बनावट सोन्याचे बिस्कीट देऊन महिलांना गंडवले; बिहारच्या टोळीचा पर्दाफाश

सोन्याची बनावट बिस्किटे देऊन वृद्ध महिलांकडील सोन्याचे खरे दागिने लुटणाऱ्या बिहारच्या टोळीचा कराड शहर पोलिस ठाण्याच्या गुन्हे शाखेने पर्दाफाश केला आहे.

संग्रहित फोटो

Follow Us:

Follow Us:

कराड : सोन्याची बनावट बिस्किटे देऊन वृद्ध महिलांकडील सोन्याचे खरे दागिने लुटणाऱ्या बिहारच्या टोळीचा कराड शहर पोलिस ठाण्याच्या गुन्हे शाखेने पर्दाफाश केला आहे. या टोळीतील एकाला पोलिसांनी अटक केली, तर, पाच जण पसार झाले. अटक केलेल्या चोरट्याकडून पोलिसांनी दीड तोळ्याची सोन्याची साखळी हस्तगत केली आहे.

विरेंद्र साहू (वय ३२, मूळ रा. बिहार, सध्या रा. कऱ्हाड) असे अटक केलेल्याचे नाव आहे. पोलिसांनी दिलेल्या माहितीनुसार, पाटण तालुक्यातील बेलवडे येथील अनिता अशोक तर्टे यांना दोन दिवसांपूर्वी कराड येथील बस स्थानक परिसरात भामट्यांनी बनावट सोन्याचे बिस्किट देऊन त्यांची दीड तोळ्याची सोन्याची चैन लुटली होती. याबाबत अनिता तर्टे यांनी कराड शहर पोलिसात फिर्याद दिली.

गुन्हे शाखेचे सहायक पोलिस निरीक्षक अशोक भापकर यांच्यासह उपनिरीक्षक आंदलकर, धीरज कोरडे, मोहसीन मोमीन, अनिल स्वामी, दिग्विजय सांडगे, आनंदा जाधव, सोनाली पिसाळ, अमोल देशमुख यांना गुन्ह्याचा तपास करताना शिराळा व पलूसमध्येही अशाच चोऱ्या झाल्याचे लक्षात आले. त्याआधारे पोलिसांनी सापळा रचला. यात सहा जणांची टोळी असल्याचे समोर आले. सहायक पोलिस निरीक्षक अशोक भापकर तपास करीत आहेत.

हे सुद्धा वाचा  :Pune Crime : गुन्हे शाखेच्या युनिट एकची मोठी कारवाई; गांजा विक्रीसाठी आलेल्या दोघांना ठोकल्या बेड्या

कराडमधील राहत्या घरावर छापा

या टोळीच्या कराड येथील राहत्या घरावर पोलिसांनी छापा टाकला. त्यावेळी विरेंद्र साहू पोलिसांच्या हाती लागला, तर अन्य पाच जण पसार झाले. पळून गेलेल्या पाच जणांचा शोध पोलिसांकडून घेतला जात आहे. या टोळीने साताऱ्यासह सांगली जिल्ह्यातही गुन्हे केल्याचे प्रथमदर्शनी दिसून येत आहे. अन्यही काही जिल्ह्यांत गुन्हे केले असण्याची शक्यता आहे. त्यादृष्टीने पोलिसांकडून तपास केला जात आहे.

हे सुद्धा वाचा : कोयत्याचा धाक दाखवून लूट, दुकानाचीही केली तोडफोड; शिक्रापुरात नेमकं काय घडलं?

घरातून पॉलिश पावडर जप्त

पोलिसांनी छापा टाकण्यापूर्वी सुमारे अर्धा तास आधी टोळीतील पाचजण घरातून बाहेर गेले होते. अर्ध्या तासापूर्वी पोलिसांनी छापा टाकला असता, तर संपूर्ण टोळीच पोलिसांच्या हाती लागली असती. पोलिसांच्या हाती लागलेल्या विरेंद्र साहू यानेही पळून जाण्याचा प्रयत्न केला. मात्र, त्याला पाठलाग करून पकडण्यात आले. त्याच्याकडून गोल्ड पॉलिश, चांदी पॉलिश पावडर आणि सोन्यासारखे दिसणारे बिस्किट जप्त करण्यात आले आहे.

Web Title: Police have arrested a man who cheated women by giving them fake gold biscuits nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com