बुधवार, 21 ऑक्टोबर 2026
सौजन्य फोटो - सोशल मिडीया
नाशिक : ओझर-पिंपळगाव महामार्गावरील पुलावर बुधवारी दुपारी शिरपूर-नाशिक एसटी बसचा भीषण अपघात झाला. शिरपूरहून नाशिकच्या दिशेने भरधाव वेगाने जाणाऱ्या बसवरील चालकाचे अचानक नियंत्रण सुटल्याने बसने रस्त्याच्या कडेला असलेले काही लाईटचे पोल उडवले आणि त्यानंतर थेट डिव्हायडरला धडकली. या अपघातात बसमधील अनेक प्रवासी जखमी झाले आहेत. पुलावरच हा अपघात झाल्याने बसच्या धडकेचा मोठा आवाज झाला. त्यामुळे परिसरात काही काळ घबराटीचे वातावरण निर्माण झाले. अपघाताची माहिती मिळताच स्थानिक नागरिक तसेच प्रशासनाने तातडीने घटनास्थळी धाव घेत मदतकार्य सुरू केले. जखमी प्रवाशांना रुग्णवाहिकांच्या मदतीने जवळच्या रुग्णालयात उपचारासाठी दाखल करण्यात आले. जखमींपैकी काही जणांना किरकोळ, तर काहींना गंभीर दुखापत झाल्याची प्राथमिक माहिती आहे.
अपघाताची माहिती मिळताच आमदार दिलीप बनकर यांनी घटनास्थळी धाव घेत परिस्थितीची पाहणी केली. तसेच जखमींना तातडीने उपचार मिळावेत आणि मदतकार्य वेगाने पूर्ण करावे, अशा सूचना त्यांनी प्रशासनाला दिल्या.
अपघातानंतर ओझर-पिंपळगाव महामार्गावर दोन्ही बाजूंनी वाहनांच्या लांबच लांब रांगा लागल्या. त्यामुळे महामार्गावर मोठी वाहतूक कोंडी निर्माण झाली होती. घटनेची माहिती मिळताच ओझर पोलीस आणि महामार्ग पोलीस घटनास्थळी दाखल झाले. अपघातग्रस्त बस बाजूला करून वाहतूक सुरळीत करण्याचे काम पोलिसांनी हाती घेतले. दरम्यान, अपघातातील जखमींची अचूक संख्या अद्याप स्पष्ट झालेली नाही. या अपघाताचा ओझर पोलीस पुढील तपास करीत आहेत. एसटी महामंडळाकडूनही या घटनेची चौकशी होण्याची शक्यता आहे. मागील काही काळात एसटी बसच्या अपघातांच्या घटना वाढत असल्याने प्रवाशांच्या सुरक्षिततेबाबत चिंता व्यक्त केली जात आहे.
Ans: ओझर-पिंपळगाव महामार्गावरील पुलावर हा अपघात झाला.
Ans: शिरपूरहून नाशिककडे ही बस जात होती.
Ans: ओझर पोलीस आणि महामार्ग पोलिसांनी घटनास्थळी दाखल होत जखमींना उपचारासाठी पाठवले आणि अपघातग्रस्त बस बाजूला करून वाहतूक सुरळीत केली.
