मंगळवार, 20 ऑक्टोबर 2026
सौजन्य फोटो - सोशल मिडीया
मुंबई : मुंबईतील कुर्ला पश्चिम भागात मंगळवारी पहाटे भीषण आगीची घटना घडली. येथील कोहिनूर HDIL इमारत क्रमांक ५ मधील इलेक्ट्रिक डक्टच्या वायरिंगला अचानक आग लागली. ही इमारत तळमजला अधिक १२ मजल्यांची असून, आगीमुळे संपूर्ण इमारतीत धूर पसरला. या घटनेत पाच वर्षांच्या बालकासह एकूण नऊ जण जखमी झाले आहेत. अग्निशमन दलाने तातडीने घटनास्थळी धाव घेत आगीवर नियंत्रण मिळवलं.
मिळालेल्या माहितीनुसार, मंगळवारी सकाळी ६ वाजून ५३ मिनिटांनी अग्निशमन दलाला आगीची माहिती देण्यात आली. घटनेचं गांभीर्य लक्षात घेऊन अग्निशमन दलाचे जवान, मुंबई पोलीस, महावितरणचे कर्मचारी आणि १०८ रुग्णवाहिका घटनास्थळी दाखल झाल्या. इमारतीतील इलेक्ट्रिक डक्टमधील वायरिंगला आग लागल्याने ज्वाळा आणि धुराचा प्रचंड फैलाव झाला. आगीची तीव्रता वाढल्याने विविध मजल्यांवरील लोखंडी दरवाजांचंही नुकसान झालं. अग्निशमन दलाच्या जवानांनी शर्थीचे प्रयत्न करत सकाळी ७ वाजून २१ मिनिटांच्या सुमारास आगीवर नियंत्रण मिळवलं.
आगीमुळे इमारतीत मोठ्या प्रमाणात धूर साचला होता. या धुरामुळे आठ जणांना श्वसनाचा त्रास झाला, तर एका व्यक्तीच्या उजव्या पायाला दुखापत झाली. जखमींमध्ये पाच वर्षांचा मोहम्मद शेख, दोन अल्पवयीन मुली आणि ६५ वर्षांच्या वृद्धाचा समावेश आहे. सर्व जखमींना तातडीने राजावाडी रुग्णालयात उपचारासाठी दाखल करण्यात आलं. डॉक्टरांनी दिलेल्या माहितीनुसार, सध्या सर्व जखमींची प्रकृती स्थिर आहे.
या घटनेतील जखमींमध्ये ईशान अहमद (३०), फरिना बोनो (२७), एजाज अहमद (६५), फरीन शेख (१८), नायदा शेख (१४), कलिमा सहा (४५), अलिना शेख (१७) आणि जाहेद अली शेख (५५) यांचा समावेश आहे. जाहेद अली शेख यांच्या उजव्या पायाला दुखापत झाली आहे. नवव्या जखमीमध्ये पाच वर्षांच्या मोहम्मद शेखचा समावेश आहे. दरम्यान, आगीचं नेमकं कारण अद्याप स्पष्ट झालेलं नाही. इलेक्ट्रिक डक्टमधील वायरिंगला आग कशी लागली, याचा तपास पोलीस आणि अग्निशमन दलाकडून केला जात आहे.
Ans: मुंबईतील कुर्ला पश्चिम भागातील कोहिनूर HDIL इमारत क्रमांक ५ मध्ये आग लागली.
Ans: इमारतीतील इलेक्ट्रिक डक्टच्या वायरिंगला आग लागल्याची माहिती आहे. मात्र, आगीचं नेमकं कारण अद्याप स्पष्ट झालेलं नाही.
Ans: सर्व जखमींना राजावाडी रुग्णालयात दाखल करण्यात आलं असून, त्यांची प्रकृती स्थिर असल्याची माहिती आहे.
