गुरुवार, 22 ऑक्टोबर 2026
(फोटो सौजन्य - सोशल मीडिया)
Bigg Boss: भारतातील लोकप्रिय रिअॅलिटी शो ‘बिग बॉस’ आता आणखी मोठ्या स्वरूपात प्रेक्षकांच्या भेटीला येणार आहे. बानिजय एंटरटेनमेंटचा भाग असलेल्या एंडेमोल शाइन इंडियाने ‘बिग बॉस’च्या माध्यमातून एक ऐतिहासिक टप्पा गाठला आहे. यंदा ‘बिग बॉस’चे तब्बल सहा भाषांमधील एडिशन्स एकाच काळात देशभरात लॉन्च होणार आहेत. हिंदी, तमिळ, तेलुगू, कन्नड, मल्याळम आणि बंगाली या सहा भाषांमध्ये शोचा नवा सीझन पाहायला मिळणार आहे.
‘बिग बॉस’ फ्रँचायझीचा विस्तार गेल्या काही वर्षांत मोठ्या प्रमाणात झाला आहे. मात्र, यंदा पहिल्यांदाच हिंदीसह पाच प्रादेशिक भाषांमधील एडिशन्सना एकाच लॉन्च विंडोमध्ये आणण्यात येत आहे. JioStarच्या माहितीनुसार, हिंदी, तमिळ, तेलुगू, कन्नड, मल्याळम आणि बंगाली अशा सहा भाषांमध्ये ‘बिग बॉस’चे एडिशन्स सुरू होणार आहेत.
यामुळे देशभरातील प्रेक्षकांना आपल्या-आपल्या भाषेत ‘बिग बॉस’चा थरार अनुभवता येणार आहे. विशेष म्हणजे वेगवेगळ्या भाषांमधील या शोचे लोकप्रिय होस्टही या महालॉन्चचा महत्त्वाचा भाग आहेत.
‘बिग बॉस हिंदी’च्या २०व्या सीझनचं सूत्रसंचालन सलमान खान करणार आहे. बंगाली आवृत्तीची धुरा माजी भारतीय क्रिकेटपटू सौरव गांगुली सांभाळणार आहेत. तर तमिळमध्ये विजय सेतुपती, तेलुगूमध्ये नागार्जुन अक्किनेनी, कन्नडमध्ये किच्चा सुदीप आणि मल्याळममध्ये मोहनलाल हे लोकप्रिय कलाकार प्रेक्षकांचं मनोरंजन करणार आहेत.
या सर्व होस्ट्सच्या लोकप्रियतेमुळे ‘बिग बॉस’च्या या बहुभाषिक लॉन्चकडे संपूर्ण देशाचं लक्ष लागलं आहे.
एकाच वेळी स्क्रीनवर दिसणार ‘बिग बॉस’चे होस्ट्स
या महालॉन्चचं आणखी एक आकर्षण म्हणजे विविध भाषांमधील ‘बिग बॉस’च्या होस्ट्सना एका मोठ्या प्रमोशनल सेलिब्रेशनमध्ये एकत्र आणण्यात येत आहे. दक्षिण भारतीय आवृत्त्यांसाठी विजय सेतुपती, नागार्जुन, किच्चा सुदीप आणि मोहनलाल यांचा खास क्रॉसओव्हर प्रोमोही समोर आला आहे. चारही आवृत्त्या ६ सप्टेंबरला एकाच दिवशी सुरू होणार आहेत.
दरम्यान, हिंदी ‘बिग बॉस’चा २०वा सीझन सलमान खानच्या सूत्रसंचालनामुळे आधीपासूनच चर्चेत आहे. नव्या सीझनमध्ये स्पर्धकांमधील रणनीती, टास्क, नाती आणि वाद यामुळे प्रेक्षकांना मनोरंजनाची मोठी मेजवानी मिळण्याची अपेक्षा आहे.
६ सप्टेंबरला रंगणार ‘बिग बॉस’चा महाआरंभ
‘बिग बॉस’च्या या बहुभाषिक विस्तारामुळे रिअॅलिटी मनोरंजनाच्या क्षेत्रात मोठा टप्पा गाठला जाणार आहे. हिंदी, तमिळ, तेलुगू, कन्नड, मल्याळम आणि बंगाली अशा सहा भाषांमधील एडिशन्स सप्टेंबरमध्ये JioStarच्या नेटवर्कवर आणि JioHotstarवर उपलब्ध होणार आहेत.
‘बिग बॉस’च्या या महालॉन्चमुळे प्रेक्षकांना सहा भाषांमध्ये वेगवेगळ्या घरांमधील नवे स्पर्धक, नवे ड्रामा आणि नवी समीकरणं पाहायला मिळणार आहेत. त्यामुळे यंदाचा ‘बिग बॉस’ सीझन फ्रँचायझीसाठीच नव्हे, तर भारतीय रिअॅलिटी टेलिव्हिजनसाठीही खास ठरण्याची शक्यता आहे.
