मंगळवार, 13 ऑक्टोबर 2026
BCCI कडून अरुणाचल प्रदेशच्या क्रिकेट संघांसाठी निवड चाचण्या; रणजीसह विविध स्पर्धांत खेळण्याचा मार्ग मोकळा होणार? सौजन्य : आयएएनएस
अरुणाचल प्रदेशच्या विविध पुरुष आणि महिला वयोगटांतील तसेच वरिष्ठ क्रिकेट संघांच्या निवडीसाठी भारतीय क्रिकेट नियामक मंडळाने (BCCI) निवड चाचण्यांचे आयोजन केले आहे. चालू देशांतर्गत क्रिकेट हंगामातील स्पर्धांमध्ये अरुणाचल प्रदेशचे संघ सहभागी होऊ शकतील, या उद्देशाने BCCIने हे पाऊल उचलले आहे.
अरुणाचल प्रदेशने अहमदाबाद येथे नागालँडविरुद्धचा पहिला रणजी करंडक सामना खेळला नव्हता. यापूर्वी विनू मांकड करंडक आणि १९ वर्षांखालील महिला टी-20 करंडक स्पर्धांमध्येही राज्याचा संघ सहभागी झाला नव्हता. अरुणाचल क्रिकेट असोसिएशनच्या (ACA) दोन गटांमधील वादामुळे हा पेच निर्माण झाला होता. यासंदर्भातील कायदेशीर अडचण गुवाहाटी उच्च न्यायालयाच्या इटानगर खंडपीठात सुरू आहे.
बीसीसीआयचे सचिव देवजीत सैकिया यांनी मंगळवारी एका वृत्तसंस्थेशी बोलताना अरुणाचल प्रदेशमध्ये निवड चाचण्या सुरू असल्याची माहिती दिली. बीसीसीआयच्या सर्वोच्च परिषदेचे सदस्य एम. खैरुल जमाल मजुमदार यांची या चाचण्यांसाठी संयोजक म्हणून नियुक्ती करण्यात आली आहे.
सैकिया म्हणाले की, राज्याबाहेरील काही स्वतंत्र निवडकर्त्यांच्या मदतीने अरुणाचल प्रदेशमध्ये निवड चाचण्या घेतल्या जात आहेत. या प्रक्रियेत राज्य क्रिकेट संघटना सहभागी नाही. बीसीसीआय स्वतः या चाचण्या घेत असून, आगामी रणजी करंडक आणि अन्य देशांतर्गत स्पर्धांमध्ये अरुणाचल प्रदेशचे संघ उतरवण्याचा प्रयत्न सुरू आहे.
ICC Awards : शुभमन आणि शेफाली ठरले आयसीसी ‘प्लेअर ऑफ द मंथ’चे मानकरी
आसाममधील स्वतंत्र निवडकर्त्यांच्या पथकाला खेळाडूंची निवड करण्याची जबाबदारी देण्यात आली आहे. या पथकात माजी खेळाडू सत्य गोपाल चक्रवर्ती, जयंत चौधरी आणि दीप बोरा यांचा समावेश आहे. चक्रवर्ती हे निवडकर्त्यांच्या पथकाचे अध्यक्ष आहेत.
रणजी करंडक, कर्नल सी. के. नायडू करंडक, वरिष्ठ महिला टी-२० करंडक आणि विजय मर्चंट करंडक या स्पर्धांमध्ये अरुणाचल प्रदेशचे संघ सहभागी होतील, याची खात्री करण्याचे काम या पथकाला देण्यात आले आहे.
Cricket: अनुष्का वाईकरची अष्टपैलू कामगिरी; डिलीजंट क्रिकेट क्लबने स्पर्धेत उघडले विजयाचे खाते!
अरुणाचल प्रदेशातील एका स्थानिक सूत्राने इटानगरमध्ये निवड चाचण्या सुरू असल्याच्या वृत्ताला दुजोरा दिला. मंगळवारी सकाळी ८ वाजल्यापासून इटानगर येथील दिल्ली पब्लिक स्कूलमध्ये पुरुष आणि महिला खेळाडूंसाठी या चाचण्या घेण्यात आल्या.
वरिष्ठ महिला संघ, पुरुषांचा १६ वर्षांखालील संघ, २३ वर्षांखालील संघ आणि वरिष्ठ पुरुष संघ निवडण्यासाठी या चाचण्या आयोजित करण्यात आल्या आहेत.
