सोमवार, 19 ऑक्टोबर 2026
विशेष म्हणजे, गोकुळची सूत्रे हाती असलेल्या मंत्री हसन मुश्रीफ यांचे चिरंजीव आणि गोकुळचे माजी चेअरमन नावीद मुश्रीफ यांनाही पराभवाचा सामना करावा लागल्याने या निकालाची चर्चा अधिक रंगली आहे. या संपूर्ण लढतीत आमदार सतेज पाटील यांची रणनीती निर्णायक ठरल्याने तेच या निवडणुकीचे किंगमेकर ठरले आहेत.
या निवडणुकीत मुख्यमंत्री, दोन्ही उपमुख्यमंत्री, मंत्री, खासदार आणि आमदारांची प्रतिष्ठा पणाला लागली होती. महायुतीच्या नेत्यांनी एकत्रित ताकद उभी केली असताना सतेज पाटील यांनी विरोधकांची बाजू सांभाळत निवडणुकीत जोरदार लढत दिली. त्यामुळे ही निवडणूक केवळ दूध संघापुरती मर्यादित न राहता सत्ताधारी आणि विरोधकांमधील प्रतिष्ठेची लढाई बनली.
गोकुळच्या राजकारणात महत्त्वाची भूमिका बजावणारे मंत्री हसन मुश्रीफ यांचे चिरंजीव नावीद मुश्रीफ यांना पराभव पत्करावा लागल्याने महायुतीच्या गोटात या निकालाचे राजकीय अर्थ लावले जात आहेत. गोकुळच्या सत्ताकारणात प्रभाव असलेल्या नेतृत्वाला ठरावधारकांनी दिलेला हा कौल आगामी राजकीय समीकरणांच्या दृष्टीनेही महत्त्वाचा मानला जात आहे. विशेष म्हणजे मुख्यमंत्री देवेंद्र फडणवीस यांनी या निवडणुकीची सर्वस्वी जबाबदारी मंत्री हसन मुश्रीफ यांच्यावर सोपवली होती.
निवडणुकीच्या रणधुमाळीत सतेज पाटील यांनी केलेले ‘बिनआवाजाचा बॉम्ब फुटेल’ हे विधान पुन्हा आज चर्चेत आले. निकालाच्या पार्श्वभूमीवर त्यांच्या या विधानाची राजकीय वर्तुळात आठवण काढली गेली. निवडणुकीत महायुतीच्या मोठ्या राजकीय ताकदीला आव्हान देत सतेज पाटील यांनी आपली रणनीती प्रभावी ठरविल्याचे त्यांच्या समर्थकांनी एकच जल्लोष केला.
Gokul Milk Election: ‘गोकुळचे रंगा-बिल्ला’; कोल्हापुरच्या राजकारणात सोशल मीडियावर चिखलफेक!
निवडणुकीदरम्यान शपथा, गंडादोरे आणि देवतांच्या छायाचित्रांवर भंडारा लावून मतदानासाठी दबाव आणल्याच्या आरोपांचीही उघडपणे चर्चा झाली. अनेक कारभारी सभासदांनी या शपथा विरोधात उघडपणे आपली भूमिका मांडली. या पार्श्वभूमीवर ठरावधारकांनी दिलेला निकाल हा निवडणुकीतील सर्वाधिक चर्चेचा मुद्दा ठरला आहे.
या निकालामुळे गोकुळच्या सत्तासमीकरणांबाबत आता नव्याने गणीत मांडले जाईल . महायुतीच्या एकत्रित ताकदीसमोर सतेज पाटील यांनी दिलेली लढत आणि नावीद मुश्रीफ यांच्या सह जेष्ठ संचालकांचा झालेला पराभव यामुळे जिल्ह्यातील राजकीय वातावरण भविष्यात वेगळ्याच वळणावर जाऊ शकते.
Pradeep Purnekar Case : टायगर श्रॉफसाठी एकनाथ शिंदेंची तातडीची धाव, पण पूर्णेकरांना न्याय कधी?
मंत्री चंद्रकांत पाटील यांनी गोकुळ मतदानानंतर प्रसारमाध्यमांना बोलताना प्रतिक्रिया दिली होती. गोकुळमध्ये २५ पैकी २५ जागा महायुती जिंकून येईल असे वक्तव्य केले होते. महायुतीच्या सर्वच नेत्यांनी धाडसी आत्मविश्वास दाखवून आम्हीच गोकुळचे सर्वेसर्वा आहोत असे सुचित केले होते. मात्र ठरावधारकांनी महायुतीच्या नेत्यांना जमिनीवर आणले असे या निकालावरून दिसून येते.
गोकुळची निवडणूक ही केवळ दूध संघाची लढाई न राहता राजकीय प्रतिष्ठेची कसोटी ठरली. महायुतीच्या नेत्यांची ताकद आणि सतेज पाटील यांची रणनीती यांच्यातील संघर्षात ठरावधारकांचा कौल निर्णायक ठरला. त्यामुळे या निवडणुकीनंतर कोल्हापूरच्या राजकारणात पुढे कोणती नवी समीकरणे आकाराला येतात, याकडे सर्वांचे लक्ष लागले आहे.
