बुधवार, 21 ऑक्टोबर 2026
पुणे : वानवडी परिसरात भोरी समाजाच्या सांस्कृतिक सभागृहाचे बांधकाम सुरु असताना पहिल्या मजल्याचा स्लॅब कोसळून (Slab Collapsed) पाच मजूर जखमी झाल्याची धक्कादायक घटना घडली. यात एका कामगाराचा मृत्यू झाला आहे. तर, इतरांवर रुग्णालयात उपचार सुरू आहेत. सोमवारी सायंकाळी हा प्रकार घडला.
स्लॅब टाकण्याचे काम सुरू असताना खालून दिलेला सपोर्ट निसटला आणि हा स्लॅब कोसळला. यामुळे खाली व स्लॅब टाकण्याचे काम करणारे कामगार जखमी झाले. दरम्यान, दोन महिन्यांपूर्वीच येरवडा परिसरात एका बहुमजली इमारतीचे काम सुरू असताना लोखंडी सांगडा मंजूरावर कोसळून पाच कामगारांचा मृत्यू झाला होता. तर, सहाजण जखमी झाले होते.
राम नरेश पटेल (वय 45, रा. वानवडी) असे मृत्यू झालेल्या मजूराचे नाव आहे. तर छत्रसिंग धूमकेती (वय 28), बरसिंग परटा (वय 37), संदिपकुमार उलके (वय 18), दिपचंद मराबी (वय 27) अशी जखमी झालेल्या कामगारांची नावे आहेत. याप्रकरणी वानवडी पोलीस ठाण्यात रात्री उशिरापर्यंत गुन्हा दाखल करण्याचे काम सुरू होते.
पोलिसांनी दिलेल्या माहितीनुसार, वानवडी परिसरातील अलंकार हॉलसमोर व एसआरपीएफ दोनचे गेट शेजारी भोरी समाजाच्या सांस्कृतिक सभागृहाचे बांधकाम सुरू आहे. ठेकेदाराला हे स्लॅब टाकण्याचे काम देण्यात आले होते. त्यानुसार हे बांधकाम सुरू होते. या सांस्कृतिक इमारतीचे काम सुरू आहे. त्याच्या पहिल्या मजल्याचे स्लॅब टाकण्याचे काम सुरू आहे. आज पहिल्याचा स्लॅब टाकण्यात येत होता. स्लॅब टाकण्यासाठी लाकडांचा त्याला सपोर्ट देण्यात आला होता. काही मजूर खाली काम करत होते. तर काहीजण स्लॅब भरण्याचे काम करत होते.
यादरम्यान, दुपारी चार वाजण्याच्या सुमारास अचानक खालून स्लॅबला दिलेला सपोर्ट निसटला आणि सुरू असणारा स्लॅब कोसळला गेला. त्यात पाच कामगरा अडकले गेले. तत्काळ या घटनेची माहिती अग्निशमन दलाला आणि वानवडी पोलीसांना देण्यात आली. त्यानंतर हडपसर अग्निशम दल व वानवडी पोलीसांनी घटनास्थळी धाव घेतली. तोपर्यंत नागरिकांनी तीन कामगारांना बाहेर काढून रुग्णालयात पाठविले होते.
अग्निशमनाच्या जवानांनी दोन कामगारांना बाहेर काढले व त्यांना रुग्णालयात दाखल केले. त्यात दोघांची प्रकृती चिंतानजक होती. उपचार सुरू असतानाच एका कामगाराचा गंभीर मार लागल्याने मृत्यू झाला. याची माहिती मिळाल्यानंतर महापालिकेच्या अधिकार्यांनी देखील येथे धाव घेतली होती. अधिक तपास वानवडी पोलीस करत आहेत.
बांधकाम अनधिकृत..?
भोरी समाजाकडून सुरू असणारे बांधकाम बेकायदेशीर असल्याची माहिती येथील स्थानिक नागरिकांकडून देण्यात आली. त्यामुळे त्याला परवानगी होती का तसेच परवानगी असेल तर त्यानुसारच बांधकाम सुरू होते का, असे प्रश्न समोर आले आहेत. तसेच, या बांधकामाबाबत न्यायालयात वाद सुरू असल्याचेही येथील नागरिकांकडून सांगण्यात आले आहे. त्यामुळे या घटनेची तसेच बांधकामाबाबत चौकशी करावी, अशी मागणीही करण्यात आली आहे. बांधकाम करण्यासाठी ड्रेनेज लाईन तोडल्या गेल्या आहेत. तर काही वळविण्यात आल्या आहेत.
