शुक्रवार, 16 ऑक्टोबर 2026
(फोटो सौजन्य -सोशल मीडिया)
Aarti Solanki: गणेशोत्सवाची चाहूल लागली की बाप्पाच्या आगमनाची तयारी सर्वत्र सुरू होते. गणेशोत्सवाला आता अवघे काही दिवस बाकी राहिले आहेत. मोठमोठ्या सार्वजनिक गणेश मंडळांचे आगमन सोहळे सध्या पाहायला मिळत आहेत. या आगमन सोहळ्यांचे व्हिडीओ सोशल मीडियावर तुफान व्हायरल होत आहेत.
मात्र, यंदा ‘बॅलन्सिंग गणेशमूर्ती’ सर्वाधिक चर्चेचा विषय ठरल्या आहेत. या मूर्तींबाबत नेटकऱ्यांमध्ये संमिश्र प्रतिक्रिया पाहायला मिळत आहेत. काहींनी या अनोख्या मांडणीचं कौतुक केलं आहे, तर काहींनी त्यावर नाराजी व्यक्त केली आहे.
याच बदलत्या ट्रेंडवर अभिनेत्री आरती सोलंकी हिने नाराजी व्यक्त केली आहे. गणपती बाप्पाचं रूप मुळातच सुरेख आणि देखणं असताना त्यांना वेगळ्या रूपात घडवण्याची गरज काय, असा सवाल अभिनेत्रीने उपस्थित केला आहे.
आरती सोलंकीने सोशल मीडियावर एक स्टोरी शेअर करत गणेशमूर्तींच्या बदलत्या स्वरूपावर आपलं स्पष्ट मत मांडलं आहे. “अरे, हे काय चालवलंय? गणपती बाप्पाचं रूप मुळातच सुरेख, देखणं… अगदी गोड असताना बाप्पाला वेगळ्या रूपात घडवण्याची काय गरज?” असा सवाल तिने केला आहे.
मंडपात देखावा करण्यापेक्षा बाप्पाचं पारंपरिक स्वरूप जपण्याला अधिक महत्त्व दिलं पाहिजे, असंही आरतीने आपल्या पोस्टमधून म्हटलं आहे. “मंडपात देखावा हवा तो करा… खरंतर त्याचीही गरज नाही. पण मंडळांच्या स्पर्धेत वाढ झालीये, तर काय करणार?” असं म्हणत तिने मंडळांमधील वाढत्या स्पर्धेवरही भाष्य केलं आहे.
सध्या चर्चेत असलेल्या बॅलन्सिंग गणेशमूर्तींबाबत आरतीने विशेष नाराजी व्यक्त केली. “सगळ्यात वाईट गोष्ट म्हणजे बॅलन्सिंगच्या नावावर बाप्पाला अक्षरश: हवेत लटकवून ठेवणं हे योग्य आहे का? वाईट वाटतं बाप्पासाठी…” असं तिने आपल्या पोस्टमध्ये म्हटलं आहे.
गणेशोत्सव आणि बाप्पाचं स्वरूप पारंपरिक असावं, असं मतही अभिनेत्रीने व्यक्त केलं. “सण आणि बाप्पा हा पारंपरिक हवा. स्वत:च्या मुलांना फॅन्सी ड्रेस स्पर्धेत तयार करतात, तसं बिचाऱ्या बाप्पाला सजवत आहेत,” असं म्हणत तिने या बदलत्या ट्रेंडवर नाराजी व्यक्त केली.
पोस्टच्या शेवटी आरतीने बाप्पाकडेच एक मिश्किल पण स्पष्ट मागणी केली आहे. “माफ करा बाप्पा… तुम्ही बुद्धीचे देवता आहात, आता याल तर सगळ्यांना चांगली बुद्धी द्या!” असं तिने म्हटलं आहे.
(फोटो सौजन्य -सोशल मीडिया)
आरती सोलंकीची ही पोस्ट सोशल मीडियावर चांगलीच चर्चेत आली आहे. गणेशोत्सवातील बदलते ट्रेंड आणि मंडळांमधील वाढती स्पर्धा यावर अभिनेत्रीने व्यक्त केलेल्या मतावर नेटकऱ्यांकडून विविध प्रतिक्रिया उमटत आहेत.
गणेशोत्सवाच्या पार्श्वभूमीवर आरती सोलंकीने मांडलेलं हे स्पष्ट मत सध्या चर्चेचा विषय ठरत असून, तिच्या पोस्टमुळे गणेशमूर्तींच्या बदलत्या ट्रेंडवर पुन्हा एकदा चर्चा सुरू झाली आहे.
