बुधवार, 9 सप्टेंबर 2026
( फोटो सौजन्य- सोशल मीडिया)
Rajpal Yadav Cheque Bounce Case: बॉलिवूड अभिनेता राजपाल यादव यांच्या चेक बाउन्स प्रकरणात मोठी अपडेट समोर आली आहे. दिल्ली उच्च न्यायालयाच्या निर्णयाला आव्हान देत राजपाल यादव यांनी सर्वोच्च न्यायालयात धाव घेतली होती. उच्च न्यायालयाने सुनावलेल्या तीन महिन्यांच्या तुरुंगवासाच्या शिक्षेला आणि ७.५ कोटी रुपये परत करण्याच्या आदेशाला त्यांनी आव्हान दिलं होतं. या प्रकरणात सर्वोच्च न्यायालयाने राजपाल यादव यांना तूर्तास दिलासा दिला आहे. मात्र, हा दिलासा एका अटीवर देण्यात आला आहे.
एएनआयच्या वृत्तानुसार, चित्रपट निर्माता आणि अर्थपुरवठादार मुरली प्रोजेक्ट्स प्रायव्हेट लिमिटेडशी संबंधित चेक बाउन्स प्रकरणात शिक्षा भोगण्यासाठी आत्मसमर्पण करण्यापासून सूट हवी असल्यास राजपाल यादव यांनी ९ सप्टेंबरपर्यंत ५ कोटी रुपये न्यायालयाच्या रजिस्ट्रीमध्ये जमा करावेत, असे निर्देश सर्वोच्च न्यायालयाने दिले आहेत.
राजपाल यादव यांच्या याचिकेवर न्यायालयाने सशर्त नोटीस बजावली आहे. या प्रकरणाची पुढील सुनावणी १५ सप्टेंबर रोजी होणार आहे.
दिल्ली उच्च न्यायालयाने १० जुलै रोजी दिलेल्या निर्णयात परक्राम्य दस्तऐवज कायद्याच्या (Negotiable Instruments Act) कलम १३८ अंतर्गत सात आरोपांमध्ये राजपाल यादव यांची दोषसिद्धी आणि तीन महिन्यांची तुरुंगवासाची शिक्षा कायम ठेवली होती.
त्यानंतर त्यांना शिक्षा भोगण्यासाठी १० सप्टेंबरपर्यंत आत्मसमर्पण करण्याचे आदेश देण्यात आले होते. मात्र, या निर्णयाविरोधात राजपाल यादव यांनी सर्वोच्च न्यायालयात याचिका दाखल केली.
सरन्यायाधीश जॉयमाल्य बागची आणि न्यायमूर्ती व्ही. मोहना यांच्या खंडपीठासमोर या याचिकेवर सुनावणी झाली. तोंडी सुनावणीनंतर न्यायालयाने राजपाल यादव यांना आत्मसमर्पण करण्यापासून सशर्त सूट दिली. मात्र, त्यासाठी ५ कोटी रुपये जमा करण्याची अट ठेवण्यात आली आहे.
आता राजपाल यादव यांना ही रक्कम ९ सप्टेंबरपर्यंत जमा करावी लागणार असून, त्यानंतर १५ सप्टेंबरला या प्रकरणावर पुढील सुनावणी होणार आहे.
