बुधवार, 21 ऑक्टोबर 2026
नागपूर : हिंगणाच्या वानाडोंगरी परिसरातील स्कूल ऑफ स्कॉलर्स (एसओएस) कॉलेजच्या नवीन इमारतीचा स्लॅब कोसळल्याने (Slab Collapsed in Nagpur) एका सुरक्षारक्षकाचा त्याखाली दबून जागीच मृत्यू झाला. ही घटना शनिवारी सकाळी अकराच्या सुमारास घडली. घटनेच्या तीन तासानंतर जेसीबीच्या माध्यमातून मलबा हटविल्यानंतर मृतदेह बाहेर काढण्यात आला.
रवींद्र कामेश्वर उमरेडकर (49) रा. किन्ही धानोली असे मृत सुरक्षा रक्षकाचे नाव आहे. मिळालेल्या माहितीनुसार, उमरेडकर अनेक वर्षांपासून शाळेत सुरक्षा रक्षक होते. नेहमीप्रमाणे शनिवारीही सकाळी 7 वाजता ते कामावर आले. कॉलेजच्या गेटवर असलेल्या वह्यांड्यात खुर्ची टाकून बसले. या दरम्यान अचानक स्लॅबचा काही भाग त्यांच्यावर कोसळला. या घटनेने एकच खळबळ उडाली. आसपासचे लोक मदतीसाठी धावले आणि उमरेडकर यांना मलब्याखालून काढण्याचा प्रयत्न केला. मात्र, अपयश आले. कॉलेज व्यवस्थापनाकडून अग्निशमन विभागाला घटनेची माहिती देण्यात आली.
तीन तासांच्या प्रयत्नानंतर मृतदेह काढला बाहेर
अग्निशमन विभागाचे कर्मचारी घटनास्थळावर पोहोचले. दोन जेसीबीच्या माध्यमातून 3 तासांच्या प्रयत्नानंतर उमरेडकर यांचा मृतदेह मलब्याखालून बाहेर काढला. त्यांना तत्काळ शालिनी मेघे रुग्णालयात उपचारार्थ रवाना करण्यात आले. मात्र, डॉक्टरांनी तपासून मृत घोषित केले. उत्तरीय तपासणीनंतर त्यांचा मृतदेह कुटुंबीयांच्या स्वाधिन करण्यात आला. शाळेची इमारत 20 वर्षे जुनी असल्याचे सांगण्यात येत आहे. गेटच्या वर व्हरांडा बनवताना निकष पाळले गेले नाहीत, त्यामुळे तो भार सहन करू शकत नव्हता, अशी माहिती लोकांनी दिली.
