...सुन लक्ष्मीच्या पावलांनी आली; मुकेश अंबानींच्या संपत्तीत 10 दिवसांत 25000 कोटींनी वाढ!
रिलायन्स उद्योग समूहाचे प्रमुख मुकेश अंबानी, यांचा धाकटा मुलगा अनंत आणि राधिका 12 जुलै रोजी विवाह बंधनात अडकले. जगातील सर्वात महागड्या लग्नांपैकी एक असलेल्या अनंत-राधिकाच्या लग्नात देशासह जगभरातील सेलिब्रिटींनी हजेरी लावली होती. याशिवाय पंतप्रधान नरेंद्र मोदींसह देशभरातील अनेक दिग्गज नेतेही वधू०-वरांना आशीर्वाद देण्यासाठी उपस्थित राहिले. दरम्यान, आता नवीन सुनबाईच्या पायगुणामुळे मुकेश अंबानी यांच्या संपत्तीत मोठी वाढ झाली आहे.
अनंत-राधिकाच्या लग्नात मुकेश अंबानी यांनी पाण्यासारखा पैसा खर्च केला. पण, या कालावधीत त्यांच्या संपत्तीमध्ये कोणताही बदल झाला नाही. मात्र, मागील १० दिवसांत त्यांच्या कमाईमध्ये मोठी वाढ झाली आहे. ब्लूमबर्ग बिलियनेअर इंडेक्सनुसार मुकेश अंबानी यांच्या संपत्तीत एका दिवसात विक्रमी वाढ झाली आहे. तर गेल्या 10 दिवसांत त्यांची कमाई 25000 कोटींहुन अधिक वाढली आहे.
श्रीमंतांच्या यादीत ११ व्या स्थानी झेप
एकूण संपत्ती वाढल्यानंतर मुकेश अंबानी जगातील श्रीमंतांच्या यादीत एक स्थानवर आले आहेत. अब्जाधीशांच्या यादीत मुकेश अंबानी 12 व्या स्थानावरून 11 व्या स्थानावर पोहोचले आहेत. ब्लूमबर्ग बिलियनेअर इंडेक्सनुसार, 5 जुलै रोजी त्यांची एकूण संपत्ती 118 अब्ज डॉलर होती, जी आता 121 अब्ज डॉलर झाली आहे.
अवघ्या 10 दिवसात 25000 कोटींची कमाई
अर्थात गेल्या 10 दिवसांत त्यांची संपत्ती 3 अब्ज डॉलर्सने (सुमारे 25000 कोटी रुपये) वाढली आहे. सोमवारच्या आकडेवारीवर नजर टाकल्यास, मुकेश अंबानी यांनी गेल्या 24 तासांत 109 मिलियन डॉलर्स (सुमारे 9010 कोटी रुपये) कमावले आहेत.
रिलायन्सच्या शेअर्समध्ये जोरदार वाढ
12 जुलैला लग्नाच्या दिवशी रिलायन्स इंडस्ट्रीजचे शेअर्स 1 टक्क्यांनी वाढले होते. शेअर्सच्या वाढीमुळे मुकेश अंबानी यांच्या संपत्तीतही वाढ झाली. गेल्या एका महिन्यात शेअर्स 6.65 टक्क्यांनी वाढले आहेत. तसेच, या शेअर्सनी सहा महिन्यांत 14.90 टक्क्यांपर्यंत परतावा दिला आहे.
