Iran-US War : पश्चिम आशियात युद्ध सुरु असतानाच डोनाल्ड ट्रम्प यांचा पंतप्रधान मोदींना फोन; सुमारे 40 मिनिटे झाली चर्चा... (संग्रहित फोटो)
वॉशिंग्टन : इराण-अमेरिका, इस्त्रायल या देशांत 40 दिवसांपेक्षा अधिक दिवस संघर्ष सुरु आहे. पाकिस्तानात अमेरिका आणि इराण यांच्या शिष्टमंडळात चर्चा झाली. मात्र, ही चर्चा फिस्टकल्याने युद्धावर तोडगा निघाला नाही. त्यानंतर आता पश्चिम आशियात युद्ध सुरु असतानाच अमेरिकेचे राष्ट्राध्यक्ष डोनाल्ड ट्रम्प यांचा पंतप्रधान नरेंद्र मोदींना फोन आला. या दोन्ही नेत्यांमध्ये सुमारे 40 मिनिटांची चर्चा झाल्याची माहिती दिली जात आहे.
डोनाल्ड ट्रम्प आणि पंतप्रधान मोदी यांच्या या चर्चेत पश्चिम आशियातील परिस्थिती आणि होर्मुझ सामुद्रधुनीवरील नाकेबंदीवरही चर्चा झाली. पंतप्रधान मोदींनी होर्मुझ सामुद्रधुनी खुली आणि सुरक्षित ठेवण्याच्या महत्त्वावर भर दिला. या वर्षी दोन्ही नेत्यांमधील हा तिसरा फोन कॉल होता. यापूर्वी पंतप्रधान मोदी आणि डोनाल्ड ट्रम्प यांच्यात मार्च महिन्याच्या अखेरीस फोन कॉल झाला होता.
दरम्यान, पंतप्रधान मोदींनी याबाबत ‘एक्स’वरही माहिती दिली. यामध्ये त्यांनी लिहिले, “माझे मित्र अध्यक्ष डोनाल्ड ट्रम्प यांचा मला फोन आला. आम्ही विविध क्षेत्रांतील द्विपक्षीय सहकार्यात झालेल्या महत्त्वपूर्ण प्रगतीचा आढावा घेतला. आम्ही सर्व क्षेत्रांमध्ये आमची व्यापक जागतिक धोरणात्मक भागीदारी आणखी मजबूत करण्यासाठी वचनबद्ध आहोत.”
होर्मुझ सामुद्रधुनी खुली ठेवण्यावर चर्चा
पंतप्रधान यांनी लिहिले की, “आम्ही होर्मुझ सामुद्रधुनी खुली ठेवण्यावर चर्चा केली. ती खुली आणि सुरक्षित ठेवण्याच्या महत्त्वावर आम्ही भर दिला. आम्ही विविध क्षेत्रांतील द्विपक्षीय सहकार्यात झालेल्या महत्त्वपूर्ण प्रगतीचा आढावा घेतला. आम्ही सर्व क्षेत्रांमध्ये आमची व्यापक जागतिक धोरणात्मक भागीदारी आणखी मजबूत करण्यासाठी वचनबद्ध आहोत”.
ट्रम्प-मोदी यांच्यात सकारत्मक चर्चा; अमेरिकी राजदूतांची माहिती
भारतातील अमेरिकी राजदूत सर्जिओ गोर यांनी दोन्ही नेत्यांमधील संभाषण अत्यंत सकारात्मक आणि फलदायी असल्याचे वर्णन केले. एका सोशल मीडिया पोस्टमध्ये गोर म्हणाले, “दोन्ही नेत्यांनी द्विपक्षीय सहकार्यावर चर्चा केली, ज्यात अनेक महत्त्वाच्या करारांचा समावेश आहे. येत्या काही दिवसांत आणि आठवड्यांत भारत आणि अमेरिका यांच्यात ऊर्जा क्षेत्रासह अनेक महत्त्वाचे करार अपेक्षित आहेत.”
