रत्नागिरी: कोकण रेल्वेने प्रवास करणाऱ्यांसाठी एक महत्त्वाची बातमी समोर आली आहे. कोकण रेल्वेवर (Konkan Railway) उद्यापासून (21 जून 2023) तीन तासांसाठी मेगाब्लॉक (Mega Block) घेण्यात येणार आहे. रत्नागिरी (Ratnagiri) ते वैभववाडी (Vaibhavwadi) दरम्यान देखभाल आणि दुरुस्तीच्या कामांसाठी हा तीन दिवसांचा मेगाब्लॉक (MegaBlock Updates) घेतला जाणार आहे. सकाळी 7.30 ते 10.30 या कालावधीत तीन तासांचा मेगाब्लॉक घेण्याचा निर्णय कोकण रेल्वेकडून घेण्यात आला आहे.
कोकण रेल्वे मार्गावर रत्नागिरी ते वैभववाडी दरम्यान मालमत्तेच्या देखभालीच्या कामासाठी उद्या (बुधवार) सकाळी 7.30 ते 10.30 या कालावधीत तीन तासांचा मेगाब्लॉक घेण्याचा निर्णय कोकण रेल्वेनं घेतला आहे. यामुळे कोकण रेल्वे मार्गावर धावणाऱ्या तीन गाड्यांच्या वेळापत्रकावर याचा परिणाम होणार आहे.
कोणत्या गाड्यांच्या वेळापत्रकात होणार बदल?
रत्नागिरी (Ratnagiri News) ते सिंधुदुर्ग (Sindhudurg) दरम्यान वैभववाडी या भागामध्ये घेण्यात येणाऱ्या मेगाब्लॉकमुळे गाडी क्र. 11003 दादर – सावंतवाडी रोड तुतारी एक्स्प्रेस (Tutari Express) रोहा ते रत्नागिरी दरम्यान 2.30 तास रोखून ठेवली जाईल. याशिवाय इतर गाड्या देखील थांबवल्या जातील. यात कोकण कन्या एक्सप्रेस (Konkan Kanya Express), मांडवी एक्स्प्रेस (Mandovi Express) या गाड्यांचा समावेश आहे.
गाडी क्र. 16346 तिरुवनंतपुरम सेंट्रल – लोकमान्य टिळक (टी) नेत्रावती एक्सप्रेस (Netravati Express) जी 20 जूनला सुटणार आहे ती उडुपी – कणकवली विभागादरम्यान 3 तासांसाठी थांबवून ठेवली जाणार आहे.
गाडी क्र. 10106 दिवा एक्स्प्रेस सावंतवाडी रोड – कणकवली विभागादरम्यान 21 जून रोजी 30 मिनिटांसाठी रोखून ठेवली जाणार आहे.
दरम्यान, रेल्वे रूळ, ओव्हरहेड वायर, सिग्नल यंत्रणेची देखभाल दुरुस्ती, या कामांसाठी आज ट्रान्स हार्बरवर मेगाब्लॉक घेतला जाणार आहे. त्यामुळे प्रवाशांना प्रवास करताना होणाऱ्या अडथळ्यांमुळे आणि गैरसोयीबद्दल रेल्वे प्रशासन दिलगीरी व्यक्त केली आहे. तसेच, मेगाब्लॉकच्या कालावधीत कोकण रेल्वे मार्गानं प्रवास करणाऱ्या प्रवाशांनी वेळापत्रक पाहून बदलांविषयीची माहिती जाणून प्रवास करावा, असं आवाहन रेल्वेकडून करण्यात आलं आहे.
पावसाळी वेळापत्रक लागू
कोकण रेल्वे मार्गावर धावणाऱ्या तब्बल 37 गाड्यांचा वेग आजपासून मंदावणार आहे. कारण आजपासून कोकण रेल्वे मार्गावर पावसाळी वेळापत्रक लागू होणार आहे. त्यामुळे गाड्यांचा वेग साधारण 40 किलोमीटर प्रतितास असेल. पावसाळ्यात प्रवास सुरक्षित व्हावा, यासाठी वेगमर्यादा घालण्यात आली आहे.
कोकण रेल्वेने मान्सूनसाठी नवे वेळापत्रक जाहीर केले आहे. त्यानुसार सर्वच गाड्यांच्या वेळा बदलल्या आहेत. हे नवे वेळापत्रक 10 जून ते 31 ऑक्टोबरपर्यंत लागू असेल. या कालावधीत रेल्वेची वेगमर्यादा 40 ते 90 प्रतितास असणार आहे. तसेच सर्वच धोकादायक ठिकाणी 24 तास गस्त असणार आहे.
