सोमवार, 31 ऑगस्ट 2026
: पुणे जिल्ह्यात १,३७२ नवीन 'आपले सरकार' केंद्रांना मंजुरी; अर्ज करण्याची आज अंतिम मुदत!
गेल्या काही वर्षांत ग्रामीण भागातील लोकसंख्येत मोठी वाढ झाल्याने गावागावांत शासकीय ऑनलाईन सेवांची मागणी वाढली होती. जिल्ह्यात यापूर्वी २०२२ मध्ये नवीन केंद्रांसाठी प्रक्रिया राबविण्यात आली होती. त्यानंतर सलग चार वर्षे नवीन केंद्रांना मंजुरी न मिळाल्याने स्थानिक नागरिक व लोकप्रतिनिधींकडून सातत्याने पाठपुरावा केला जात होता. याची दखल घेत राज्य शासनाने ग्रामीण भागात १ हजार ३७२ नवीन केंद्रांना हिरवा कंदील दाखवला आहे.
यापूर्वी ‘आपले सरकार केंद्र मिळविण्यासाठी असलेल्या काही किचकट अटी व शर्ती शिथिल करण्यात आल्या आहेत. प्रत्येक गावात शासकीय सेवा उपलब्ध व्हाव्यात आणि स्थानिक तरुणांना स्वयंरोजगाराची संधी मिळावी, या उद्देशाने नियमावली अधिक सुलभ करण्यात आली आहे. या केंद्रांसाठी अर्ज प्रक्रिया पूर्णपणे विनामूल्य ठेवण्यात आली आहे.
केंद्रचालकांच्या निवडीसाठी पारदर्शक पद्धत अवलंबण्यात येणार असून १०० गुणांचे मूल्यमापन निश्चित केले आहे. यामध्ये शैक्षणिक पात्रता, संगणक व डिजिटल साक्षरता, कार्यालयासाठी उपलब्ध पायाभूत सुविधा, आर्थिक क्षमता, पूर्वानुभव, व्यवसाय आराखडा, स्थानिक उद्योजकता आणि चारित्र्य पडताळणी या निकषांवर आधारित गुणांकन केले जाईल. मुलाखतीनंतर सर्वाधिक गुण मिळवणाऱ्या पात्र उमेदवारांना केंद्राचे वाटप केले जाईल. ग्रामीण भागातील निवड प्रक्रिया सुरळीत पार पडल्यानंतर पुणे शहरातील ‘आपले सरकार केंद्रांसाठी स्वतंत्र जाहिरात प्रसिद्ध केली जाणार असल्याची माहिती प्रशासनाने दिली आहे.
अर्ज स्वीकारण्याची अंतिम मुदतः ३१ ऑगस्ट
अर्जाची छाननी १ ते ११ सप्टेंबर
पात्र उमेदवारांच्या मुलाखतीः १५ ते २४ सप्टेंबर
प्राथमिक निवड यादी प्रसिद्धीः ५ ऑक्टोबर
हरकती व सूचना नोंदविण्याची मुदतः ५ ते ९ ऑक्टोबर
अंतिम निवड यादी: २६ ऑक्टोबर
