बुधवार, 21 ऑक्टोबर 2026
(फोटो सौजन्य -सोशल मीडिया)
Miranda Warning : मराठी चित्रपटसृष्टीत पुन्हा एकदा रहस्य आणि थराराची मेजवानी पाहायला मिळणार आहे. फार्महाऊसवर घडलेल्या खुनाच्या घटनेचा शोध घेणारा ‘मिरांडा वॉर्निंग’ हा आगामी मराठी चित्रपट प्रेक्षकांच्या भेटीला येण्यासाठी सज्ज झाला आहे. नुकताच या चित्रपटाचा रंजक टीझर सोशल मीडियावर प्रदर्शित करण्यात आला असून, त्यातून चित्रपटातील रहस्याची झलक पाहायला मिळते. दमदार कलाकारांची फळी आणि खुनाच्या तपासाभोवती फिरणारं कथानक यामुळे या चित्रपटाबद्दलची उत्सुकता वाढली आहे. हा चित्रपट २७ नोव्हेंबर रोजी सर्वत्र प्रदर्शित होणार आहे.
‘मिरांडा वॉर्निंग’ या चित्रपटात अभिनेता आदिनाथ कोठारे पोलिस अधिकाऱ्याच्या भूमिकेत दिसणार आहे. त्याच्यासोबत जान्हवी किल्लेकर, सुरेश विश्वकर्मा, पायल जाधव, वैभव चव्हाण, इरिना रुडाकोवा, एकनाथ गीते आणि त्रिशा कमलाकर असे दमदार कलाकार महत्त्वाच्या भूमिकांमध्ये दिसणार आहेत. फार्महाऊसवर घडलेल्या खुनानंतर सुरू होणारा तपास, संशयाची वर्तुळं आणि गुन्हेगारापर्यंत पोहोचण्यासाठी पोलिस अधिकाऱ्याला करावा लागणारा शोध, यांची झलक टीझरमधून पाहायला मिळते.
सचिन धोत्रे यांचं निर्मिती आणि दिग्दर्शन
सतनाम फिल्म्स स्टुडिओ आणि ओपन गेट मुव्हीज यांच्या माध्यमातून या चित्रपटाची निर्मिती करण्यात आली आहे. सचिन धोत्रे यांनी चित्रपटाचं निर्मिती आणि दिग्दर्शन केलं आहे. यापूर्वी त्यांनी २०२३ मध्ये ‘गेट-टुगेदर’ या चित्रपटाचं दिग्दर्शन केलं होतं. ‘मिरांडा वॉर्निंग’साठी रवींद्र मठाधिकारी आणि सायली मठाधिकारी यांनी लेखन केलं आहे. अल्ट्रा मीडिया एंटरटेनमेंटचे सुशीलकुमार अग्रवाल आणि सुकल्प चित्रचे कल्पक जोशी यांनी या चित्रपटाची प्रस्तुती केली आहे.
फार्महाऊसवर घडलेल्या खुनाच्या घटनेनंतर तपासाला सुरुवात होते. या प्रकरणात अनेक प्रश्न निर्माण होतात, संशयाची दिशा बदलते आणि प्रत्येक नव्या धाग्यासोबत रहस्याचे वेगवेगळे पदर उलगडत जातात. अखेर खरा गुन्हेगार कोण, पोलिस अधिकारी त्याच्यापर्यंत कसा पोहोचणार आणि या प्रकरणामागचं सत्य काय, याची उत्सुकता चित्रपटाच्या टीझरमुळे निर्माण झाली आहे.
सस्पेन्स आणि थ्रिलरची सांगड घालणाऱ्या ‘मिरांडा वॉर्निंग’मधून प्रेक्षकांना खुनाच्या तपासाचा थरार अनुभवायला मिळणार आहे. या रहस्यमय कथानकातील प्रश्नांची उत्तरं जाणून घेण्यासाठी प्रेक्षकांना २७ नोव्हेंबरपर्यंत प्रतीक्षा करावी लागणार आहे.
