US Iran War: इराणची मुजोरी मोडली! अमेरिकेने डागली क्षेपणास्त्रे; 3 इराणी तेलवाहू जहाजे समुद्रात भस्मसात, ओमानच्या आखातात थरार

US Iran War: युद्धनौकांवरील क्षेपणास्त्र हल्ल्याला मोठे प्रत्युत्तर म्हणून, अमेरिकेच्या लष्कराने एका अचूक क्षेपणास्त्र हल्ल्याने इराणचे तीन कच्चे तेलवाहू जहाज कायमचे निकामी केले आहेत. अमेरिका आणि इराण यांच्यातील वाढत्या लष्करी तणावाच्या पार्श्वभूमीवर, पश्चिम आशियाई सागरी प्रदेशातील संघर्ष अधिक तीव्र झाला आहे.

अमेरिकी नौदलाची मोठी कारवाई… इराणचे ३ तेलवाहू जहाजं जळून खाक, विमानवाहू जहाजावरील हल्ल्याचा बदला घेतला ( फोटो सौजन्य : सोशल मीडिया )

Follow Us:

Follow Us:

• इराणच्या ३ तेलवाहू जहाजांवर अमेरिकेचा हल्ला
• अमेरिकन विमानवाहू जहाजांचा बचाव
• इराणच्या ‘शॅडो नेटवर्क’वर मोठा आर्थिक फटका

पश्चिम आशिया आणि मध्य पूर्वेतील सागरी प्रदेशात अमेरिका आणि इराण (US Iran War) यांच्यातील लष्करी संघर्ष आता अत्यंत भीषण व धोकादायक टप्प्यावर पोहोचला आहे. आंतरराष्ट्रीय जलमार्गावर गस्त घालणाऱ्या अमेरिकेच्या नौदलावर इराणने क्षेपणास्त्र हल्ला करण्याचा प्रयत्न केल्यानंतर, अमेरिकन सैन्याने जोरदार पलटवार केला आहे. अमेरिकेच्या सेंट्रल कमांडने (CENTCOM) दिलेल्या अधिकृत माहितीनुसार, अमेरिकन हवाई दल आणि नौदलाने एका विशेष मोहिमेत इराणच्या ‘शॅडो नेटवर्क’चा भाग असलेली तीन महाकाय कच्च्या तेलाची जहाजे (Oil Tankers) यशस्वीरीत्या क्षेपणास्त्रे डागून कायमची निकामी व नष्ट केली आहेत.

हा सागरी संघर्ष तेव्हा पेटला जेव्हा इराणच्या ‘इस्लामिक रिव्होल्यूशनरी गार्ड कॉर्प्स’ने (IRGC) आंतरराष्ट्रीय सागरी हद्दीत तैनात असलेल्या अमेरिकेच्या एका महाकाय विमानवाहू जहाजाला (Aircraft Carrier) आणि गाईडेड-मिसाइल डिस्ट्रॉयर युद्धनौकेला लक्ष्य करून बॅलिस्टिक क्षेपणास्त्रे डागली. मात्र, अमेरिकेच्या अत्याधुनिक नौदल संरक्षण यंत्रणेने ही सर्व क्षेपणास्त्रे हवेतच नष्ट केली. या हल्ल्यात अमेरिकेचे कोणतेही सैनिक जखमी झाले नाहीत किंवा युद्धनौकांचे नुकसान झाले नाही. परंतु, आपल्या सैन्यावर झालेला हा हल्ला अमेरिकेने अत्यंत गंभीरपणे घेतला आणि काही तासांतच प्रत्युत्तराची मोठी कारवाई केली.

तीन इराणी टँकर्सवर अचूक क्षेपणास्त्र हल्ले

सेंटकॉमने जारी केलेल्या निवेदनानुसार, अमेरिकन लष्कराने इराणच्या तेल वाहतूक नेटवर्कला लक्ष्य करत तीन वेगवेगळ्या ठिकाणी ही धडक कारवाई केली:

