सोमवार, 19 ऑक्टोबर 2026
फोटो सौजन्य - Social Media
भारतीय सैन्यात नोकरीचे स्वप्न पाहणाऱ्या उमेदवारांसाठी एक मोठी संधी आली आहे. भारतीय सैन्याच्या इलेक्ट्रॉनिक्स आणि मेकॅनिकल इंजिनिअर्स महानिदेशालयाने (DG EME) विविध ग्रुप C नागरी पदांसाठी भरती प्रक्रिया सुरू केली आहे. या भरती अंतर्गत एकूण ६९ पदे भरली जाणार असून, त्यामध्ये मल्टी टास्किंग स्टाफ (MTS), लोअर डिव्हिजन क्लर्क (LDC), धोबी, स्टेनोग्राफर ग्रेड-II आणि ज्युनियर टेक्निकल क्लर्क ट्रेनिंग इन्स्ट्रक्टर अशा विविध पदांचा समावेश आहे.
भरतीसाठी अर्ज प्रक्रिया ११ ऑक्टोबर २०२५ पासून सुरू झाली असून १५ नोव्हेंबर २०२५ पर्यंत उमेदवारांना अर्ज सादर करता येणार आहे. एकूण ६९ जागांपैकी MTS साठी ३५, LDC साठी २५, धोबीसाठी १४, स्टेनोग्राफर ग्रेड-II साठी २, आणि ज्युनियर टेक्निकल क्लर्क ट्रेनिंग इन्स्ट्रक्टरसाठी २ पदे राखीव आहेत. उमेदवारांची निवड लेखी परीक्षा, कौशल्य चाचणी (Skill Test), कागदपत्र पडताळणी आणि वैद्यकीय तपासणी या चार टप्प्यांद्वारे केली जाणार आहे.
पात्रतेबाबत बोलायचे झाल्यास, MTS, LDC, स्टेनोग्राफर ग्रेड-II आणि धोबी या पदांसाठी उमेदवाराचे वय १८ ते २५ वर्षे दरम्यान असावे, तर ज्युनियर टेक्निकल क्लर्क पदासाठी वयोमर्यादा २१ ते ३० वर्षे ठेवण्यात आली आहे. शैक्षणिक पात्रतेसाठी उमेदवारांकडे मान्यताप्राप्त संस्थेचे किमान दहावी किंवा बारावी उत्तीर्ण प्रमाणपत्र असणे आवश्यक आहे. जर तुम्ही या भरतीसाठी अर्ज करण्यास इच्छुक आहात तर नक्कीच दिलेल्या मुदतीच्या आत अर्ज प्रक्रिया पूर्ण करा.
अर्ज प्रक्रिया पूर्णपणे मोफत आहे. उमेदवारांना ऑनलाईन आणि ऑफलाईन या दोन्ही मार्गांनी अर्ज करता येईल. ऑनलाईन अर्ज करण्यासाठी उमेदवारांनी www.joinindianarmy.nic.in या संकेतस्थळावर जाऊन “DG EME Group C Recruitment 2025” हा पर्याय निवडावा. त्यानंतर आवश्यक माहिती भरून, फोटो, स्वाक्षरी आणि आवश्यक कागदपत्रे अपलोड करावीत. शेवटी अर्ज सादर करून त्याची प्रिंटआउट घ्यावी. भारतीय सैन्यात सेवा करण्याची इच्छा असणाऱ्या तरुणांसाठी ही एक उत्तम आणि सन्मानजनक संधी आहे.
