मंगळवार, 20 ऑक्टोबर 2026
फोटो सौजन्य- अधिकृत संकेतस्थळ
टाटा मोटर्स या भारतातील सर्वात मोठ्या व्यावसायिक वाहन उत्‍पादक कंपनीच्या बस चेसिसला मोठी ऑर्डर मिळाली आहे. आता उत्तर प्रदेश राज्‍य मार्ग परिवहन महामंडळाकडून (यूपीएसआरटीसी) टाटा एलपीओ १६१८ डिझेल बस चेसिसच्या १,००० युनिट्सचा पुरवठा करण्यासाठी प्रतिष्ठित ऑर्डर मिळाल्‍याची घोषणा केली आहे. सरकारने निविदा प्रक्रियेच्‍या माध्‍यमातून आयोजित करण्‍यात आलेल्‍या स्‍पर्धात्‍मक ई-बिडिंग प्रक्रियेनंतर टाटा मोटर्सला ही ऑर्डर मिळाली आहे. कंपनीकडून यूपीएसआरटीसीला बस चेसिसचा पुरवठा टप्‍प्‍याटप्‍प्‍याने केला जाणार आहे.
गेल्यावर्षी मिळाली होती तब्बल १,३५० चेसिसची ऑर्डर
टाटा मोटर्सला गेल्यावर्षीही यूपीएसआरटीसीद्वारे १,३५० ची ऑर्डर मिळाली होती. या बस चेसिसच्या मोठ्या ऑर्डरची यशस्‍वीरित्‍या पूर्तता केल्‍यानंतर यूपीएसआरटीसीकडून पुन्हा १००० बस चेसिसची ही ऑर्डर मिळाली आहे.टाटा मोटर्सच्या बस चेसिसचे वैशिष्ट्य म्हणजे आंतरशहरीय व लांब अंतरापर्यंतच्‍या प्रवासासाठी डिझाइन करण्‍यात आलेले टाटा एलपीओ १६१८ डिझेल बस चेसिस उच्‍च दर्जाची कार्यक्षमता आणि सर्वोत्तम पॅसेंजर कम्‍फर्टसह कमी टोटल कॉस्‍ट ऑफ ओनरशीप (टीसीओ) देते.
सार्वजनिक परिवहनाला विस्‍तारित व सुधारित करण्‍याच्‍या त्‍यांच्‍या प्रयत्‍नांमध्‍ये सहयोग
ही ऑर्डर मिळाल्‍याबाबत मत व्‍यक्‍त करत टाटा मोटर्सच्या कमर्शियल पॅसेंजर वेईकल बिझनेसचे उपाध्‍यक्ष व प्रमुख श्री. आनंद एस म्‍हणाले, ”आम्‍हाला यूपीएसआरटीसीसोबत सार्वजनिक परिवहनाला विस्‍तारित व सुधारित करण्‍याच्‍या त्‍यांच्‍या प्रयत्‍नांमध्‍ये सहयोग सुरू ठेवण्‍याचा आनंद होत आहे. टाटा एलपीओ १६१८ बस चेसिस प्रबळ व विश्‍वसनीय गतीशीलतेसह उच्‍च अपटाइम आणि कमी देखभाल व कार्यसंचालन खर्च देण्‍यासाठी डिझाइन करण्‍यात आले आहे. आम्‍ही यूपीएसआरटीसीच्‍या मार्गदर्शनानुसार पुरवठा सुरू करण्‍यास उत्‍सुक आहोत.”
विविध राज्यातील प्रमुख शहरे आणि परिवहन महामंडळांना टाटाच्या बसेसचा पुरवठा
टाटा मोटर्स कंपनी भारतभरातील विविध राज्यातील प्रमुख शहरांना व तसेच परिवहन मंडळांना प्रगत बसेस आणि सार्वजनिक परिवहन सोल्‍यूशन्‍स वितरित करण्‍यामध्‍ये अग्रस्‍थानी आहे. या असंख्य बसेस देशातील कानाकोपऱ्यातील रस्‍त्‍यांवर यशस्‍वीरित्‍या धावत आहेत. या बसेसमुळे देशातील प्रमुख शहरे, निम्न शहरे आणि दुर्गम भागांपर्यंत दळणवळणाची सुविधा उपलब्ध होत आहे. तसेच लाखो प्रवाशांना दररोज आरामदायी व सुखकर प्रवासाचा आनंद देत आहेत.
