शुक्रवार, 23 ऑक्टोबर 2026
Chandrapur News: तळोधीतील नळाच्या पाण्यात जंतूसदृश घटक? ग्रामस्थ आक्रमक, ग्रामपंचायतीला २४ तासांचा अल्टिमेटम
यासंदर्भात नागरिकांनी व्हिडिओ तसेच अन्य पुरावे ग्रामपंचायत प्रशासनाला दाखवून समस्या निदर्शनास आणून दिली. मात्र, अद्यापही या समस्येवर कायमस्वरूपी तोडगा निघाला नसल्याने ग्रामस्थांमध्ये संतापाचे वातावरण आहे. पिण्याच्या पाण्यासारख्या मूलभूत सुविधेबाबत प्रशासनाने गांभीर्याने लक्ष देणे आवश्यक असताना दुर्लक्ष होत असल्याचा आरोप नागरिकांनी केला आहे.
या प्रकरणाची गंभीर दखल घेऊन संबंधित ग्रामपंचायत अधिकारी आणि प्रशासक यांच्या कार्यपद्धतीची चौकशी करावी, तसेच गावातील पाणीपुरवठ्याची तपासणी करून शुद्ध पाणी उपलब्ध करून द्यावे, अशी मागणी नागरिकांनी केली आहे. यासंदर्भात पंचायत समितीचे गटविकास अधिकारी (बीडीओ) आणि जिल्हा परिषद प्रशासनाकडे तक्रार करण्यात आल्याचे ग्रामस्थांनी सांगितले.
ग्रामपंचायत प्रशासनाकडून घरपट्टी आणि पाणीपट्टीची वसुली केली जाते, मात्र त्या तुलनेत नागरिकांना मूलभूत सुविधा मिळत नसल्याची भावना ग्रामस्थांनी व्यक्त केली आहे. कर वसुली करताना प्रशासन तत्पर असते, मग नागरिकांना शुद्ध पाणी उपलब्ध करून देण्याच्या बाबतीत ही उदासीनता का, असा सवाल महिलांसह ग्रामस्थांनी उपस्थित केला आहे. नागरिकांच्या तक्रारींची दखल घेऊन तातडीने कार्यवाही करावी, अशी मागणीही करण्यात येत आहे.
आम्ही वारंवार सूचना करूनही ग्रामपंचायत प्रशासन समस्येकडे जाणीवपूर्वक दुर्लक्ष करीत आहे. समस्या सुटत नसतील तर ग्रामपंचायतीला कुलूप लावायचा ला वेड लागणार नाहि ग्रामपंचायत अधिकारी आणि प्रशासकांनी मुख्यालयी राहून तात्काळ पाणीपुरवठा सुरळीत करावा, अन्यथा भव्य आक्रोश मोर्चा काढू. – परिमल मदनकर, सामाजिक कार्यकर्ते, तळोधी
