शुक्रवार, 28 ऑगस्ट 2026
एफडीएची पुण्यात धडक कारवाई (फोटो -ians)
एफडीएची पुण्यात मोठी कारवाई
‘सिप्ला फार्मा अँड लाइफ सायन्सेस लि. डेपोचे लायसन्स रद्द
या डेपोतून ११.१९ लाख रुपयांचा औषध साठा जप्त
पुणे: ‘रिएक्टिन प्लस’ या गोळ्यांच्या पॅकेजिंगमधील अनियमितता आणि शासकीय नियमांचे उल्लंघन केल्याप्रकरणी महाराष्ट्र अन्न व औषध प्रशासनाने (FDA) मोठी कारवाई केली आहे. पुण्याच्या वडकी येथील ‘सिप्ला फार्मा अँड लाइफ सायन्सेस लि.’ च्या सी अँड एफ डेपोचा औषध विक्री परवाना २७ ऑगस्ट २०२६ पासून तात्काळ प्रभावाने (Tukaram Mundhe) रद्द करण्यात आला आहे. जून २०२६ मध्ये केलेल्या तपासणीदरम्यान या डेपोतून ११.१९ लाख रुपयांचा औषध साठा जप्त करण्यात आला होता.
जून २०२६ मध्ये वडकी येथील गोदामाची तपासणी करताना, ‘शेड्यूल एच’ (Schedule H) श्रेणीतील प्रिस्क्रिप्शन औषध असलेल्या ‘रिएक्टिन प्लस’च्या पॅकिंगवर कोणत्याही परवानगीशिवाय ‘एनाल्जेसिक अँड अँटीपायरेटिक’ (Analgesic & Antipyretic) असा उल्लेख आढळला होता. अशा अनधिकृत माहितीमुळे रुग्ण डॉक्टरांच्या सल्ल्याशिवाय हे औषध घेण्याचा धोका निर्माण होतो. यानंतर प्रशासनाने ११.१९ लाख रुपयांचा साठा जप्त करत हे औषध बाजारातून परत मागवण्याचेनिर्देश दिले होते.
तपासणीत उघड झालेल्या गंभीर त्रुटी: कंपनीने औषध परत मागवण्याच्या मार्गदर्शक तत्त्वांचे योग्य पालन न केल्यामुळे करण्यात आलेल्या सखोल तपासात खालील गंभीर बाबी समोर आल्या.
साठवणुकीत त्रुटी: औषधांच्या योग्य साठवणुकीसाठी पुरेशा रॅकची व्यवस्था नसणे आणि औषधे थेट जमिनीवर ठेवणे.
नोंदींमध्ये तफावत: कॉम्प्युटर रेकॉर्ड आणि प्रत्यक्ष गोदामातील साठा यामध्ये मोठी तफावत आढळणे.
एक्सपायर्ड औषधांचे गैरव्यवस्थापन: मुदत संपलेल्या औषधांच्या विल्हेवारीबाबत अनियमितता.
या सर्व प्रकारानंतर प्रशासनाने बजावलेल्या कारणे दाखवा नोटीसला समाधानकारक उत्तर न मिळाल्याने, औषध व सौंदर्यप्रसाधने कायद्यांतर्गत ही कठोर कारवाई करत परवाना रद्द करण्यात आला आहे.