1. M/T Downy (एम/टी डाउनी): इराणच्या मुख्य तेल पुरवठा केंद्र असलेल्या खारग बेटाजवळ (Kharg Island) नांगरलेल्या या टँकरवर अचूक क्षेपणास्त्र डागून त्याला पूर्णपणे निकामी करण्यात आले.
2. M/T Stark 1 (एम/टी स्टार्क १): जास्क (Jask) किनाऱ्याजवळ असलेल्या या दुसऱ्या तेलवाहू जहाजालाही क्षेपणास्त्र हल्ल्यात उद्ध्वस्त करण्यात आले.
3. M/T Kylo (एम/टी कायलो – नॉक्सन): ओमानच्या आखातात कार्यरत असलेल्या या तिसऱ्या मोकळ्या टँकरला लक्ष्य करण्यापूर्वी अमेरिकन सैन्याने त्याच्या कर्मचाऱ्यांना तीन मिनिटांचा इशारा देऊन जहाज रिकामे करण्यास सांगितले. त्यानंतर या जहाजावर भीषण हल्ला करून त्याला समुद्रात बुडवण्यात आले.

जागतिक घडामोडी संबंधित बातम्या वाचण्यासाठी येथे क्लिक करा : Russia-Ukraine War: कीव, मॉस्कोचे हल्ले थांबले! पुतिन यांनी घेतली ट्रम्पच्या दूतांची भेट; वॉशिंग्टनला दिला ‘हा’ महत्त्वाचा संदेश

इराणचे ‘शॅडो नेटवर्क’ आणि आर्थिक नाकेबंदी

अमेरिकन लष्करी अधिकाऱ्यांच्या मते, हे तीनही टँकर इराणच्या अब्जावधी डॉलर्स किमतीच्या गुप्त “शॅडो नेटवर्क”चा (Shadow Network) भाग होते. इराण आंतरराष्ट्रीय निर्बंधांना बगल देऊन बेकायदेशीरपणे कच्च्या तेलाची विक्री करण्यासाठी या नेटवर्कचा वापर करत होता. या तेल व्यापारातून मिळणाऱ्या अब्जावधी रुपयांचा निधी इराण आपल्या लष्करी कारवायांना आणि मध्य पूर्वेतील आपल्या हस्तक (Proxy) दहशतवादी संघटनांना देण्यासाठी वापरत होता. अमेरिकेने हे आर्थिक स्रोत तोडण्यासाठीच ही थेट कारवाई केली आहे.

ॲडमिरल ब्रॅड कूपर यांचा कडक इशारा

सेंटकॉमचे कमांडर ॲडमिरल ब्रॅड कूपर यांनी या कारवाईनंतर इराणला थेट अन् कडक शब्दांत इशारा दिला आहे. ते म्हणाले, “इराणच्या रिव्होल्यूशनरी गार्ड्सने एक गोष्ट स्पष्टपणे लक्षात ठेवावी; जर तुम्ही आमच्या दोन जहाजांवर हल्ल्याचा प्रयत्न कराल, तर आम्ही तुम्हाला अधिक मोठा आर्थिक फटका देवू आणि तुमची तीन जहाजे उडवून देऊ. अमेरिकन सैनिकांच्या सुरक्षेसाठी आम्ही मागेपुढे पाहाणार नाही आणि गरज पडल्यास इराणचा उर्वरित तेल ताफाही समुद्रात गाडून टाकू.”

जागतिक घडामोडी संबंधित बातम्या वाचण्यासाठी येथे क्लिक करा : Africa Continent: 500 वर्षांनंतर जगाचा नवा नकाशा! आफ्रिका खंड युरोप अन् अमेरिकेपेक्षा मोठा; 164 देशांचा UN मध्ये पाठिंबा

होर्मुझच्या सामुद्रधुनीत जागतिक चिंतेचे ढग

होर्मुझची सामुद्रधुनी (Strait of Hormuz) ही जगातील सर्वात महत्त्वाची तेल वाहतूक मार्गिका मानली जाते. जगातील एकूण कच्च्या तेलाच्या व्यापारापैकी पाचवा भाग याच मार्गावरून होतो. लारक बेटावरील लष्करी कारवाया आणि आता तीन महाकाय टँकर्सवर झालेल्या या प्रत्युत्तराच्या हल्ल्यांमुळे या मार्गावरील वाहतूक ठप्प होण्याचा धोका निर्माण झाला आहे. अमेरिका आणि इराणमधील या थेट लष्करी संघर्षाने आंतरराष्ट्रीय स्तरावर इंधनाचे दर गगनाला भिडण्याची आणि जागतिक ऊर्जा पुरवठ्याची साखळी विस्कळीत होण्याची दाट शक्यता निर्माण झाली आहे.

Web Title: Us iran war us navy destroys three iranian oil tankers in retaliation to missile attack

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com