जॉन्सन अँड जॉन्सन बेबी पावडरचा सुगंध आला की अनेकजण आपल्या बालपणात हरवून जातात. आजही अनेक महिला लहान मुले जॉन्सन अँड जॉन्सनच्या बेबी पावडरचा उपयोग करतात. मात्र येत्या काही दिवसात ही बेबी पावडर आपल्याला दुकानांमध्ये विक्रीसाठी पहायला मिळणार नाही. कारण ही बेबी पावडर बनवणाऱ्या जॉन्सन अँड जॉन्सन कंपनीने पावडरचे उत्पादन आणि जागतिक बाजारपेठेतील विक्री बंद करण्याचा मोठा निर्णय घेतला आहे.
अनेक महिला आणि लहान मुलं जॉन्सन अँड जॉन्सनच्या बेबी पावडरचा वापर करतात. परंतु या पावडरमुळे कर्करोगाचा धोका आहे, असे आरोप करण्यात आले होते. याविरोधात अनेक न्यायालयात अनेक खटले दाखल झाले आहेत. याशिवाय जॉन्सन अँड जॉन्सन बेबी पावडरचा वापर केल्यामुळे गर्भाशयाचा कर्करोग झाल्याचा आरोपही काही महिलांनी केला आहे. याआरोपांमुळे कंपनीला मोठं नुकसान सोसावे लागत आहे.
जॉन्सन अँड जॉन्सन बेबी पावडरवरील आरोपांमुळे या उत्पादनाच्या विक्रीमध्ये गेल्या काही वर्षांपासून मोठी घट झाली आहे. जागतिक स्तरावर व्यसायाचा विचार करता कंपनीनं २०२३ पर्यंत बेबी पावडरचं उत्पादन आणि विक्री थांबवण्याचा निर्णय घेतला आहे. कंपनीनं पोर्टफोलिओ मुल्यांकनानंतर हा निर्णय घेतला आहे. यामध्ये भौगोलिक प्रदेश, उत्पादनांची मागणी आणि ग्राहकांचा कल या घटकांचा अभ्यास केला जातो. जॉन्सन अँड जॉन्सन कंपनीवर २०२० मध्ये बेबी पावडरमध्ये कर्करोगास कारणीभूत घटक असल्याचा आरोप करण्यात आला होता. कंपनीविरोधात हजारो खटले दाखल करण्यात आले. यानंतर कंपनीने अमेरिका आणि कॅनडामधून बेबी पावडरचे उत्पादन हटवले आहे.
कंपनीकडून आरोपांचं खंडन
दरम्यान जॉन्सन अँड जॉन्सन कंपनीनं आरोपाचं वारंवार आरोपांचं खंडन केलं आहे. कंपनीनं म्हटलं आहे की त्यांच्या उत्पादनामध्ये कर्करोगास कारणीभूत ठरणारे कोणतेही घटक नाहीत. पावडरमधील सर्व घटक सुरक्षित असल्याचं कंपनीचं म्हणणं आहे.
कंपनीने दिला २०० कोटी डॉलरचा दंड
अमेरिकन न्यायालयात जॉन्सन अँड जॉन्सन कंपनीविरोधात २२ याचिका दाखल करण्यात आल्या होत्या. यामध्ये न्यायालयाने कंपनीविरोधात निकाल देत जॉन्सन अँड जॉन्सन कंपनीला दंड ठोठावला होता. यामध्ये कंपनीला २०० कोटी डॉलरचा दंड द्यावा लागला आहे.
