रविवार, 11 ऑक्टोबर 2026
(फोटो सौजन्य-AI एआय)
1.डेन्झा
चीनची बीवायडी कंपनी आपल्या प्रीमियम डेन्झा ब्रँडसह 2026 मध्ये भारतीय मार्केटमध्ये प्रवेश करण्याच्या तयारीत आहे. या ब्रँडच्या पोर्टफोलिओमध्ये डी9 एमपीव्ही आणि झेड9 शूटिंग ब्रेक यांसारख्या गाड्यांचा समावेश आहे. डी9 ही आलिशान एमपीव्ही असून तिची स्पर्धा एमजी एम9सारख्या मॉडेलशी होऊ शकते. झेड9मध्ये स्पोर्टी डिझाइन आणि प्रीमियम फीचर्सवर भर देण्यात आला आहे. डेन्झा एन8, एन8एल आणि एन9 या मोठ्या एसयूव्हीही विकते. याशिवाय झेड नावाची इलेक्ट्रिक स्पोर्ट्स कारही कंपनीने सादर केली आहे. भारतात सुरुवातीला डी9 आणि झेड9 येण्याची अपेक्षा आहे. पण या गाड्या पूर्ण इलेक्ट्रिक असतील की प्लग-इन हायब्रिड, याबाबत अद्याप स्पष्ट माहिती नाही.
2.टाटा अविन्या
टाटा मोटर्सने अविन्या हा स्वतंत्र प्रीमियम इलेक्ट्रिक कार ब्रँड विकसित करण्याची योजना आखली आहे. या ब्रँडची पहिली इलेक्ट्रिक कार 2027 च्या दुसऱ्या सहामाहीत सादर होण्याची शक्यता आहे. पहिली गाडी आल्यानंतर पुढील 1 ते 2 वर्षांत दुसरे मॉडेलही येऊ शकते. कंपनीच्या नियोजनानुसार मार्च 2031 पर्यंत टाटा.ईव्ही आणि अविन्या या ब्रँड्सअंतर्गत एकूण 10 इलेक्ट्रिक मॉडेल्स आणण्याचे उद्दिष्ट आहे. अविन्याची पहिली कार सी- किंवा डी-सेगमेंटमधील इलेक्ट्रिक एसयूव्ही असू शकते. तिची संभाव्य एक्स-शोरूम किंमत 30 ते 35 लाख रुपये असण्याचा अंदाज आहे. नव्या मल्टी-एनर्जी प्लॅटफॉर्मवर आधारित या कारमध्ये प्रीमियम डिझाइन, आधुनिक टेक्नोलॉजी आणि आरामदायी केबिनला महत्त्व मिळू शकते.
3.जेनेसिस
ह्युंदाईचा लग्झरी ब्रँड जेनेसिस 2027 च्या दुसऱ्या सहामाहीत भारतात दाखल होण्याची शक्यता आहे. 2015 मध्ये स्थापन झालेल्या या ब्रँडकडे जी70, जी80, जी90, जीव्ही60, जीव्ही70 आणि जीव्ही80सह अनेक मॉडेल्स आहेत. यापैकी जीव्ही80 ही बीएमडब्ल्यू एक्स5ला टक्कर देऊ शकणारी प्रीमियम एसयूव्ही आहे, तर जीव्ही80 कूपे स्पोर्टी लूकसह येते. या गाड्या भारतात सुरुवातीच्या मॉडेल्सपैकी असू शकतात. कंपनी आयात केलेल्या पार्ट्सचे भारतात असेंब्ली करून किंमत स्पर्धात्मक ठेवण्याचा प्रयत्न करू शकते. त्यामुळे येत्या काळात भारतीय लग्झरी कार मार्केटमध्ये स्पर्धा वाढण्याची शक्यता आहे.
