्पष्ट झालेले नाही. जयसिंगपूर पोलीस या प्रकरणाचा तपास करत आहेत.
