गुरुवार, 13 ऑगस्ट 2026
(फोटो सौजन्य- सोशल मीडिया)
Bollywood Actresses: बॉलिवूडमध्ये अभिनेत्रींचं पदार्पण केवळ एखाद्या चित्रपटातून किंवा ट्रेलरमधूनच होतं असं नाही. कधी कधी एखाद्या गाण्यातील तीन मिनिटांची दमदार झलकही अभिनेत्रीला प्रेक्षकांच्या लक्षात आणून देते. चेहऱ्यावरील एक्सप्रेशन्स, डान्स स्टेप्स आणि स्क्रीन प्रेझेन्सच्या जोरावर काही अभिनेत्री चित्रपटात मुख्य भूमिका मिळण्याआधीच लोकप्रिय झाल्या. अशाच अभिनेत्रींच्या प्रवासावर एक नजर…
राशा थडानीच्या लोकप्रियतेत ‘उई अम्मा’ या गाण्याचा मोठा वाटा आहे. हे गाणं तिच्या पदार्पणाच्या चित्रपटातील असलं तरी ते केवळ प्रमोशनल सॉन्ग राहिलं नाही, तर राशाची ओळख बनलं. पीरियड नंबर असलेल्या या गाण्यात तिचे एक्सप्रेशन्स आणि स्क्रीन प्रेझेन्स प्रेक्षकांच्या विशेष पसंतीस उतरले.
राशाने ‘श्रीनिवास मंगापुरम’मधून तेलुगू चित्रपटसृष्टीत पदार्पण केलं असून ‘लायकी लाइका’ आणि ‘लगन लागी रे’ हे तिचे आगामी प्रोजेक्ट्स आहेत.
‘पल्लो लटके अगेन’ या डान्स नंबरमुळे श्रेया शर्मा चर्चेत आली. ‘जटाधराम’मधील सुधीर बाबूच्या सहकलाकाराच्या भूमिकेपेक्षा तिच्या डान्स नंबरने प्रेक्षकांचं अधिक लक्ष वेधून घेतलं. लोकसंगीताच्या ठेक्यावर आधारित या गाण्यातील तिच्या परफॉर्मन्सने तिला प्रसिद्धी मिळवून दिली.
यानंतर श्रेयाने ‘मस्ती ४’मधून बॉलिवूडमध्ये पदार्पण केलं. आता ती विवेक ओबेरॉय आणि नित्या मेनन यांच्यासोबत एका मर्डर मिस्ट्री थ्रिलरमध्ये दिसणार आहे.
नोरा फतेही – ‘दिलबर’
नोरा फतेहीसाठी ‘दिलबर’ हे गाणं करिअरमधील महत्त्वाचा टर्निंग पॉइंट ठरलं. २०१८ मध्ये ‘सत्यमेव जयते’मधील या गाण्याच्या नव्या व्हर्जनने सोशल मीडियावर अक्षरशः धुमाकूळ घातला. गाण्याला मोठ्या प्रमाणात व्ह्यूज मिळाले आणि नोराची ओळख बॉलिवूडमधील आघाडीच्या डान्स सेन्सेशन म्हणून निर्माण झाली.
यानंतर ‘कमरिया’, ‘ओ साकी साकी’ आणि ‘एक तो कम जिंदगी’ यांसारख्या गाण्यांमधून तिची लोकप्रियता आणखी वाढली. पुढे नोराने ‘स्ट्रीट डान्सर 3डी’, ‘भुज: द प्राइड ऑफ इंडिया’, ‘क्रॅक’, ‘मडगाव एक्सप्रेस’ आणि ‘थम्मा’ यांसारख्या चित्रपटांमध्ये अभिनय केला.
शनाया कपूरचा ग्लॅमर आणि मॉडेलिंगमधील प्रवास आधीपासूनच चर्चेत होता. मात्र, गुरू रंधावाच्या ‘VIBE’ या म्युझिक व्हिडिओमधून तिला मोठ्या प्रमाणात स्क्रीन एक्सपोजर मिळाला. या गाण्यात ती फ्रेंच मॉन्टानासोबत दिसली होती.
या म्युझिक व्हिडिओमुळे तिच्या स्क्रीन प्रेझेन्सची झलक प्रेक्षकांना मिळाली आणि तिच्या मोठ्या पडद्यावरील पदार्पणाची उत्सुकता वाढली. शनायाने ‘आंखों की गुस्ताखियाँ’मधून अभिनय क्षेत्रात पदार्पण केलं. त्यानंतर ती ‘तू या मैं’मध्येही दिसली.
पलक तिवारी – ‘बिजली बिजली’
पलक तिवारीची ओळखही चित्रपटातून नव्हे, तर ‘बिजली बिजली’ या म्युझिक व्हिडिओमधून झाली. २०२१ मध्ये हार्डी संधूसोबत आलेल्या या गाण्याने पलकला तरुणाईमध्ये घराघरात पोहोचवलं.
चित्रपटात अभिनय करण्याआधीच पलकची सोशल मीडिया आणि म्युझिक व्हिडिओच्या माध्यमातून मोठी फॅन फॉलोइंग तयार झाली. त्यानंतर तिने ‘किसी का भाई किसी की जान’मधून बॉलिवूडमध्ये पदार्पण केलं. पुढे ती ‘द भूतनी’ आणि ‘लुक्खे’ या प्रोजेक्ट्समध्ये दिसली. तिचा ‘रोझी: द सॅफ्रॉन चॅप्टर’ हा चित्रपटही चर्चेत आहे.
एखादं गाणं काही मिनिटांचं असलं तरी त्याचा प्रभाव दीर्घकाळ टिकू शकतो. ‘दिलबर’मधून नोराने बॉलिवूडमधील मोठी डान्स सेन्सेशन म्हणून स्वतःची ओळख निर्माण केली, तर राशा थडानी, श्रेया शर्मा, शनाया कपूर आणि पलक तिवारी या नव्या पिढीतील अभिनेत्री संगीत आणि परफॉर्मन्सच्या माध्यमातून प्रेक्षकांपर्यंत पोहोचल्या.
मोठ्या पडद्यावर पदार्पण करण्याआधीच मिळालेली ही प्रसिद्धी त्यांच्या अभिनय कारकिर्दीसाठी फायदेशीर ठरली आहे. त्यामुळे म्युझिक व्हिडिओ आणि डान्स नंबर हे आता केवळ मनोरंजनाचा भाग न राहता नव्या कलाकारांसाठी मोठ्या ब्रेकचं माध्यमही ठरत आहेत.
