शुक्रवार, 16 ऑक्टोबर 2026
Meerut Snakebite Murder Case : पत्नी आणि प्रियकराला फाशी; न्यायाधीशांनी सावित्री-यमराजांचा का केला उल्लेख? सौजन्य : सोशल मीडिया
उत्तर प्रदेशातील मेरठ येथील चर्चित सर्पदंश हत्याकांडात (Meerut Snakebite Murder Case) पत्नी रविता आणि तिचा प्रियकर अमरदीप यांना न्यायालयाने मृत्युदंडाची शिक्षा सुनावली आहे. पती अमित कश्यप उर्फ मिक्की कश्यप याची हत्या करून ती सापाच्या दंशामुळे झाल्याचा बनाव रचल्याचा त्यांच्यावर आरोप होता. शिक्षा सुनावण्यापूर्वी न्यायाधीशांनी सावित्री आणि यमराज यांच्या पौराणिक कथेचा संदर्भ दिल्याने या निकालाची चर्चा सुरू झाली आहे.
मेरठमधील बहसूमा परिसरातील अकबरपूर सादात गावातील अमित कश्यप हत्याप्रकरणात अपर जिल्हा आणि सत्र न्यायाधीश (एडीजे-12) जयवीर सिंह नागर यांच्या न्यायालयाने रविता आणि अमरदीप यांना हत्या व पुरावे नष्ट केल्याप्रकरणी दोषी ठरवले. न्यायालयाने दोघांना मृत्युदंडाची शिक्षा सुनावली.
शिक्षा सुनावण्यापूर्वी न्यायाधीशांनी भारतीय संस्कृती आणि पौराणिक कथांचा संदर्भ दिला. सावित्रीने आपल्या पतीचे प्राण वाचवण्यासाठी यमराजांशी संघर्ष केल्याच्या कथेकडे लक्ष वेधत त्यांनी या प्रकरणातील पत्नीच्या कृत्याशी त्याची तुलना केली. अधर्माचा धर्मावर विजय होऊ शकत नाही, असा आशयही त्यांनी व्यक्त केल्याचे वृत्तात नमूद आहे.
ही घटना 13 एप्रिल 2025 रोजी उघडकीस आली. अमित कश्यप याचा मृतदेह त्याच्या बिछान्यावर आढळला. मृतदेहाखाली जिवंत साप होता. अमितच्या शरीरावर साप चावल्याच्या सुमारे दहा खुणा आढळल्याने सुरुवातीला सर्पदंशामुळे त्याचा मृत्यू झाल्याचा संशय व्यक्त करण्यात आला.
रवितानेही पतीचा मृत्यू साप चावल्यामुळे झाल्याचे भासवण्याचा प्रयत्न केल्याचा आरोप आहे. मात्र, शवविच्छेदन अहवालातून वेगळेच सत्य समोर आले.
शवविच्छेदन अहवालानुसार अमितचा मृत्यू सर्पदंशामुळे नव्हे, तर गुदमरल्यामुळे झाला होता. त्याचा गळा, नाक आणि तोंड दाबण्यात आले होते. या हल्ल्यात त्याच्या मानेतील हायॉइड हाड आणि थायरॉइड कार्टिलेजचे नुकसान झाल्याचेही समोर आले.
पोलिसांच्या तपासात रविता आणि अमरदीप यांच्यात घटनेच्या आधीच्या 24 तासांत तब्बल 51 वेळा फोनवर संभाषण झाल्याचे निष्पन्न झाले. वैद्यकीय आणि डिजिटल पुराव्यांमुळे सर्पदंशाचा बनाव रचून हत्या केल्याचा आरोप अधिक ठळक झाला.
वाघोलीत तरुणावर टोळक्याचा हल्ला; मैत्रिणीसोबतचा वाद मिटवण्यासाठी बोलावले अन्…
पोलिसांच्या तपासानुसार, रविता आणि अमरदीप यांच्यात प्रेमसंबंध होते. अमरदीप आणि अमित हे मित्र होते. दोघेही टाइल्स आणि दगड बसवण्याचे काम करत होते. रविता आणि अमरदीप यांच्यातील संबंधांची माहिती अमितला मिळाल्यानंतर त्याने विरोध केल्याचे तपासात समोर आले.
अमित या नात्यात अडथळा ठरत असल्याने त्याची हत्या करण्याचा कट रचल्याचा आरोप आहे. 12 एप्रिल 2025 च्या रात्री अमित झोपलेला असताना त्याचे हात पकडून गळा दाबण्यात आला. त्यानंतर हत्या सर्पदंशामुळे झाल्याचा आभास निर्माण करण्यासाठी बिछान्यावर जिवंत साप सोडण्यात आल्याचे तपासात सांगण्यात आले.
अमरदीपने गावात देवीच्या जागरणाचे कारण सांगून कृष्ण नावाच्या गारुड्याकडून एक हजार रुपयांना साप विकत घेतल्याचा आरोप आहे. कृष्णने हा साप त्याचे आजोबा प्रीतमनाथ यांच्याकडून आणला होता.
अमितचा भाऊ मोनू कश्यप याने 16 एप्रिल 2025 रोजी रविता आणि अमरदीप यांच्याविरोधात तक्रार दाखल केली. पोलिसांनी तपास करून 26 जून 2025 रोजी न्यायालयात आरोपपत्र दाखल केले.
खटल्याच्या सुनावणीदरम्यान अभियोजन पक्षाने एकूण 12 साक्षीदारांचे जबाब नोंदवले. त्यात मृत अमितचा भाऊ मोनू, आई मुनेश देवी, गारुडी, डॉक्टर कपिल गर्ग आणि तपास अधिकारी इंदू वर्मा यांचा समावेश होता.
या प्रकरणात सर्पदंशाचा बनाव, शवविच्छेदन अहवाल आणि डिजिटल पुरावे महत्त्वाचे ठरले. न्यायालयाने रविता आणि अमरदीप यांना दोषी ठरवून मृत्युदंडाची शिक्षा सुनावली.
