शुक्रवार, 16 ऑक्टोबर 2026
Washim Chaddi Baniyan Gang Arrested
वाशिम: जिल्ह्यात रात्रीच्यावेळी बंद घरांचे कुलूप तोडून सोन्या-चांदीचे दागिने आणि रोकड चोरी करणाऱ्या कुख्यात आंतरराज्यीय चड्डी-बनियन टोळीला वाशिम स्थानिक गुन्हे शाखेने जेरबंद केले. या कारवाईमुळे जिल्ह्यात खळबळ उडाली असून, तब्बल ७घरफोडीचे गुन्हे उघडकीस आले. तसेच पोलिसांनी आरोपींकडून ६ लाख २५ हजार रुपयांचा मुद्देमाल हस्तगत केला. माहितीनुसार, वाशिम जिल्ह्यात चड्डी बनियन घालून हातात धारदार शस्त्रे घेऊन चोऱ्या करणाऱ्या या टोळीची मोठी दहशत निर्माण झाली होती. या घटनेचे गांभीर्य लक्षात घेऊन पोलिस अधीक्षक निकेश खाटमोडे यांनी स्थानिक गुन्हे शाखेचे पथक तयार केले.
Washim: कारंजा-वाशिम मार्गावर भीषण दुर्घटना! दोन मुख्याध्यापकांसह तिघांचा मृत्यू; परिसरात शोककळा
स्थानिक गुन्हे शाखेचे पोलिस निरीक्षक सुधाकर आडे यांच्या मार्गदर्शनाखाली पोलिसांनी तांत्रिक व गोपनीय माहितीच्या आधारे आरोपींचा शोध घेतला. या प्रकरणी बाबासाहेब कोल्हापुरे शिंदे (२७, रा. विरेगाव, ता. जि. जालना), संजय मारुती शिंदे (३५, रा. विरेगाव, ता. जि. जालना) या २ आरोपींना अटक केली. तसेच त्यांचा आणखी एक साथीदार निष्पन्न झाला असून, हे आरोपी वारंवार राहण्याचे ठिकाण बदलत असल्यामुळे आणि मोबाइलचा वापर करत नसल्यामुळे त्यांना पकडणे पोलिसांसमोर मोठे आव्हान निर्माण झाले होते.
मात्र, स्थानिक गुन्हे शाखेच्या पथकाने अहोरात्र रस्त्यांवर पाळत ठेवून शनिवारी त्यांना मोठ्या शिताफीने ताब्यात घेतले. विश्वासात घेऊन विचारपूस केली असता त्यांनी गुन्ह्यांची कबुली दिली. चौकशीदरम्यान मालेगाव, रिसोड, अनसिंग, वाशिम शहर, लोणार, चिखली (जि. बुलढाणा) येथे दाखल गुन्हाचा उलगडा झाला. सदर कारवाई पोलिस अधीक्षक निकेश खाटमोडे, अपर पोलिस अधीक्षक लता फड, उपविभागीय पोलिस अधिकारी रामकृष्ण पवार, स्थानिक गुन्हे शाखेचे पोलिस निरीक्षक सुधाकर आडे आणि मालेगाव पोलिस ठाण्याचे पोलिस निरीक्षक राजेश खेडकर यांच्या मार्गदर्शनाखाली सपोनि योगेश धोत्रे, सपोनि पांडुरंग इंगळे, पोलिस कर्मचारी गजानन झगरे, अशिष बिडवे, अमोल इरतकर, दीपक घुगे, संतोष वाप, अशोक कोठुळे आणि सुनील तायडे यांनी केली.
उघडकीस आलेल्या गुन्ह्यांपैकी मालेगाव पोलिस ठाण्यातील २ गुन्ह्यांमध्ये गेलेल्या मालापैकी ४१ ग्रॅम सोन्याचे व चांदीचे दागिने, असा एकूण ६ लाख २५ हजार रुपयांचा मुद्देमाल हस्तगत करण्यात आला. या आरोपींवर महाराष्ट्र व कर्नाटक राज्यात घरफोडीचे अनेक गुन्हे दाखल असून, पुढील तपास सुरू आहे.
