मंगळवार, 20 ऑक्टोबर 2026
सौजन्य फोटो - सोशल मिडीया
डोंबिवली : बहिणीला घटस्फोट दिल्याच्या रागातून मेव्हण्याची हत्या करून मृतदेह रेल्वे रुळांवर टाकल्याच्या प्रकरणात तब्बल २८ वर्षांनंतर मोठी कारवाई करण्यात आली आहे. डोंबिवली आणि कोपर रेल्वे स्थानकांदरम्यान १९९८ मध्ये घडलेल्या या हत्येप्रकरणी डोंबिवली जीआरपी पोलिसांनी मुख्य आरोपी संदीप कृष्णन याला बिहारमधून अटक केली आहे. या प्रकरणातील अन्य दोन आरोपी अद्याप फरार असून पोलीस त्यांचा शोध घेत आहेत.
१४ डिसेंबर १९९८ रोजी डोंबिवली आणि कोपर रेल्वे स्थानकांदरम्यान रेल्वे रुळांवर एका व्यक्तीचा मृतदेह आढळून आला होता. सुरुवातीला हा रेल्वे अपघात असल्याचा संशय व्यक्त करण्यात आला. मात्र, तपासादरम्यान मृत व्यक्ती शैलेश मोरे असल्याची माहिती समोर आली. त्यांचा मृत्यू अपघाती नसून हत्या झाल्याचा संशय बळावल्याने पोलिसांनी हत्येचा गुन्हा दाखल केला. डोंबिवली रेल्वे पोलिसांनी दिलेल्या माहितीनुसार, शैलेश मोरे यांनी संदीप कृष्णन याच्या बहिणीला घटस्फोट दिल्यामुळे त्यांच्यात वाद झाला होता. याच रागातून संदीप कृष्णन आणि त्याचे दोन साथीदार विनोद यादव व विनेश कृष्णन यांनी पार्टीच्या बहाण्याने एकत्र येत शैलेश मोरे यांची दगडाने ठेचून हत्या केल्याचा आरोप आहे.
हत्येनंतर हा प्रकार अपघात असल्याचे भासवण्यासाठी शैलेश मोरे यांचा मृतदेह रेल्वे रुळांवर टाकण्यात आल्याचे तपासात समोर आले. आरोपी फरार झाल्याने या प्रकरणाच्या तपासाला मोठा कालावधी लागला. तब्बल २८ वर्षांनंतर मुख्य आरोपी पोलिसांच्या हाती लागल्याने या जुन्या प्रकरणाला पुन्हा महत्त्वाचे वळण मिळाले आहे.
डोंबिवली जीआरपीचे वरिष्ठ पोलीस निरीक्षक बाबासाहेब थोरात यांच्या मार्गदर्शनाखाली पोलिसांनी संदीप कृष्णन याचा शोध घेत त्याला बिहारमधून अटक केली. अटकेनंतर त्याला कल्याण न्यायालयात हजर करण्यात आले. न्यायालयाने त्याला पोलीस कोठडी सुनावल्याची माहिती आहे. दरम्यान, या प्रकरणातील विनोद यादव आणि विनेश कृष्णन हे अन्य दोन आरोपी अद्याप फरार आहेत. त्यांचा शोध सुरू असून, त्यांनाही अटक करण्यासाठी पोलीस प्रयत्न करत आहेत. २८ वर्षांपूर्वी घडलेल्या या हत्येतील मुख्य आरोपीला अटक झाल्याने तपासाला गती मिळण्याची शक्यता आहे. आता उर्वरित आरोपी कधी सापडतात आणि पुढील तपासात कोणती माहिती समोर येते, याकडे लक्ष लागले आहे.
Ans: शैलेश मोरे यांनी आरोपीच्या बहिणीला घटस्फोट दिल्याच्या रागातून हत्या करण्यात आल्याचा आरोप आहे.
Ans: विनोद यादव आणि विनेश कृष्णन हे अन्य दोन आरोपी असून, त्यांचा शोध सुरू आहे.
Ans: १४ डिसेंबर १९९८ रोजी डोंबिवली आणि कोपर रेल्वे स्थानकांदरम्यान रेल्वे रुळांवर त्यांचा मृतदेह आढळला होता.
