शुक्रवार, 23 ऑक्टोबर 2026
PM Modi: पॅरिसमधील पहिल्या भव्य हिंदू मंदिराचे PM मोदींच्या हस्ते उद्घाटन; पतंप्रधान म्हटले, 'हे वसुधैव कुटुंबकमचे प्रतीक',VIDEO ( फोटो सौजन्य : सोशल मीडिया )
युरोपच्या सांस्कृतिक पटलावर भारताची प्राचीन अध्यात्मिक आणि सांस्कृतिक परंपरा अधिक प्रखरतेने चमकू लागली आहे. फ्रान्सची ऐतिहासिक राजधानी पॅरिस जवळील बुसी-सेंट-जॉर्ज (Bussy-Saint-Georges) येथे भव्य आणि नयनरम्य BAPS स्वामीनारायण हिंदू मंदिराचे प्राणप्रतिष्ठापन अत्यंत उत्साहपूर्ण वातावरणात पार पडले. या ऐतिहासिक प्रसंगी भारताचे पंतप्रधान नरेंद्र मोदी ( PM Modi) यांनी व्हिडिओ कॉन्फरन्सिंगच्या माध्यमातून आभासी उपस्थिती लावून संपूर्ण युरोपातील आणि जगभरातील सनातन प्रेमींना शुभेच्छा दिल्या.
पंतप्रधान नरेंद्र मोदी यांनी आपल्या संबोधनात स्पष्ट केले की, जरी ते भौतिकदृष्ट्या पॅरिसमध्ये उपस्थित नसले, तरी मन आणि हृदयाने ते या पवित्र वातावरणात लीन आहेत. हे मंदिर केवळ पूजेचे किंवा श्रद्धेचे ठिकाण नसून भारत आणि फ्रान्स या दोन महान राष्ट्रांमधील सांस्कृतिक समन्वयाचा, सहकार्याचा आणि जागतिक बंधुत्वाचा एक नवा आधारस्तंभ आहे. ‘वसुधैव कुटुंबकम’ म्हणजेच संपूर्ण जग हे एक कुटुंब आहे, या भारतीय तत्त्वज्ञानाचा संदेश हे मंदिर संपूर्ण युरोप खंडात पसरवेल असा विश्वास त्यांनी व्यक्त केला.
या मंदिराच्या स्थापत्यशैलीबद्दल बोलताना पंतप्रधानांनी एका अनोख्या पैलूवर प्रकाश टाकला. हे मंदिर खऱ्या अर्थाने ‘मेड इन इंडिया’ आणि ‘बिल्ट इन फ्रान्स’ चे एक आदर्श उदाहरण बनले आहे. मंदिराच्या उभारणीसाठी लागणारे नक्षीदार राजस्थान आणि भारतातील दगड कुशल कारागिरांनी भारतात अत्यंत कलात्मकतेने कोरले. त्यानंतर ते दगड फ्रान्समध्ये आणून तिथल्या आधुनिक अभियांत्रिकीच्या (Engineering) सहाय्याने अत्यंत अचूकतेने जोडण्यात आले. प्राचीन भारतीय शिल्पकला आणि फ्रेंच आधुनिक तंत्रज्ञानाचा हा मेळ शतकानुशतके दोन्ही देशांमधील मैत्रीची साक्ष देत राहील.
जागतिक घडामोडी संबंधित बातम्या वाचण्यासाठी येथे क्लिक करा : Germany: अंतराळ क्षेत्रात युरोपचा नवा अध्याय! जर्मन कंपनीच्या ‘स्पेक्ट्रम’ रॉकेटचे यशस्वी उड्डाण; 5 उपग्रह अवकाशात स्थापित
BAPS स्वामीनारायण संस्थेचे पूजनीय महंत स्वामी महाराज यांच्या अध्यात्मिक मार्गदर्शनाखाली पार पडलेल्या १३ दिवसीय ‘संस्कृती महोत्सवात’ हजारो भाविकांनी हजेरी लावली. प्रमुख स्वामी महाराजांनी भारताचा सांस्कृतिक वारसा जगभरात पोहोचवण्याचा जो संकल्प सोडला होता, त्याचाच हा विस्तार आहे. २०२४ मध्ये संयुक्त अरब अमिरातीतील (UAE) अबू धाबी येथे उभारण्यात आलेल्या भव्य स्वामीनारायण मंदिरानंतर आता पॅरिसमधील मंदिराची उभारणी ही जागतिक स्तरावरील भारतीय संस्कृतीच्या पुनरुत्थानाची नवीन पायरी मानली जात आहे.
It is a matter of great joy that BAPS Swaminarayan Hindu Mandir is being inaugurated in Paris.@BAPS https://t.co/PaXRoM0mkv — Narendra Modi (@narendramodi) September 6, 2026
credit – social media and Twitter
आपल्या भाषणात पंतप्रधानांनी फ्रान्स आणि भारत यांच्यातील शतकांपासून असलेल्या सलोख्याची आठवण करून दिली. पहिल्या आणि दुसऱ्या महायुद्धात फ्रान्सच्या भूमीवर भारतीय सैनिकांनी दिलेल्या बलिदानाचा इतिहास आजही तिथे जिवंत आहे. तसेच, फ्रेंच विद्वान रोमेन रोलँड यांनी स्वामी विवेकानंद आणि रामकृष्ण परमहंस यांच्या विचारांवर केलेले लेखन असो किंवा ‘श्री माँ’ (The Mother) यांचा पॅरिस ते पुदुचेरी असा झालेला अध्यात्मिक प्रवास असो, या सर्व घटनांनी उभय देशांतील जनतेला सातत्याने एकमेकांच्या जवळ आणले आहे.
पंतप्रधानांनी नमूद केले की, आयफेल टॉवरसमोर आंतरराष्ट्रीय योग दिनाला फ्रेंच नागरिकांकडून मिळणारा उदंड प्रतिसाद आणि फ्रेंच विद्वानांनी संस्कृत भाषेच्या प्रसारासाठी दिलेले योगदान हे भारत-फ्रान्स मैत्रीचे जिवंत पुरावे आहेत. चालू वर्ष २०२६ हे दोन्ही देश ‘भारत-फ्रान्स नवोन्मेष वर्ष’ (India-France Year of Innovation) म्हणून साजरे करत आहेत. अशा काळात हे मंदिर तंत्रज्ञान, संरक्षण आणि अंतराळ क्षेत्रासोबतच सांस्कृतिक बंध अधिक दृढ करेल.
जागतिक घडामोडी संबंधित बातम्या वाचण्यासाठी येथे क्लिक करा : Indonesia: इंडोनेशियात अनाक क्राकाटोआ ज्वालामुखीचा उद्रेक! 50 हजार फुटांपर्यंत राखेचे लोट; 209 उड्डाणे रद्द, 22 हजार प्रवासी अडकले
वैदिक मंत्र “समनं मनः सह चित्तमेषम्” चा संदर्भ देत पंतप्रधानांनी स्पष्ट केले की, लोकांची मने जोडणे हाच भारताचा मूळ विचार आहे. स्वामीनारायण संस्था नेहमीच भक्तीसोबतच मानवतेच्या सेवेसाठी अग्रेसर राहिली आहे. हे मंदिरदेखील येणाऱ्या काळात फ्रान्स आणि संपूर्ण युरोपमध्ये सामाजिक सेवा, आरोग्य, शिक्षण आणि नैसर्गिक आपत्तींच्या वेळी मदतीचे मुख्य केंद्र बनेल.
पॅरिसमधील हे मंदिर फ्रान्सची सांस्कृतिक विविधता आणखी समृद्ध करेल. पंतप्रधान मोदींनी BAPS संस्था, महंत स्वामी महाराज आणि जगभरातील कोट्यवधी भाविकांचे मनापासून अभिनंदन केले आणि भविष्यात जेव्हा संधी मिळेल, तेव्हा आपण स्वतः या मंदिराला भेट देऊन दर्शन घेऊ, असा मानसही व्यक्त केला.
